Read Batak Simalungun JESAYA 62 Bible Online

JESAYA 62 - Batak Simalungun bible

JESAYA 62

¹Halani Sion seng anjai sip Ahu, anjaha halani Jerusalem seng soh Ahu, paima poltak hapintoronni songon sondang ni mata ni ari, anjaha hatuahonni songon rigapan na gara.

²Idahon ni bangsa sipajuh begu-begu ma hapintoronmu anjaha sagala raja-raja mangidah hamuliaonmu; anjaha goranon ma ho marhitei goran na baru, ai ma sitontuhonon ni pamangan ni Jahowa. [638]

³Gabe sortali hamuliaon do ho ibagas tangan ni Jahowa, anjaha sortali harajaon ibagas tangan ni Naibatamu.

⁴Lang be goranon ho na tinadingkon, anjaha tanohmu seng be hatahonon na tarulang; tapi goranon ma ho na hinarosuhkonni uhur-Hu, anjaha tanohmu goranon na dob laho; ai marosuh do Jahowa mangidah ho, anjaha tanohmu marhalahoan do. [639]

⁵Ai songon garama mambuat anak boru, sonai do ho buaton ni Sipauli ho; songon malas ni uhur ni siparunjuk bani tunanganni, sonai do malas ni uhur ni Naibatamu mangidah ho. [640]

⁶Bani tembokmu, ale Jerusalem, domma Husuruh parjaga. Arian pakon borngin seng anjai sip sidea. Hanima, na padingatkon Sion bani Jahowa, ulang ma marnasoh! [641]

⁷Ulang sip hanima i lobei-Ni, paima itatap Jerusalem anjaha ibahen ai gabe puji-pujian i tanoh on.

⁸Domma ibijahon Jahowa marhitei tangan-Ni siamun ampa marhitei tangan-Ni na gogoh in: Seng be bereon-Ku omeimu gabe panganon ni munsuhmu, anjaha seng be inumon ni halak na legan anggurmu, na dob hinangalutkonmu, [642]

⁹tapi na patumpu-tumpuhon, sidea ma na mangankon anjaha mamuji-muji Jahowa; anjaha na mambuat, sidea ma na manginum bani alaman-Ku na ma pansing in. [643]

¹⁰Luar ma, luar ma hanima hun horbangan in! Pasirsir dalan bani bangsa in! Palumbang, palumbang dalan in, padaoh batu-batu! Pajongjong ma mandera partanda bani bangsa-bangsa! [644]

¹¹Tonggor ma, domma itingtingkon Jahowa das hu ujung ni tanoh on: Hatahon ma bani boru Sion, “Tonggor ma, roh do haluahonmu! Mangihut do bani upahni, anjaha i lobei-Ni do na sinari-Ni.” [645]

¹²Goranon do sidea: bangsa na pansing, Na pinaluah ni Jahowa. Anjaha ho goranon do na hinasiholan, huta na seng be sitadingkononkon. [646]