Read Batak Simalungun JESAYA 65 Bible Online

JESAYA 65 - Batak Simalungun bible

JESAYA 65

¹Sirsir do Ahu pindahan ni halak, na so sungkun-sungkun Bangku, sirsir do Ahu jumpahan ni halak na so mangindahi Ahu. Ningku do dompak bangsa na so mandilo goran-Ku, “Ijon do Ahu, ijon do Ahu!” [665]

²Hupaherbang do tangan-Ku ganup ari bani bangsa na manendel, na mardalan bani dalan na so madear, na mangihutkon rosuh ni uhurni sandiri, [666]

³Hubani bangsa na pagara ringis-Ku tongtong, na manggalang ibagas pohon, anjaha na manutung dahupa i atas batu bata,

⁴na hundul bani tanoman, na marborngin ibagas liang, na mangankon gulei babuy, anjaha kuah ni sipanganon sihagigihononkon do ibagas hudon ni sidea; [667]

⁵na mangkatahon, “Padaoh dirimu humbangku, ulang dohori ahu, ai ahu do na papansing ho.” Ningon gabe timus do sidea ibagas igung-Ku, gabe apuy na gara tongtong.

⁶Tonggor ma, tarsurat do i lobeihu, “Seng anjai sip Ahu, tapi sai luluhonon-Ku do, tongon, balaskonon-Ku do bani abingan ni sidea,

⁷hajahaton ni sidea ai ampa hajahaton ni ompung ni sidea, nini Jahowa; halani manutung dahupa sidea i atas dolog anjaha ipahiri Ahu i atas ni buntu-buntu, halani ai suhatkonon-Ku do bani abingan ni sidea upah domu bani pambahenan ni sidea ai.”

⁸Sonon do hata ni Jahowa, “Songon parsahap ni halak, anggo adong ope bahni ibagas buah anggur: Ulang ambukkon in, dong ope pasu-pasu ijin, sonai do bahenon-Ku, halani juakjuak-Ku, seng parsedaon-Ku sidea ganup.” [668]

⁹Parohon-Ku do ginompar humbani Jakob, ampa sada halak sitean dolog-Ku humbani Juda; na pinilih-Ku do manean tanoh in, anjaha juakjuak-Ku marianan ijin.

¹⁰Gabe panggagatan ni biribiri do Saron, anjaha habungan Akor gabe panggompangan ni lombu bani bangsang-Ku, na pindah-pindah Bangku. [669]

¹¹Tapi hanima, sitadingkon Jahowa, na lupa bani dolog-Ku na pansing in, na parsirsirhon meja bani sisombahon Gad, anjaha na manggalangkon galangan siinumon bani sisombahon Men,

¹²ondoskonon-Ku do hanima bani podang, anjaha ganup hanima maningon tunduk i panayatan; halani sanggah dilo-dilo Ahu, seng marbalos hanima, sanggah marsahap Ahu, seng itangihon hanima, tapi ihorjahon hanima do sogam ni uhur-Hu, anjaha ipilih hanima na so Huharosuhkon. [670]

¹³Halani ai sonon do hata ni Tuhan Jahowa, “Tonggor ma, mangan do juakjuak-Ku, tapi loheian do hanima, tonggor ma, minum do juakjuak-Ku, tapi horahan do hanima; tonggor ma, marmalas ni uhur do juakjuak-Ku, tapi bador do hanima. [671]

¹⁴Tonggor ma, marolob-olob do juakjuak-Ku halani malas ni uhurni, tapi hanima tangis ma halani horu ni uhur, anjaha doruh-doruh halani uhur na maseda.”

¹⁵Tadingkononnima ma gorannima bani halak na Hupilih gabe hata sipakeion mamurai, “Sai ibunuh Tuhan Jahowa ma ho songon sidea.” Tapi anggo juakjuak-Ku diloon do sidea marhitei goran na legan, [672]

¹⁶ase atap ise na mamasu-masu dirini i tanoh on, pasu-pasuonni ma dirini marhitei Naibata na sintong in, anjaha atap ise na marbija i tanoh on, marhitei goran ni Naibata na sintong in ma ia marbija; halani domma lupa humbagas uhur hasosakan na dob salpu, anjaha lingod ai humbani matang-Ku. [673]

¹⁷ Tongon, tonggor ma, Ahu manompa langit na baru pakon tanoh na baru, anjaha seng be ingaton na parlobei in, barang puho ibagas uhur. [674]

¹⁸Tapi marmalas ni uhur anjaha marolob-olob ma hanima ronsi sadokah ni dokahni marhitei na Hutompa ai; ai tonggor ma, Ahu do manompa Jerusalem gabe parolob-oloban, anjaha bangsa pangisini gabe malas ni uhur. [675]

¹⁹Marolob-olob do Ahu mangidah Jerusalem, anjaha marmalas ni uhur mangidah bangsang-Ku, seng tarbogei be ijai sora na tangis-tangis, atap sora na doruh-doruh. [676]

²⁰Seng dong be ijai dakdanak siotik umur, atap na matua na so gok ari-ari ni goluhni; ai dakdanak ope na matei saratus tahun umurni, anjaha pardousa iuhum bani na marumur saratus tahun. [677]

²¹Pajongjongon ni sidea do rumah anjaha iiankon, suanon ni sidea do hayu anggur anjaha ipangan buahni. [678]

²²Seng pajongjong rumah sidea, gabe halak na legan mangiankon, seng manuan sidea, gabe halak na legan mangankon. Songon umur ni hayu, sonai do umur ni bangsang-Ku, anjaha na Hupilih ai, panganon ni sidea do na hinalojahon ni tanganni. [679]

²³Seng soya-soya sidea marhorja, seng tubuhan anak ase podas matei; ai ginompar pinasu-pasu ni Jahowa do sidea, anjaha ginomparni rap do pakon sidea.

²⁴Lape sidea mardilo domma Hubalosi, marsahap ope sidea domma Hutangihon. [680]

²⁵Sorigala pakon anak ni biribiri rap manampal; singa manggagat na sinabi songon lombu, anjaha ulog mangankon orbuk; seng dong be na manjahati atap na parsedahon bani sab dolog-Ku na pansing in, nini Jahowa. [681]