Read Batak Simalungun 3 MUSA 13 Bible Online

3 MUSA 13 - Batak Simalungun bible

3 MUSA 13

¹Dob ai nini Jahowa ma hubani si Musa ampa si Aron, [73]

²“Anggo adong bani hulingkuling ni sada halak bayoh, puru barang hurap, anjaha salih ai gabe naborit gadam bani hulingkuling ni angkulani ai, maningon boanon do ia hubani si Aron, malim ai, barang hubani sahalak humbani anakni, malim-malim ai.

³Anggo domma ipareksa malim ai naborit na bani angkulani ai, anjaha domma pala mamontar ambulu bani ianan naboritan ai, anjaha holbapan na boritan ai marimbang hulingkuling na legan ai, jadi naborit gadam ma ai; anggo domma ididah malim ai sonai, patugahonni ma na dob butak do ia. [74]

⁴Tapi age pe mamontar ai bani hulingkuling ni badanni ai, tapi seng holnohan ai marimbang hulingkuling na legan ai, anjaha ambulu na ijai ai seng marubah gabe lopak, maningon hurungkonon ni malim ai ma ia pitu ari dokahni.

⁵Papitu-arihon maningon pareksaon ni malim ai do ia, anjaha anggo tong do ididah naborit ai, seng pala rarat naborit ai bani hulingkuling ai, maningon hurungkonon ni malim ai do ia pitu ari nari dokahni.

⁶Anggo domma iulaki malim mamareksasi paduahalihon bani ari papituhon, anjaha dapotsi lambin surut do ipos-iposni ai, seng lambin manrarat ai bani hulingkuling ai, jadi patugahon ni malim ai ma na borsih do ia, ai bayoh tumang do ai; tapi maningon susionni do pakeanni, jadi gabe pansing ma ia.

⁷Tapi anggo lambin manrarat do bayoh ai bani hulingkuling ai, dob roh ia patidak dirini bani malim ai laho mangidah atap na borsih do ia, maningon patidakonni do dirini paduahalihon bani malim ai;

⁸bahenon ni malim ai ma pamareksaan, anjaha anggo lambin manrarat do bayoh ai bani hulingkuling ai, jadi patugahon ni malim ai ma na butak do ia, gadam do ai.

⁹Anggo taridah tanda ni gadam bani sada jolma, maningon boanon do ia bani malim.

¹⁰Pareksaon ni malim ai ma ia, anjaha anggo adong do bayoh na malopak bani hulingkuling ai, pala gabe lopak ambulu ai ibahen, anjaha tubuh daging na so madear bani bayoh ai,

¹¹gadam na parah do na bani hulingkuling ni dagingni ai, anjaha patugahon ni malim ai ma paboa na butak do ia, seng pala be ihurungkon ia, ai domma butak ia.

¹²Tapi anggo sonon do pangonai ni gadam ai bani hulingkuling ai, itutup gadam ai do huling kuling ni halak na gadamon ai haganup, hun ulu das hu nahei, huja pe ikawahkon malim ai,

¹³jadi bahenon ni malim ai ma pamareksaan, anjaha anggo haganup do angkulani ai itutup gadam ai, patugahonni ma paboa borsih do ia humbani naborit ai, ai lopak do ai haganup, ase na borsih do ia ai.

¹⁴Tapi anggo taridah do sibuk na so dear bani, na butak do ia ai.

¹⁵Anggo domma ididah malim ai sibuk na so dear ai, patugahonni ma paboa butak do ia; ai butak do sibuk na so dear ai, ai gadam do ai.

¹⁶Tapi anggo tapu do sibuk na dear ai, anjaha gabe lopak use ai, maningon roh do ia bani malim ai.

¹⁷Pareksaon ni malim ai ma ia, anjaha anggo domma gabe lopak ipos-ipos ai, patugahon ni malim ai ma, na borsih do halak na boritan ai, ai borsih do ia tongon.

¹⁸Anggo tubuh bayoh bani hulingkuling ni sada halak, dob ai malum use,

¹⁹hape tubuh use bani ipos-iposni ai bayoh na lopak, atap hurap na malopak magerger, maningon patidakonni do ai bani malim ai.

²⁰Pareksaon ni malim ai ma ai, anjaha anggo taridah holnohan do ai humbani hulingkuling ai, anjaha domma gabe lopak ambuluni ai, jadi patugahon ni malim ai ma na butak do ia; naborit gadam do ai, na dob tubuh ibagas bayoh ai.

²¹Tapi anggo domma ipareksa malim ai ia, anjaha jumpahsi ambulu na ijai ai seng lopak anjaha seng holnohan humbani hulingkuling na legan ai, tapi lambin surut do, jadi hurungkonon ni malim ai ma ia pitu ari dokahni;

²²anjaha anggo manrarat do ai bani hulingkuling ai, jadi patugahon ni malim ai ma na butak do ia, ai tanda ni gadam do ai.

²³Tapi anggo totap do hurap ai, lang lambin manrarat, ipos-ipos ni bayoh do ai; patugahon ni malim ai ma na borsih do ia. [75]

²⁴Atap anggo ugahan hulingkuling ni sada halak halani matutung, anjaha sibuk na so dear na bani na matutung ai gabe magerger malopak atap lopak,

²⁵maningon pareksaon ni malim ma ai, anjaha anggo mubah do ambulu na ijai gabe lopak, anjaha taridah holnohan do ai marimbang hulingkuling na legan ai, jadi gadam ma ai tongon, na dob tubuh bani ugah na matutung ai, anjaha patugahon ni malim ai ma na butak do ia; naborit gadam do ai.

²⁶Tapi anggo domma ipareksa malim ai ia, anjaha ia ambulu na bani ianan ai seng lopak anjaha seng holnohan ai taridah marimbang hulingkuling na legan ai, anjaha lambin surut do ai, maningon hurungkonon ni malim ai do ia pitu ari dokahni.

²⁷Bani ari papituhon pareksaon ni malim ai ma ia; anggo lambin manrarat do ai bani hulingkuling ai, jadi patugahon ni malim ai ma na butak do ia; naborit gadam do ai.

²⁸Tapi anggo totap do hurap ai, seng lambin manrarat bani hulingkuling ai, anjaha lambin surut do ai, ugah halani matutung ai do ai, anjaha patugahon ni malim ai ma na pansing do ia; ipos-ipos ni na matutung ai do hansa ai. [76]

²⁹Anggo adong rutu bani sada dalahi atap naboru, bani uluni atap bani gumisni,

³⁰maningon pareksaon ni malim ma rutu ai, anjaha anggo holnohan do taridah ai marimbang hulingkuling na legan ai, anjaha ambulu na ijai ai magorsing anjaha ranggang-ranggang, jadi patugahon ni malim ai ma na butak do ia; ai gadam do ai, gadam bani ulu atap bani gumis.

³¹Tapi anggo domma ipareksa malim ai rutu ai, anjaha taridah seng holnohan ai humbani hulingkuling na legan ai, anjaha seng dong ambulu na birong ijai, jadi hurungon ni malim ai ma ia, halak na rutuon ai pitu ari dokahni.

³²Papitu-arihon pareksaon ni malim ai ma rutu ai, anggo seng manrarat rutu ai, anjaha seng dong ambulu na gorsing ibagas ai, anjaha seng holnohan rutu ai marimbang hulingkuling na legan ai,

³³maningon suhuronni ma uluni, tapi anggo rutu ai seng bulih suhuronni; maningon hurungkonon ni malim ai ma halak na rutuon ai pitu ari nari dokahni.

³⁴Anggo domma ipareksa malim ai rutu ai papitu-arihon, anjaha jumpahsi seng lambin manrarat rutu ai bani hulingkuling ai, anjaha seng holnohan ai marimbang hulingkuling na legan ai, jadi patugahon ni malim ai ma na borsih do ia; iburihi ma pakeanni, jadi borsih ma ia.

³⁵Tapi anggo manrarat do rutu ai bani hulingkuling ai, dob ipatugah malim ai na borsih do ia,

³⁶jadi pareksaon ni malim ai ma ia, anjaha anggo manrarat do rutu ai bani hulingkuling ai, seng pala pindahan ni malim ai be atap na gorsing do jambulanni, ai na butak do ia ai.

³⁷Tapi anggo totap do rutu ai ididah matani, anjaha tubuh do jambulan na birong ijai, na dob malum do rutu ai, borsih ma ia; patugahon ni malim ai ma na dob borsih ia.

³⁸Anggo hurapon hulingkuling ni sada dalahi atap naboru, lopak idahon,

³⁹pareksaon ni malim ai ma ai, anjaha anggo seng sai lopak hurap na bani hulingkuling ni daging ai, hurap tumang do na dob tubuh bani hulingkuling ai, borsih ma ia.

⁴⁰Anggo marurus jambulan ni sada dalahi pala palpalon, borsih do ia ai.

⁴¹Anggo marurus jambulanni hampit bohini, gabe salagsagon ia, borsih do ia ai.

⁴²Tapi anggo dong tubuh bani palpalni ai atap salagsagni ai rutu malopak magerger, gadam do na dob tubuh bani palpalni ai atap na bani salagsagni ai.

⁴³Jadi pareksaon ni malim ai ma ia, anjaha anggo magerger malopak do rutu na bani palpalni atap na bani salagsagni ai, usih songon rupa ni gadam na bani hulingkuling ni daging,

⁴⁴na gadamon do ia ai, ase butak do ia; patugahon ni malim ai ma na butak do ia, bani uluni ai do naborit ai.

⁴⁵Halak na gadamon, na marnaborit gadam ai, maningon mamakei baju rigat-rigat do ia, jambulanni jangga-jangga, gumisni maningon tutuponni anjaha dilohononni, ʻNa butak, na butak!ʼ

⁴⁶Sadokah adong bani naborit ai butak do ia, butak do ia ai tongon, anjaha maningon punjung do ia marianan i darat ni parsaranan ai. [77]

⁴⁷Anggo adong tanda-tanda ni naborit gadam jumpah bani hiou, pakean wol pe ai atap pakean linnen,

⁴⁸atap bani parugas na tinonun atap na pinauli, humbani linnen pe ai atap humbani wol, atap bani hulingkuling atap bani parugas-parugas na pinauli humbani hulingkuling,

⁴⁹anggo tar maratah atap magerger do na bani hiou ai, na bani parugas-parugas na tinonun atap na pinauli ai, na bani hulingkuling ai atap na bani parugas-parugas na humbani hulingkuling ai, naborit gadam do ai, anjaha maningon patidakon do ai hubani malim ai.

⁵⁰Pareksaon ni malim ma naborit ai, anjaha maningon simpanon do ugas-ugas na hona ai pitu ari dokahni, anjaha maningon pareksaonni ma naborit ai bani ari papituhon.

⁵¹Anggo ididah bani ari papituhon lambin manrarat do naborit ai bani pakean ai, atap bani parugas na tinonun atap na pinauli ai, atap bani hulingkuling ai, bani sagala na pinauli humbani hulingkuling tene, jadi naborit gadam na bajan do ai, butak do ai.

⁵²Maningon tutungonni do pakean ai, atap pe parugas na tinonun atap na pinauli ai, humbani wol pe ai atap humbani linnen, atap pe haganup parugas na humbani hulingkuling ai, na dob hona naborit ai, ai naborit gadam na parah do ai; maningon tutungon do ai.

⁵³Tapi anggo ididah malim ai, hape seng manrarat naborit ai bani pakean ai, atap bani parugas na tinonun atap na pinauli ai, atap bani parugas-parugas na humbani hulingkuling ai,

⁵⁴jadi suruhon ni malim ai ma na mamurihi ugas-ugas na ihonai naborit ai, anjaha papuligonni ma ai use pitu ari dokahni.

⁵⁵Pareksaon ni malim ai ma ugas-ugas na ihonai naborit ai dob iburihi ai. Anggo seng mubah rupani ididah, age pe seng lambin manrarat naborit ai, butak ma ai; maningon tutungonmu do ai, atap hampit pudi atap hampit lobei pe na ihonai naborit ai.

⁵⁶Tapi anggo ididah malim ai, dob iburihi na ihonai naborit ai, lambin surut do naborit ai, maningon rigatkononni do na hona naborit ai humbani pakean ai, atap humbani parugas na tinonun atap na pinauli ai.

⁵⁷Jadi anggo tong ope taridah ai bani pakean ai, atap bani parugas na tinonun atap na pinauli ai, atap bani ugas-ugas na humbani hulingkuling ai, gadam na manrarat do ai, maningon tutungonmu do haganup, na ihonai naborit ai.

⁵⁸Tapi anggo magou do naborit ai dob hona burihan ai humbani pakean ai, atap humbani parugas na tinonun atap na pinauli ai, atap humbani ugas-ugas hulingkuling ai, maningon ulakan do mamurihi ai, jadi borsih ma ai.

⁵⁹On ma titah pasal naborit gadam na adong bani pakean wol atap linnen pe, atap bani parugas na tinonun atap na pinauli, atap bani ugas-ugas na pinauli humbani hulingkuling, laho manontuhon atap na borsih do ai atap na butak.”