Read Batak Simalungun JESAYA 59 Bible Online

JESAYA 59 - Batak Simalungun bible

JESAYA 59

¹Tonggor ma, seng na hurang ganjang tangan ni Jahowa laho mangurupi, anjaha seng marhapal pinggol-Ni laho manangihon; [604]

²tapi hajahatonnima do tene manirang hanima humbani Naibatanima, anjaha dousanima mambahen lingod bohi-Ni hu bannima, gabe seng itangihon hanima. [605]

³Ai marsapu daroh do tangannima anjaha marlapu hajahaton jari-jarinima; bibirnima mangkatahon ladung, anjaha gok hajahaton do dilahnima. [606]

⁴Sahalak pe lang dong be na mansahapkon hapintoron, anjaha seng dong be na manguhum ibagas hasintongan; bani na lang do sidea marhatengeran, anjaha ladung do iluarhon; boratan rumah do sidea marhitei hajahaton, anjaha hamagouan do itubuhkon. [607]

⁵Tolur ni ulog darih do ipodomkon sidea, anjaha asar ni lawah-lawah ipauli; ise na mangankon tolur ni sidea, maningon matei do, anjaha humbani tolur na hona dogei luar ulog darih. [608]

⁶Na tinonun ni sidea ai seng marguna gabe hiou, anjaha seng tarbahen jadi sabing na hinorjahon ni sidea. Horja hajahaton do horja ni sidea, anjaha pangodoh-odohon do horja ni tangan ni sidea.

⁷Podas do nahei ni sidea mangkorjahon hajahaton, anjaha tarolos do sidea manduruskon daroh na so marpipot; uhur hajahaton do uhur ni sidea, na parsedahon ampa na mangagou dalan ni sidea. [609]

⁸Dalan hadameion seng itanda sidea, seng dong habonaron bani dalan ni sidea; mareluk-eluk do dalanni ibahen sidea, sagala na mardalan ijai seng marhasonangan.

⁹Halani ai do ase daoh habonaron hun banta, anjaha seng roh hapintoron banta. Mangarap do hita bani haliharon, hape na golap do, atap bani sinalsal, hape bani na lotir do hita mardalan. [610]

¹⁰Dadap-dadap do hita bani dingding songon halak na mapitung, anjaha jamah-jamah songon halak na so marmata. Mangkatartolsu hita arian songon bani golap ni ari, anjaha songon na matei do hita bani hagogohon ni angkulanta. [611]

¹¹Ganup do hita morong songon gipul, anjaha marduhur-duhur songon asas; sai paima-imahon do hita bani habonaron, hape seng dong; paima-imahon do hita bani haluahon, hape daoh do hun banta. [612]

¹²Ai buei do panlanggaronnami i lobei-Mu, anjaha dousanami do mangaduhon hanami; talar do bennami panlanggaronnami, anjaha ibotoh hanami do hajahatonnami. [613]

¹³Marbalik anjaha marnalangkon Jahowa do hanami anjaha itundali hanami do Naibatanami; mansahapkon pangodoh-odohon do hanami ampa parbalikon; iluarhon hanami do hata ladung humbagas uhurnami.

¹⁴Surut do dompak pudi habonaron, anjaha mandaoh-daoh do hapintoron jongjong.

¹⁵Seng jumpah be hasintongan, anjaha barang ise na paholang dirini humbani hajahaton, gabe sirampokan ma. ididah Jahowa do ai, gabe seda uhur-Ni, halani seng dong be habonaron.

¹⁶Anjaha ididah, seng dong jolma na boi paluahkon; longang do uhur-Ni halani seng dong na mangapiti; jadi tangan-Ni sandiri ma na manumpaki-Si, anjaha hapintoron-Ni na mangurupi-Si. [614]

¹⁷Ipakei hapintoron songon baju partahanan, anjaha inahkon tangkuluk haluahon bani ulu-Ni; hiou pambalason do ipahei, anjaha ihioui diri-Ni bani baju-baju parsimburuon. [615]

¹⁸Romban hubani pambahenan do Ia mambalas: ringis hu bani imbang-Ni, pambalason bani munsuh-Ni; bani pulou-pulou pe dalankonon-Ni do pambalason.

¹⁹Jadi habiaran ni halak na i hasundutan ma goran ni Jahowa, ampa halak na i hapoltakan mabiar do bani hamuliaon-Ni, ai roh do Ia songon bah marbanggal na doras, ai ma na jinuljul ni hosah ni Jahowa.

²⁰ Jadi roh ma hu Sion Sipaluah, sonai bani halak na i Jakob, na mulak humbani hajahaton, nini Jahowa. [616]

²¹Tapi anggo Ahu, on do padan-Ku bani sidea, nini Jahowa, “Tonduy-Hu, na sorap bam ampa hatang-Ku, na dob Hunahkon bani pamanganmu, seng boi morot ai humbani pamanganmu, age humbani pamangan ni ginomparmu, age humbani pamangan ni ginompar ni ginomparmu, nini Jahowa, humbani sonari nari ronsi sadokah ni dokahni.” [617]