Read Batak Simalungun JESAYA 63 Bible Online

JESAYA 63 - Batak Simalungun bible

JESAYA 63

¹Ise do in, na roh hun Edom, marhiou sigerger hun Bosra, marmulia marpakeian, luar ibagas hinagok ni gogohni? Ahu do, sihatahon hapintoron, na margogoh paluahkon. [647]

²Mase gerger pakeian-Mu, anjaha hiou-Mu songon hiou ni halak sipardogei anggur ibagas kilang anggur? [648]

³Sahalak Ahu do na mardogei ibagas kilang ai, seng dong humbani bangsa-bangsa hasoman-Ku. Domma bois Hulotloti sidea ibagas ringis-Ku, anjaha domma Hurosaki sidea ibagas ringis-Ku; marbirsak do daroh ni sidea bani hiou-Hu, gabe butak ganup pakeian-Ku. [649]

⁴Tongon, domma Huputuskon ari pambalason, anjaha roh ma tahun haluahon na hun Bangku. [650]

⁵Mangkawah Ahu, hape seng dong na mangurupi. Longang Ahu, halani seng dong na ra mangkasomani Ahu. Jadi tangan-Ku mando pangurupi Bangku, anjaha ringis-Ku mangkasomani Ahu. [651]

⁶Domma Hurojati bangsa-bangsa ibagas ringis-Ku, anjaha mabuk Hubahen sidea ibagas ringis-Ku; Huuseihon do daroh ni sidea hu tanoh. [652]

⁷Sai baritahononku do ganup dear ni layak ni Jahowa, pambahenan habanggalon ni Jahowa, domu hubani haganup na binahen ni Jahowa banta, ampa buei ni dear ni layak-Ni hubani ginompar ni Israel, na binahen-Ni bani sidea romban hu bani idop ni uhur-Ni, domu hubani hinagok ni dear ni layak-Ni.

⁸Ai nini do, “Tongon, bangsang-Ku do sidea, anak na so ra marladung.” Jadi Ia do gabe Sipaluah bani sidea, ibagas sagala hasosakan ni sidea. [653]

⁹Sedo suruhan atap malekat, tapi bohi-Ni do na paluahkon sidea; marhitei holong ni atei-Ni ampa idop ni uhur-Ni do sidea ipaluah; iabing do sidea anjaha iusung tongtong humbani sapari. [654]

¹⁰Tapi marbalik do sidea anjaha isunsahi Tonduy-Ni Na Pansing in; halani ai mubah do Ia bani sidea gabe munsuh, anjaha Ia sandiri marporang dompak sidea. [655]

¹¹Dob ai mardingat ma bangsa-Ni bani panorang sapari, bani si Musa juakjuak-Ni ai, nini sidea, “Ija do Ia, na mambuat humbagas bah siparmahan bani hulananni? Ija do Ia, na dob mamberehon Tonduy-Ni marianan ibagas dirini,

¹²na mambahen tangan-Ni na marmulia in mardalan bani ianan ni si Musa, na mambolah bah ai i lobei ni sidea, laho mambahen goran Bani sadokah ni dokahni,

¹³na manogu-nogu sidea mamontas laut na bagas, songon huda na mardalan i halimisan, seng tartolsu?”

¹⁴Songon pinahan na tuad hu habungan, sonai do ibere Tonduy ni Jahowa parsaranan bani sidea. Sonai do pambobai-Mu bani bangsa-Mu, laho mambahen Bamu goran na marmulia.

¹⁵Mangkawah ma Ham hun nagori atas, anjaha tatap Ham ma humbani ianan-Mu na pansing anjaha na marmulia in! Ija do pongut ni uhur-Mu pakon hagogohon-Mu? Sihol ni uhur-Mu ampa holong ni atei-Mu mandaoh-daoh do humbangku. [656]

¹⁶ Tongon, Ham do Bapanami, ai seng itanda si Abraham hanami, anjaha si Israel pe seng ipabotoh-botoh hanami. Ham do ale Jahowa, Bapanami, humbani sapari do goran-Mu Sitobus hanami. [657]

¹⁷Ham Jahowa, mase ipaturut Ham hanami manlembang humbani dalan-Mu? Mase ipahengkeng Ham uhurnami gabe seng marhabiaran hanami Bamu? Marulak-ulakan ma uhur-Mu halani juakjuak-Mu, halani marga parbagianan-Mu.

¹⁸Tongkin do bangsa-Mu marrupei bani ianan-Mu na pansing in; munsuhnami do mandogei-dogei ianan hapansingon-Mu. [658]

¹⁹Gabe doskon bangsa na so ongga ginomgoman-Mu do hanami, doskon halak na so ongga marpanggorankon goran-Mu.