Read Batak Simalungun JESAYA 8 Bible Online

JESAYA 8 - Batak Simalungun bible

JESAYA 8

¹Dob ai nini Jahowa ma hu bangku, “Buat ma bam batu panuratan na bolag, suratkon ma hujai marhitei surat ni jolma: Bani si Podas-manrampas Doras-manaban.”

²Jadi hubuat ma bangku saksi hatengeran, ai ma Malim Uria pakon si Sakaria, anak ni si Jeberekya. [81]

³Jadi hudohori ma nabi naboru ai, gabe boratan rumah ma ia, anjaha itubuhkon ma sada anak dalahi. Jadi ihatahon Jahowa ma hu bangku, “Bahen ma goranni Mahersalal-hasbas (Podas-manrampas Doras-manaban);

⁴ai paima ibotoh anak ai mangkatahon, ʻBapa! inang!ʼ Usungon ni halak ma habayakon ni Damaskus ampa taban-taban na hun Samaria hulobei ni Raja Assur.” [82]

⁵Dob ai iulaki Jahowa ma marsahap hu bangku, sonon,

⁶“Halani mapas bangsa on bani Bah Siloa na nanget mardalan, anjaha gobir ia bani si Resin ampa bani anak ni si Remalya, [83]

⁷halani ai parohon ni Tuhan ma bani sidea Bah Eprat na gogoh anjaha na banggal ai, ai ma Raja Assur pakon sagala balani; sampur ma ai bani sagala bondarni anjaha salpuanni do sagala topini.

⁸Masukanni ma tanoh Juda, marbanggal ma ai mabaor pala das bani borgok, anjaha habongni na pinaherbangni ai do manggoki tanohmu, o Immanuel.” [84]

⁹Botoh ma ai, ale bangsa-bangsa anjaha gobir ma; tangar hanima ma, ale tanoh na daoh, gonditi hanima ma dirinima anjaha gobir ma. (Ps. 2)

¹⁰Manriahi ma hanima, tapi seng saud ai, bahen hanima ma ranggian, tapi seng jadi ai, ai Naibata do hasomannami. [85]

¹¹Sonon do hata ni Jahowa bangku, sanggah na ijoroti tangan-Ni ahu, anjaha ipalumba ahu ulang mardalan bani dalan ni bangsa on, nini,

¹²“Ulang ma hatahon hanima partahian bani haganup na hinatahon ni bangsa on partahian, anjaha bani na hinabiaran ni sidea ulang ma hanima mabiar, anjaha ulang gobir.

¹³Jahowa Zebaot, Ia ma na ma pansing bannima, Ia ma sihabiarannima anjaha bani ma hanima hitir-hitir. [86]

¹⁴Ia do ianan na ma pansing, batu partolsuan pakon batu gingging, pargompangan bani haduasi ginompar ni Israel, tirangkap pakon siding bani na marianan i Jerusalem. [87]

¹⁵Buei ma na tartolsu humbani sidea, madabuh anjaha mapuntar, hona siding anjaha tartangkap. [88]

¹⁶Simpan ma hasaksian in, tartokan ma in ibagas susianku! [89]

¹⁷Tapi mangarap do ahu bani Jahowa, na dob mamonopkon bohi-Ni humbani ginompar ni si Jakob, Ia do hupaima-ima.

¹⁸Tonggor ma, ia ahu ampa dakdanak na binere ni Jahowa bangku, tanda ampa tuduh-tuduh do hanami bani Israel, humbani Jahowa Zebaot, na marianan i Dolog Sion.” [90]

¹⁹Anggo ihatahon sidea bannima, “Sungkun ma paniaran ampa partondung, si parhusip ampa si partabas! Ai lang patut sungkunon ni sada bangsa naibatani, anjaha marpanungkun ia bani na dob matei, halani jolma na manggoluh? [91]

²⁰Titah pakon hasaksian ni Jahowa do sisungkunon! Anggo lang romban hubani hata on ihatahon sidea, seng dong be idahon ni sidea na siang, [92]

²¹mawat-awat mando sidea, marhasunsahan anjaha loheian; halani loheian sidea marah ma sidea anjaha ipapai rajani ampa Naibatani. [93]

²²Itarei dompak datas, ikawahkon hu tanoh, tonggor ma, hasosakan ampa golap, na lotir ampa hamarsikon, bani hagolapan do sidea iambukkon.” [94]

²³Tongon, seng lanjar golap nagori na hona odoh-odoh in! Songon na pinaroh ni Jahowa sapari habadoron bani tanoh Sebulon ampa tanoh Naftali, sonai do bani panorang na sihol roh bereon-Ni hasangapon bani dalan na dompak laut, tanoh na i dipar ni Bah Jordan, ampa bani tanoh ni sipajuh begu-begu. [95]