Read Batak Simalungun JESAYA 60 Bible Online

JESAYA 60 - Batak Simalungun bible

JESAYA 60

¹ Jongjong ma, marsinondang ma ho! Ai domma roh panondangmu anjaha hamuliaon ni Jahowa domma poltak i baboumu.

² Ai tonggor ma, na lotir do marrungkub tanoh on, anjaha hagolapan sagala bangsa; tapi i baboumu do poltak Jahowa anjaha hamuliaonni taridah i atasmu.

³Jadi roh ma bangsa sipajuh begu-begu marayak panondangmu ampa raja-raja roh bani sinalsal na poltak bam. [618]

⁴Mangkawah ma ho inggot, anjaha tonggor ma: Ganup do sidea martumpu, marrohan bam. Roh do anakmu humbani na daoh, anjaha borumu iboban bani abing-abingan. [619]

⁵Jadi idahonmu ma ai gabe minar ma bohimu; hinsah anjaha lumbang ma uhurmu, ai roh ma bam habayakon ni laut ampa arta ni bangsa-bangsa das ma bam.

⁶Hulanan ni unta do marrungkub tanohmu, unta na hinsah hun Midian ampa hun Epa; haganupan sidea na hun Seba roh do. Iboan sidea do omas pakon hamonan anjaha iambilankon sidea do puji-pujian ni Jahowa. [620]

⁷Haganup biribiri na hun Ketar martumpu bam, biribiri tunggal na hun Nabayot marugas bam; roh do sidea bani anjapanjap-Ku gabe galangan harosuh, anjaha pasangapon-Ku do rumah-Ku na marmulia in.

⁸Ise do sidea na habang ai songon hombun, anjaha songon asas na laho bani harangni?

⁹Ai siholan do sagala pulou Bangku, anjaha kapal-kapal na hun Tarsis parlobei laho mamboan anakmu humbani na madaoh, iboan homa pirak ampa omas ni sidea, haporluan bani goran ni Jahowa Naibatamu ampa bani Na Pansing ni Israel, ai Ia do mambahen marmulia ho. [621]

¹⁰Halak na legan ma paulihon tembokmu, anjaha raja-raja ni sidea marugas bam; tongon ibagas ringis-Ku Hubogbog ho, tapi marhitei parontou ni uhur-Hu idopan-Ku do ho. [622]

¹¹Anjaha horbanganmu manongtong ma ai buha, arian pakon borngin seng tutup, ase boi iboban hu bam habayakon ni bangsa-bangsa, rap pakon raja ni sidea marodor itogu. [623]

¹²Ai bangsa pakon harajaon na so mambalosi ho maningon magou do; bangsa-bangsa ai maningon siapkononkon do.

¹³Habayakon ni Libanon roh do bam, ai ma hayu ares, maranti ampa sampinur, laho pajagarhon ianan ni hapansingon-Ku, ampa mambahen marmulia sidogeian ni nahei-Hu. [624]

¹⁴Roh do marrogop hu bam ginompar ni na mandoruni ho, anjaha sagala na mangapasi ho maningon marsombah do bani naheimu; anjaha goranon ni sidea ma ho, “Huta ni Jahowa, Sion ni Na Ma Pansing ni Israel.” [625]

¹⁵Tembal ni na dob tinadingkon ho anjaha nidomdoman anjaha sinimbilan ni halak, bahenon-Ku ma ho marmulia sadokah ni dokahni, anjaha gabe malas ni uhur marsundut-sundut. [626]

¹⁶Onsoponmu ma dadih ni bangsa-bangsa, anjaha minum ma ho humbani habayakon ni raja-raja; jadi botohonmu ma, Ahu do Jahowa, Sipaluah bam ampa Sipartobus, Sipargogoh bani Jakob. [627]

¹⁷Gantih ni tombaga boanon-Ku ma omas, anjaha gantih ni bosi boanon-Ku ma pirak; gantih ni hayu, tombaga; gantih ni batu, bosi. Bahenon-Ku ma damei panggomgomi bam, anjaha parrajai hapintoron. [628]

¹⁸Seng tarbogei be odoh-odoh i tanohmu, hareongon ampa hasedaon i nagorimu; goranon ma tembokmu Hatuahon anjaha horbanganmu Puji-pujian. [629]

¹⁹Seng dong be mata ni ari bahen panondang bam arian, anjaha sondang ni bulan seng marsinalsal bam; tapi Jahowa ma gabe panondang bam sadokah ni dokahni, anjaha Naibatamu gabe hamuliaon bam. [630]

²⁰Seng sundut mata ni arimu, anjaha seng lingod be bulanmu; ai Jahowa do gabe panondang sisadokah ni dokahni bam, anjaha marpunsa ma panorang pusok ni uhurmu.

²¹Anjaha bangsamu, ganup do sidea halak parpintor, anjaha teanon ni sidea do tanoh on ronsi sadokah ni dokahni; sidea, ai ma tumbor na Husuan, jadi-jadian ni tangan-Ku, bahen hasangapon-Ku. [631]

²²Na etek ai gabe saribu, na otik ai gabe sada bangsa na gogoh; Ahu do Jahowa, na papodaskon roh bani panorangni.