Read Batak Simalungun JESAYA 66 Bible Online

JESAYA 66 - Batak Simalungun bible

JESAYA 66

¹Sonon do nini Jahowa, “Langit ai do paratas-Hu, tanoh sidogeian ni nahei-Hu. Rumah na sonaha do na sihol paulionnima in Bangku, anjaha aha do in ianan parsaranan-Kin?” [682]

²Ganupan in tangan-Ku do manjadihon, gabe tarjadi ganupan in, nini Jahowa. Tapi bani halak sisonon do Ahu marpanatap: Bani halak na madoyuk ampa partonduy na maropuk anjaha na hitir-hitir mambogei hatang-Ku. [683]

³Halak na manayat lombu, doskon na mamunuh jolma do ai, halak na manggalangkon biribiri, doskon na manampul baliang do ia ijai; halak na manggalangkon galangan sipanganon, doskon na manggalangkon daroh ni babuy do ia ijai; atap halak na manutung dahupa, doskon na mamuji sisombahon do ia ijai. Tongon, marsitohu dalanni bei do halak on, anjaha iharosuhkon uhur ni sidea do mangkorjahon sihagigihononkon. [684]

⁴Ahu pe harosuhkonon-Ku do pangarsikon bani sidea, parohon-Ku do bani sidea na hinabiaranni; ai sanggah dilo-dilo Ahu, seng dong na marbalos, sanggah marsahap Ahu, seng dong na manangihon, tapi lambin ibahen sidea do na jahat i lobei-Hu, anjaha ihamegahkon na so Huharosuhkon. [685]

⁵Tangar ma hata ni Jahowa, hanima na hitir mambogei hata-Ni, “Saninanima, na mardomdom mangidah hanima, na padarat hanima halani goran-Ku mangkatahon, ʻIpasangap Jahowa ma diri-Ni, ase ididah hanami malas ni uhurnima!ʼ Tapi sidea ai, ningon bador do. [686]

⁶Tangar, sora na lutu roh hun huta in! Tangar, sora hun rumah panumbahan! Ai ma sora ni Jahowa, na mandalankon pambalason bani munsuh-Ni.

⁷Paima mangarou ia, domma itubuhkon anak, lape maborit iahapkon, domma itubuhkon anak dalahi.

⁸Ise na dob ongga mambogei na sonai ai? Ise na dob ongga mangidah na sonai ai? Boi do sada nagori tubuh ibagas sadari? Boi do hana sada bangsa ibagas na tongkin? Tapi anggo Sion, tongkin ni in mangarou, mintor itubuhkon do anak.

⁹Mintor ungkabon-Ku ma partapaan, anggo lang paturuton-Ku tubuh? nini Jahowa. Mintor Ahu ma, na dob paturutkon tubuh, manutup ai use? nini Jahowa. [687]

¹⁰Marmalas ni uhur ma hanima rap pakon Jerusalem, anjaha marolob-olob ma mangidahsi, ganup hanima na marholong ni uhur bani! Marmalas ni uhur tumang ma hanima rap pakonsi, ganup hanima na marpusok ni uhur mangidahsi hinan. [688]

¹¹Ai boi ma hanima mangonsop anjaha bosur humbani bagod ni pangapoh ai, ai boi ma hanima minum sombuh anjaha marmegah-megah humbani hasangaponni na tarlobih ai. [689]

¹²Ai sonon do hata ni Jahowa, “Tonggor ma, Ahu patuduhkon hadoharon bani, songon bah mardalan bueini, ampa habayakon ni bangsa parbegu, songon binanga na marbanggal; minum ma hanima, abing-abingonni do hanima anjaha titeng-titengonni.” [690]

¹³ Songon halak na niapoh ni inangni, sonai do apohon-Ku hanima; maningon apohon do hanima i Jerusalem.

¹⁴Idahonnima ma ai, gabe malas ma uhurnima, hisar ma holi-holinima songon bulung-bulung maratah; jadi botohon ni halak ma, tangan ni Jahowa do mangkasomani juakjuak-Ni, tapi ringis-Ni do mangimbang munsuh-Ni.

¹⁵Ai tonggor ma, na roh do Jahowa marhitei apuy, anjaha gareta-Ni songon haba-haba, laho marlulu ibagas gajag ni gila-Ni, anjaha asup-asup-Ni marhasoman jirlam ni apuy. [691]

¹⁶Ai marhitei apuy do Jahowa manguhumi tanoh on, anjaha marhitei podang sagala daging; buei do na binunuh ni Jahowa.

¹⁷Halak na papansing ampa na manguras dirini, na manggalang ibagas pohon, na mangirikkon sada halak na i tongah-tongah ai, halak na mangankon gulei babuy, sihagigihononkon ampa ubag, maningon do bois ganup, nini Jahowa. [692]

¹⁸Ai Hutanda do horja ampa pingkiran ni sidea; anjaha roh do Ahu laho patumpuhon sagala bangsa ampa sahap; jadi roh ma sidea, anjaha idahonni ma hasangapon-Ku. [693]

¹⁹Anjaha pajongjongon-Ku ma sada tanda bani sidea; humbani sidea, na dob maluah ai, paingkaton-Ku do marayak bangsa sipajuh begu-begu, hu Tarsis, hu Put ampa Lud, sisintak sior, hu Tubal pakon Javan, hubani pulou na madaoh, na so ongga mambogei hatang-Ku atap mangidah hamuliaon-Ku; baritahonon ni sidea do hamuliaon-Ku i tongah-tongah ni bangsa-bangsa. [694]

²⁰Jadi boanon ni sidea ma saninanima humbani sagala bangsa-bangsa gabe galangan bani Jahowa, roh mangajak huda, margareta, martandu, mangajak halode ampa unta, marayak Jerusalem, dolog-Ku na ma pansing in, nini Jahowa, usih songon Israel, mamboan galangan sibere-bere ibagas pinggan na ma pansing hu rumah ni Jahowa. [695]

²¹Anjaha humbani sidea pe pabangkiton-Ku do gabe malim ampa halak Levi, nini Jahowa. [696]

²²Ai songon langit na baru pakon tanoh na baru sitompaon-Kai, jonam jongjong i lobei-Hu, nini Jahowa, sonai do totap jongjong ginomparnima ampa gorannima. [697]

²³Jadi masa ma bani ganup poltak ni bulan, bani ganup ari Sabat, roh ma sagala na manggoluh manombah hu lobei-Hu, nini Jahowa.

²⁴ Jadi luar ma sidea, mangidah bangkei ni halak na manlawan dompak Ahu; ia gilok-gilok ni sidea seng matei, anjaha apuy ni sidea seng mintop, anjaha gabe hagigi do sidea bani sagala na manggoluh.” [698]