Read Batak Simalungun JESAYA 54 Bible Online

JESAYA 54 - Batak Simalungun bible

JESAYA 54

¹Marolob-olob ma ho, ale na lambang, na so ongga manubuhkon anak! Maling ma soramu marsurak-surak anjaha marmegah-megah ma ho, na so ongga mangarou anak, ai bueinan do anak ni naboru na punjung marimbang anak ni naboru na marhajabuan, nini Jahowa. [550]

²Pabolag ma ianan ni lampolampomu, anjaha paherbang ma hirei-hirei ni rumahmu! Ulang pandang, paganjang ma talini anjaha patoguh pasuk-pasukni! [551]

³Ai manggargar ma hanima hu siamun ampa hu sambilou, ginomparmu do gabe panean bani sipajuh begu-begu, anjaha sidea do mangiankon huta na tarulang.

⁴Ulang mabiar, ai seng anjai bador ho; ulang maila, ai seng anjai hiranan ho! Ai lupa ma ho bani habadoron ni haposoonmu, anjaha seng be paingat-ingatonmu hahirion ni habaluonmu. [552]

⁵Ai paramangonmu ai ma Sitompa ho, Jahowa Zebaot do goran-Ni; anjaha Sipaluah ho ai ma Na Pansing ni Israel, Naibata ni sab tanoh on do Ia igoran. [553]

⁶Ai songon naboru na sinirangkon anjaha na marpusok ni uhur do ho idilo Jahowa, anjaha naboru hinaholongan sanggah poso, mintor tarambungkon ma ai? nini Jahowa Naibatamu. [554]

⁷ Tongkin do hansa Hutadingkon ho, tapi marhitei holong ni uhur na banggal patumpuon-Ku do ho. [555]

⁸ Sanggah pargajag ni ringis-Hu Huponopkon tongkin bohing-Ku dompak ho, tapi marhitei idop ni uhur sisadokah ni dokahni idopan-Ku do ho, nini Jahowa, Sipaluah ho. [556]

⁹Songon panorang ni si Noak do on bangku: Songon na Hubijahon ase ulang be irungkub bah ni si Noak tanoh on, sonai do Ahu marbija, paboa seng gilaan-Ku be ho, anjaha seng be hataon-Ku ho. [557]

¹⁰ Ai mosor pe sagala dolog anjaha dugur sagala buntu-buntu, tapi idop ni uhur-Hu seng anjai mosor humbam, anjaha padan pardameian na hun Bangku seng anjai morot, nini Jahowa, na maridop ni uhur bam. [558]

¹¹Ho ale na masombuh, na pinarburu, na so niapohan! Tonggor ma, Ahu do na patibal batumu bani batu intan, anjaha na pajonam onjolanmu bani batu sapir.

¹²Paulion-Ku do anjung-anjungmu humbani kristal, horbanganmu humbani batu rubin, anjaha tembokmu haganup humbani batu na maharga. [559]

¹³Anjaha haganup anakmu gabe susian ni Jahowa, anjaha banggal do hadoharon ni niombahmu. [560]

¹⁴Ibagas hapintoron do ho pajonamon, anjaha mandaoh ma ho humbani odoh-odoh, ai seng dong be sihabiaranmu; sonai humbani songgot-songgot, ai seng anjai dohor be ai bam.

¹⁵Tonggor ma, anggo dong na roh mangimbang ho, seng na Huharosuhkon ai, barang ise na roh mangimbang ho, maningon talu do ia marimbang ho. [561]

¹⁶Tonggor ma, Ahu do na manjadihon tukang bosi, sisompul arang ibagas apuy, anjaha sipauli sinjata marguru hubani habotohonni, tapi Ahu do homa na manjadihon sipangagou laho parsedahon;

¹⁷sinjata na tinopa mangimbang ho, seng anjai mangasi, anjaha dilah na mangimbang ho bani paruhuman, taluhononmu do. Ai ma parbagianan ni sagala juakjuak ni Jahowa, anjaha hapintoron ni sidea hun Bangku do marharorohan, nini Jahowa.