Read Batak Simalungun JESAYA 61 Bible Online

JESAYA 61 - Batak Simalungun bible

JESAYA 61

¹ Tonduy ni Tuhan Jahowa do na sogop bangku, ai domma iminaki Jahowa ahu, laho mangambilankon Ambilan Na Madear bani halak na madoyuk; isuruh do ahu pauli-ulihon halak paruhur na maropuk, maningtingkon haluahon bani halak na tartutup, ampa parharhar ni gari bani halak na tarsangkut; [632]

² laho maningtingkon tahun idop ni uhur humbani Jahowa, ampa ari pambalason ni Naibatanta; laho mangapoh sagala na marpusok ni uhur i Sion, [633]

³mamberehon bani sidea sortali gantih ni abuan, minak malas ni uhur gantih ni hiou pusok ni uhur, doding puji-pujian gantih ni tonduy na horu, ase targoran sidea hayu hapintoron, na sinuan ni Jahowa, bahen puji-pujian Bani.

⁴Paulion do na dob pinarseda; pabayuon ni sidea do huta-huta na dob mareong, na dob tarulang marsundut-sundut.

⁵Halak na legan do jongjong-jongjong marmahani hulanannima, anjaha bangsa na legan gabe parhorja i jumanima ampa i pohon anggurnima. [634]

⁶Tapi anggo hanima goranon do malim ni Jahowa, siparugas bani Naibatanta do hatahononkon hanima. Habayakon ni sipajuh begu-begu do panganonnima, anjaha hasangapon ni sidea solukonnima. [635]

⁷Gantih ni habadoronnima, jaloonnima do parbagianan sidua lompit i tanohnima; gantih ni hahirionnima jaloonnima do malas ni uhur sisadokah ni dokahni.

⁸Ai Ahu do Jahowa sihaholongi hapintoron, tapi na magigi bani panrampokon ampa na masambor. Sai berehonon-Ku do upah bani sidea sintong-sintong, anjaha bahenon do padan sisadokah ni dokahni bani sidea. [636]

⁹Tarbarita do ginompar ni sidea i tongah-tongah ni sipajuh begu-begu, sonai anak ni sidea i tongah-tongah ni bangsa-bangsa. Sagala na mangidah sidea botohonnima, bangsa na pinasu-pasu ni Jahowa do sidea.

¹⁰ Marmalas ni uhur tumang do ahu ibagas Jahowa, marolob-olob do tonduyhu ibagas Naibatangku; ai iparhioui do ahu bani hiou haluahon, anjaha isabingi do ahu bani hiou hapintoron, songon siparunjuk na manggotongi dirini, anjaha songon tunangan na mamakei ugas-ugasni. [637]

¹¹Ai songon tanoh na manubuhkon suan-suanan, anjaha songon pohon na mambahen martumbor bonih na sinaburhon hujai, sonai do Jahowa patubuhkon hapintoron ampa puji-pujian i lobei ni ganup bangsa parbegu.