Read Batak Simalungun JESAYA 56 Bible Online

JESAYA 56 - Batak Simalungun bible

JESAYA 56

¹Sonon do hata ni Jahowa, “Ramotkon hanima ma uhum, anjaha horjahon hanima ma hapintoron, ai barah ma roh haluahon na hun Bangku, anjaha talar ma hapintoron-Ku! [572]

²Martuah ma jolma na mandalankon on, ampa anak ni jolma na marsijoloman hujai, na marramotkon ari Sabat humbani habutakon, anjaha na marramotkon tanganni humbani na mangkorjahon na masambor. [573]

³Sai ulang ma ihatahon halak na legan, na dob padomuhon dirini hubani Jahowa, ʻSirangkonon ni Jahowa do ahu humbani bangsani; anjaha ulang ma ihatahon halak na kinasihkon: Tonggor ma, hayu na masak do ahu.ʼ [574]

⁴Ai sonon do hata ni Jahowa, ʻBani halak na kinasihkon, na marramotkon ari Sabat-Ku anjaha na mamilih na Huharosuhkon, anjaha na totap manjolom padan-Ku,

⁵bereon-Ku do bani sidea ibagas rumah-Ku ampa i tongah-tongah ni tembok ianan pakon goran, na dearan humbani anak ampa boru. Goran sisadokah ni dokahni do bereon-Ku bani sidea, goran na so sisasapon.ʼ

⁶Anjaha halak na legan na dob padomuhon dirini bani Jahowa, laho mambalosi-Si anjaha laho mangkaholongi goran-Ni, ase gabe juakjuak-Ni sidea, haganup na marramotkon ari sabat humbani habutakon, anjaha na totap manjolom padan-Ku, [575]

⁷sidea do boanon-Ku hu dolog hapansingon-Ku, anjaha pamalason-Ku do uhur ni sidea ibagas rumah partonggoan Bangku. Galangan situtungon ampa galangan sisayaton ni sidea harosuhkonon-Ku do ai bani anjapanjap-Ku, ai rumah partonggoan do goranon rumah-Ku bani sagala bangsa.” [576]

⁸Sonon do hata ni Tuhan Jahowa, na patumpu halak na merap humbani Israel, “Patumpuon-Ku ope halak na legan hu bani, ambah ni na dob tumpu in!” [577]

⁹Sagala binatang na i talun roh ma mangankon, sonai ganup hanima binatang na i harangan. [578]

¹⁰Parjaga ni sidea mapitung do ganup, seng dong na binotoh ni sidea; baliang na longah do sidea ganup, na so mambotoh mangorong; marnipinipi do sidea tibal anjaha marosuh modom. [579]

¹¹Tapi baliang on parhisap do, na so ra bosur. Anjaha homa parmahan na so maruhur do sidea, ganup sidea marsitohu dalanni bei, ganup mangindahi paruntunganni, [580]

¹²nini sidea, “Eta, hualop pe anggur, bosuri hita ma dirinta bani siinumon na koras; patar pe sonai do, songon sadari on, sabasan tene.” [581]