Read Batak Simalungun 3 MUSA 10 Bible Online

3 MUSA 10 - Batak Simalungun bible

3 MUSA 10

¹Ia si Nadab ampa si Abihu, anak ni si Aron ai, ibuat sidea ma pardahupaan ni sidea, inahkon sidea ma apuy hubagas ai, ibahen homa dahupa hu atas ni ai, anjaha igalangkon sidea ma apuy sileban i lobei ni Jahowa, na so ongga pinarentahkonni bani sidea.

²Jadi luar ma apuy hun lobei ni Jahowa, lanjar iboiskon ma sidea, gabe matei ma sidea i lobei ni Jahowa. [56]

³Nini si Musa ma hubani si Aron, “On ma da na hinatahon ni Jahowa hinan, bani halak na mandohori Ahu patalaron-Ku do hapansingon-Ku, anjaha bani sagala bangsa in pasangapon-Ku do goran-Ku.” Jadi sip ma si Aron. [57]

⁴Idilo si Musa ma si Misael ampa si Elsapan anak ni si Usiel, amang anggi ni si Aron, nini ma hubani sidea, “Padohor hanima ma hujon, usung hanima ma saninanima in humbani ianan na pansing in, hu darat ni parsaranan in.” [58]

⁵Jadi ipadohor sidea ma, lanjar iusung ma sidea marpakean hu darat ni parsaranan ai, songon na pinarentahkon ni si Musa.

⁶Nini si Musa ma hubani si Aron pakon hubani si Eleasar ampa si Itamar, anakni ai, “Ulang ma janggai ulunima, anjaha ulang ma parrigat pakeannima, ase ulang matei hanima anjaha ulang sogop ringisni bani ganup kuria in; tapi anggo saninanima, ai ma haganup halak Israel, boi do sidea tangis halani apuy na dob pinagara ni Jahowa. [59]

⁷Anjaha ulang ma luar hanima hun labah ni lampolampo partumpuan in, ase ulang matei hanima, ai bannima do minak paminakion ni Jahowa.”Jadi ibahen sidea ma songon na hinatahon ni si Musa ai.

⁸Jadi nini Jahowa ma hubani si Aron,

⁹“Ulang ma inum hanima anggur atap siinumon na koras pe, ho ampa anakmu na rap pakon ho ai, sanggah na masuk hanima hubagas lampolampo partumpuan in, ase ulang matei hanima; gabe aturan na totap ma in bennima marsundut-sundut. [60]

¹⁰Maningon botohonnima do mambotoh manirang na mapansing humbani na so pansing, na butak humbani na so butak,

¹¹anjaha maningon ajarhononnima do bani halak Israel sagala paraturan na hinatahon ni Jahowa bani sidea marhitei si Musa.”

¹²Dob ai nini si Musa ma hubani si Aron ampa hubani si Eleasar pakon si Itamar, anakni na tading, “Buat hanima ma galangan sipanganon in, na tading humbani galangan apuy bani Jahowa, anjaha pangan hanima ma in lang marantup na migar i lambung ni anjapanjap ai, ai na pansing tumang do in.

¹³Pangan hanima ma ai bani ianan na mapansing, ai parbagiananmu ampa parbagianan ni anakmu do in, humbani galangan apuy bani Jahowa, ai sonai do iparentahkon bangku. [61]

¹⁴Tapi tonton ai, na tinatang ai ampa hae-hae lobei ni galangan sitatangon ai, bani ianan na susi ma pangan hanima ai, ho rap pakon anakmu, ampa borumu, ai ibere do ai gabe parbagianan bam ampa bani anakmu, humbani galangan pardameian ni bangsa Israel. [62]

¹⁵Ia hae-hae na ginalangkon ai ampa tonton na tinatang ai maningon boanon do ai rap pakon taboh-taboh ni galangan apuy ai, laho manatang ai songon galangan sitatangon i lobei ni Jahowa; anjaha gabe parbagianan ma ai bam ampa anakmu tongtong, songon na pinarentahkon ni Jahowa bangku.”

¹⁶Sanggah na pindah-pindah ai si Musa bani hambing tunggal galangan pardousaon ai, tonggor ma, domma mosog ai. Jadi manggila ma ia bani si Eleasar ampa bani si Itamar, anak ni si Aron na tading ai, nini ma,

¹⁷“Mase ma lang ipangan hanima galangan pardousaon in bani ianan na mapansing in, ai na mapansing tumang do in, anjaha domma iberehon bennima, laho mambuat hajahaton ni kuria in, laho mambahen pardearan bani sidea i lobei ni Jahowa?

¹⁸Tonggor ma, seng saud iboan darohni ai hubagas ianan na mapansing ai. Maningon ibagas ianan na mapansing ai do ai patut panganonnima, songon na huparentahkon ai.” [63]

¹⁹Jadi nini si Aron ma hubani si Musa, “Tonggor ma, domma igalangkon sidea sadari on galangan pardousaon ampa galangan situtungon ni sidea i lobei ni Jahowa; anjaha domma mangonai bangku na sonai ai. Anggo porini hupangan humbani galangan pardousaon ai sadari on, marosuh do Jahowa nani pasal ai?”

²⁰Jadi dob ibogei si Musa hata ai, sonang ma uhurni.