Read Batak Simalungun JESAYA 7 Bible Online

JESAYA 7 - Batak Simalungun bible

JESAYA 7

¹Sanggah panorang ni si Ahas, anak ni si Jotam, anak ni si Usia raja ni Juda, tangkog ma si Resin, raja ni Aram pakon si Pekah, anak ni si Ramalya, raja ni Israel hu Jerusalem laho marporang, tapi seng tartaluhon sidea huta ai. [71]

²Jadi dob ibaritahon halak bani ginompar ni si Daud, “Domma sariah halak Aram pakon halak Efraim, gabe hitir ma uhurni pakon uhur ni bangsani, songon hayu harangan na nidugur ni logou.

³Jadi nini Jahowa ma dompak si Jesaya, ʻLaho ma ho manjumpahkon si Ahas, rap pakon anakmu si Sear-Jasub, hu ujung ni dalan ni bah na hun bongbongan parhuluan ai dompak dalan hu ladang panjomuran ai.ʼ [72]

⁴Hatahon ma hu bani, ʻMarjaga-jaga ma ho, nalom maruhur, ulang ho mabiar, anjaha ulang ma galek uhurmu mangidah sipu-sipu na dua na martimus ai, mangidah parringis ni si Resin, halak Aram ampa anak ni si Remalya.ʼ [73]

⁵Halani na jahat iuhurhon halak Aram, halak Efraim ampa anak ni si Remalya dompak ho, nini,

⁶“Laho ma hita tangkog hu Juda, parsirak hita ma ai, anjaha taban hita banta anjaha pabangkit hita ma si Tabel gabe raja i tongah-tongah ni sidea,

⁷tapi sonon do hata ni Tuhan Jahowa, ʻSeng anjai jadi ai, seng saud ai.ʼ

⁸Tapi Damaskus do pamatang ni Aram, anjaha si Resin kopala ni Damaskus. (Onom puluh lima tahun nari masarsar ma Efraim, seng be sada bangsa) [74]

⁹Anjaha Samaria do pamatang ni Efraim, anjaha anak ni si Remalya kopala ni Samaria. Anggo seng porsaya hanima, seng anjai totap hanima.” [75]

¹⁰Dob ai nini Jahowa ma use bani si Ahas,

¹¹“Pindo ma bam sada tanda humbani Jahowa Naibatamu, hun nagori toruh na bagas, atap hun datas humbani ianan na gijang.

¹²Tapi nini si Ahas ma, ʻSeng mangindo ahu, anjaha seng ra ahu manlajou Jahowa.ʼ

¹³Dob ai nini ma, ʻTangar ma ale ginompar ni si Daud! Maotiktu do pangahapnima manlajou jolma, gabe sihol lojaannima age Naibatangku?ʼ

¹⁴Halani ai bereon ni Tuhan sandiri ma bannima sada tanda, ʻTonggor ma, boratan rumah ma sada anak boru, anjaha tubuhkononni ma sada anak, anjaha bahenonni ma goranni: Immanuel.ʼ [76]

¹⁵Mantega pakon manisan do sipanganonni, paima ibotoh manulak na jahat ampa mamilih na madear. [77]

¹⁶Tongon, paima ibotoh manulak na jahat ampa mamilih na madear, tarulang ma nagori ni raja na dua ai, hinabiaranmu sonari.” [78]

¹⁷Parohon ni Jahowa do bam ampa bani bangsamu ampa bani ginompar ni bapamu panorang na so ongga masa dob sirang Efraim hun Juda ai ma marhitei Raja Assur. [79]

¹⁸Jadi masa ma bani ari ai: Diloon ni Jahowa ma lanog hun topi ni Bah Masir pakon lobah hun Nagori Assur. [80]

¹⁹Marrohan ma ai anjaha sogop ganup bani lombang na tungkis ampa bani rigat-rigat ni dolog batu, bani sagala duri-duri ampa bani sagala sampalan.

²⁰Bani panorang ai, rasipon ni Jahowa ma marhitei rasip na sinewa hun dipar ni Bah Eprat (ai ma raja ni Assur) ulu ai ampa ambulu ni nahei, anjaha buaton ni ai do age jambek.

²¹Jadi masa ma bani panorang ai, sada halak marmahan pitah sada lombu ampa dua hambing;

²²anjaha halani buei ni dadih na binereni, ipangan ma mantega; tongon, mantega ampa manisan do ipangan sagala na tading bani nagori ai.

²³Jadi masa ma bani panorang ai, sagala tanoh na adong ijai, saribu kambona hayu anggur, na marharga saribu pirak, salih ma gabe galunggung hatubuhan ni duri-duri ampa suga-suga.

²⁴Roh ma halak hujai marsior pakon marpanah, halani duri-duri ampa suga-suga do manggoki tanoh in.

²⁵Anjaha sagala dolog-dolog, na sinangkul hinan, seng be idohori halak halani biarni bani duri-duri ampa suga-suga; jadi gabe panggagatan ni lombu ampa sirojaton ni biribiri ma tanoh in.”