Read Batak Simalungun 3 MUSA 12 Bible Online

3 MUSA 12 - Batak Simalungun bible

3 MUSA 12

¹Dob ai nini Jahowa ma hubani si Musa,

²“Hatahon ma hubani halak Israel, anggo boratan rumah sada anak boru anjaha itubuhkon sada anak dalahi, maningon butak do ia pitu ari dokahni; songon bani panorang parroh ni pantang ni hiouni, sonai do ia butak. [69]

³Bani ari paualuhkon maningon sunaton do sibur-sibur ni dakdanak ai. [70]

⁴Tapi anggo naboru ai maningon tading ope i rumah tolu puluh tolu ari nari dokahni pasalpuhon panorang pangurasion ai hun bani; seng bulih jamahonni barang aha na mapansing, anjaha seng bulih masuk ia hubagas ianan na mapansing ai, paima gok panorang pangurasion ai.

⁵Tapi anggo naboru tinubuhkonni ai, maningon dua minggu do ia butak, songon bani panorang parroh ni pantang ni hiouni; anjaha onom puluh onom ari ope ia tading i rumah pasalpuhon panorang pangurasion ai.

⁶Ia dob salpu panorang pangurasion ai, halani anak atap boru, maningon boanonni hubani malim na bani labah ni lampolampo partumpuan ai, sada anak ni biribiri na marumur satahun, bahen galangan situtungon ampa sada anak ni asas atap sada anak ni anduhur ginti bahen galangan pardousaon, [71]

⁷ase igalangkon malim ai i lobei ni Jahowa, laho mambahen pardearan bani, ase borsih ia humbani darohni na madurus ai. On ma pasal titah bani puang-puang, na manubuhkon anak atap boru.

⁸Tapi anggo seng tarpasirsirsi sada biribiri, ibuat ma dua anak ni anduhur ginti atap dua anak ni asas, sada gabe galangan situtungon anjaha na sada nari gabe galangan pardousaon; malim ai do na mambahen pardearan bani, ase borsih ia.” [72]