Read Batak Simalungun JESAYA 6 Bible Online

JESAYA 6 - Batak Simalungun bible

JESAYA 6

¹Bani tahun parmatei ni Raja Usia, huidah do Tuhan hundul i atas hotak na gijang anjaha na marmulia; anjaha rambu ni pakeian-Ni do manggoki rumah panumbahan. [62]

²Serapim do jongjong i babou-Ni, na marhabong onom bei; dua marrungkub bohini, dua marrungkub naheini anjaha dua mangkabangkonsi.

³Marsitauran ma sidea, nini, “Na Pansing, Na Pansing, Na Pansing do Jahowa Zebaot, gok do sab tanoh on bani hamuliaon-Ni.” [63]

⁴Jadi dugur ma onjolan ni pasihon halani sora ni na dilo-dilo ai, anjaha gok timus ma rumah ai. [64]

⁵Dob ai ningku ma, “Bursik ma ahu! Magou ma ahu, halani jolma parbibir na mabutak do ahu, anjaha marianan do ahu i tongah-tongah ni halak parbibir na mabutak; ai domma ididah matangku Raja in, Jahowa Zebaot. [65]

⁶Sada humbani Serapim ai habang ma dompak ahu, mamboan narnar ibagas tanganni, ai ma na binuatni marhitei gansip-gansip humbani anjapanjap. [66]

⁷Ijamah ma marhitei ai bibirhu, anjaha nini, ʻTonggor ma, on do na manjamah bibirmu, sae ma salahmu, sasap ma dousamu.ʼ [67]

⁸Dob ai hubogei ma sora ni Tuhan, na mangkatahon, “Ise do sisuruhon-Ku: Ise do utusannami? Jadi ningku ma, ʻIjon do ahu, suruh Ham ma ahu!ʼ

⁹Jadi ihatahon ma, ʻLaho ma ho, hatahon ma bani bangsa on: Tangar, tangar hanima ma, tapi ulang artihon; idah, idah hanima ma, tapi ulang arusi hanima! [68]

¹⁰Patendel ma uhur ni bangsa on, panengel pinggolni, anjaha papitung matani, ase ulang marpangidah ia marhitei matani, anjaha ulang marpanangar marhitei pinggolni; ase ulang mangarti uhurni, anjaha ulang ipaubah uhurni gabe malum ia.ʼ [69]

¹¹Jadi ningku ma, ʻPiga dokah on, Tuhan?ʼ Balos-Ni, ʻRonsi halong huta-huta, seng dong na mangiankon; rumah-rumah lang marisi jolma, anjaha ladang salih gabe halimisan;

¹²ipadaoh Jahowa jolma, anjaha lungun tumang tanoh in.ʼ

¹³Anjaha anggo adong ope na tading ijai saparsapuluh, ai pe boiskononkon do, usih songon hayu jajabi atap hayu baringin, na jongjong ope martutuho, sanggah hona roboh. Bonih na ma pansing do tutuhoni ai.” [70]