Read Batak Simalungun 3 MUSA 17 Bible Online

3 MUSA 17 - Batak Simalungun bible

3 MUSA 17

¹Dob ai marsahap ma Jahowa hubani si Musa, nini ma,

²“Hatahon ma hubani si Aron ampa anakni ai, ampa hubani haganup halak Israel, on do na pinarentahkon ni Jahowa,

³Barang ise humbani ginompar ni Israel, na manayat lombu jonggi atap biribiri atap hambing ibagas parsaranan ai, atap i darat ni parsaranan ai pe,

⁴tapi seng humbani ai hu labah ni lampolampo partumpuan ai, laho manggalangkon ai gabe galangan bani Jahowa i lobei ni rumah ni Jahowa, maningon marsapata do ai bani halak ai; iuseihon do daroh, jadi jolma sisonai ai maningon siapkononkon do hun tongah-tongah ni bangsani. [109]

⁵Halani ai maningon boanon ni halak Israel do galangan ni sidea, na sihol galangkonon ni sidea i tongah dalan, hu lobei ni Jahowa, hu lobei ni lampolampo partumpuan ai, hubani malim ai, anjaha isayat ma ai gabe galangan pardameian bani Jahowa.

⁶Anjaha darohni ai ipispiskon malim ai ma ai hu anjapanjap ni Jahowa, i lobei ni labah ni lampolampo partumpuan ai, anjaha tabohni ai itutung ma ai bahen uap na misbou bani Jahowa.

⁷Seng bulih be galangkonon ni sidea galangan ni sidea bani begu-begu na niirikkon ni sidea marhitei na marsombah hujai. Gabe paraturan na totap ma in bani sidea marsundut-sundut. [110]

⁸Maningon hatahononmu do hubani sidea, ʻAtap ise pe humbani ginompar ni Israel barang humbani halak dagang, na manginsolat i tongah-tongah ni sidea, na manggalangkon galangan situtungon atap galangan sisayaton pe,

⁹na so mamboan ai hu lobei ni lampolampo partumpuan ai, laho manggalangkon ai bani Jahowa, halak na sonai ai maningon siapkononkon do hun tongah-tongah ni bangsani.ʼ [111]

¹⁰Anggo adong humbani ginompar ni Israel atap humbani halak dagang, na manginsolat i tongah-tongah ni sidea, na mangankon daroh, bohing-Ku do tujuhonon-Ku laho mangimbang halak sipangan daroh ai, anjaha siapkonon-Ku do ia hun tongah-tongah ni bangsani. [112]

¹¹Ai ibagas daroh ai do goluh ni daging ai, anjaha Hubere do ai bennima bani anjapanjap ai laho mambahen pardearan bani tonduynima; ai daroh ai do mambahen pardearan, marhitei goluh na ibagas ai. [113]

¹²Halani ai do ase Huhatahon hubani halak Israel, ise pe lang humbennima bulih mangankon daroh, sonai halak dagang na manginsolat i tongah-tongahnima seng bulih panganonni daroh.

¹³Sonai homa ganup halak Israel, age halak dagang na manginsolat i tongah-tongah ni sidea, na dapotan buruan sanggah marburu atap manuk-manuk na bulih panganon, maningon iduruskon do darohni ai anjaha irungkub ai bani tanoh,

¹⁴ai daroh ai do goluh ni sagala daging. Halani ai do ase Huhatahon hubani halak Israel, ʻSeng bulih panganonnima daroh ni atap aha pe, ai daroh ai do goluh ni sagala na mardaging; barang ise na mangankon ai, maningon siapkonon-Ku do ai.ʼ [114]

¹⁵Anjaha barang ise na mangankon na matei-matei barang na sinoroh ni binatang, atap halak parnagori ai pe ia atap panginsolat pe, maningon butak do ia ronsi bodari; dob ai pe ase borsih ia. [115]

¹⁶Tapi anggo seng isusi pakeanni barang iparidi angkulani, mangonai hubani ma hajahatonni ai.”