Read Batak Simalungun JESAYA 52 Bible Online

JESAYA 52 - Batak Simalungun bible

JESAYA 52

¹Puho ma, puho ma, sorungkon ma gogohmu ale Sion! Pakei ma pakeianmu na jenges, ale Jerusalem, huta na pansing in! Ai seng malo be masuk bam halak na so marsunat atap halak na mabutak. [526]

²Paspaskon ma humbam orbuk in, jongjong ma, ale Jerusalem na tartangkap in! Tanggali ma sangkut-sangkut in humbani borgokmu, ale boru Sion na tartaban in!

³Ai sonon do hata ni Jahowa, “Domma tarjual hanima seng marboli, seng marhitei pirak hanima homa tobuson. [527]

⁴Ai sonon do hata ni Tuhan Jahowa, ʻHu Masir do ijia tuad bangsang-Ku laho manginsolat ijai, anjaha iodoh-odoh Assur do sidea seng marhala.ʼ [528]

⁵Tapi sonari, aha do bahenon-Ku ijon, nini Jahowa, ai tarboan do bangsang-Ku lang marhala; na manggomgomsi marmogah-mogah, nini Jahowa, anjaha tongtong ganup ari do goran-Ku iapasi. [529]

⁶Halani ai, maningon tandaon ni bangsang-Ku do goran-Ku bani panorang ai, anjaha botohon ni sidea do, Ahu do ai na mangkatahon: Ijon do Ahu.”

⁷ Jenges ni in i atas dolog nahei ni parambilan na madear, na patangarhon hadameion, na mangambilankon Ambilan Na Madear, na pabogeihon haluahon, na mangkatahon bani Sion, “Naibatamu do bangkit raja.” [530]

⁸Tangar, parjagamu pamaling sorani, rap do sidea marsurak-surak, ai torang do ididah sidea parmulak ni Jahowa hu Sion. [531]

⁹Marsurak anjaha marolob-olob ma hanima, ale reong-reong ni Jerusalem! Ai iapoh Jahowa do bangsa-Ni, anjaha itobus do Jerusalem.

¹⁰Ipatalar Jahowa do kuasa-Ni na pansing in i lobei ni sipajuh begu-begu, anjaha haganup do ujung ni tanoh on mangidah haluahon na humbani Naibata. [532]

¹¹Misir, misir ma, mandarat ma hunjai, ulang jamah na mabutak! Luar ma hun tongah-tongah ni sidea, urasi dirinima, hanima siusung parugas ni Jahowa. [533]

¹²Ulang pala tarolos hanima mandarat, anjaha ulang marlintun hanima songon na laho maporus, ai Jahowa do mardalan i lobeinima, anjaha Naibata ni Israel do panjaga i pudinima. [534]

¹³Tonggor ma, mardohar do juakjuak-Ku, pagijangon do ia anjaha patimbulon, maningon gijang tumang do ia. [535]

¹⁴Buei do na longang mangidahsi, ai bajan do rupani, legan humbani jolma na somal, anjaha rumangni seng songon anak ni jolma na legan; [536]

¹⁵sonai do bahenon-Ni longang buei bangsa parbegu, anjaha raja-raja manutup pamanganni i lobei ni; ai na so ongga ope ibaritahon bani sidea, idahon ni sidea ma, anjaha na so ongga ibogei sidea arusan ni sidea ma. [537]