Read Batak Simalungun JESAYA 64 Bible Online

JESAYA 64 - Batak Simalungun bible

JESAYA 64

¹Ambit iribakkon Ham ma namin langit in anjaha susur Ham, gabe dugur ma dolog-dolog i lobei-Mu,

²songon apuy na mambahen gara soban, anjaha songon apuy na pagurgur bah, ase tarbarita goran-Mu bani imbang-imbang-Mu, anjaha bangsa-bangsa gobir i lobei-Mu. [659]

³Anggo ibahen Ham halongangan na so tinagam ni uhurnami, susur Ham tene, gabe malala dolog i lobei-Mu, [660]

⁴ai ma na so ongga binogei humbani na basaia. Seng ongga ibogei pinggol, seng ongga ididah mata, dong Naibata sobali Ham, na manumpaki halak na marpangarapan Bani.

⁵Ijumpahkon Ham do halak na bujur mangkorjahon hapintoron, halak na mardingat Ham bani dalan-Mu. Tonggor ma, manggila do Ham, halani mardousa hanami hu Bamu humbani sapari anjaha marbalik hanami. [661]

⁶Gabe doskon halak na mabutak do hanami ganup, anjaha hapintoronnami ganup songon hiou gok bani na mabutak. Melus do hanami haganup songon bulung-bulung, anjaha iluahon hajahatonnami do hanami songon pambahen ni logou.

⁷Sahalak pe seng dong na mandilo goran-Mu, atap na mamorluhon marsijoloman Bamu; ai domma iponopkon Ham bohi-Mu hun bennami, anjaha iondoskon Ham hanami bani kuasa ni hajahatonnami. [662]

⁸Tapi tene, ale Jahowa, Bapanami do Ham! Tanoh halampung do hanami, anjaha Ham do Sitompa hanami; ganup do hanami jadi-jadian ni tangan-Mu. [663]

⁹Ulang ma mamarahtu Ham, ale Jahowa, ulang ma tongtong mardingat Ham bani hajahaton! Marpanatap ma Ham, ai bangsa-Mu do hanami ganup. [664]

¹⁰Gabe halimisan do sagala huta-Mu na pansing in; gabe halimisan do Sion anjaha tarulang Jerusalem.

¹¹Rumah na pansing anjaha na marmulia bennami, ianan ni ompungnami mamuji Ham, mosog do ibahen apuy; anjaha sagala ianan hamalasan ni uhurnami bois do mareong.

¹²Mangidah ganupan ai, tahan do Ham, ale Jahowa? Sai sip ope Ham, anjaha ompoton-Mu ope mangodoh-odoh hanami?