Read Batak Simalungun 3 MUSA 18 Bible Online

3 MUSA 18 - Batak Simalungun bible

3 MUSA 18

¹Dob ai marsahap ma Jahowa hubani si Musa, nini ma,

²“Hatahon ma hubani halak Israel, ʻAhu do Jahowa Naibatanima.ʼ

³Seng bulih bahenonnima, songon na binahen ni halak i tanoh Masir, tanoh panginsolatannima ai hinan, anjaha seng bulih bahenonnima songon na binahen ni halak i tanoh Kanaan hadasannima ai holi bahenon-Ku, seng bulih hanima marparlahou domu hubani hasomalan ni sidea. [116]

⁴Maningon horjahononnima do titah-Ku anjaha ramotkononnima paraturan-Ku anjaha marparlahou hanima ibagas ai, ai Ahu do Jahowa Naibatanima.

⁵Halani ai maningon ramotkononnima do paraturan-Ku ampa titah-Ku. Halak na mangkorjahon ai, manggoluh do marhitei ai, Ahu do Jahowa. [117]

⁶Ise pe lang humbennima bulih mandohori sindohorni na sangkan laho mangkasomanisi modom, Ahu do Jahowa.

⁷Bapamu atap inangmu seng bulih hasomananmu modom; inangmu do ia, seng bulih hasomananmu modom.

⁸Seng bulih hasomananmu modom jolma ni bapamu; ai na pabador bapamu do ho marhitei ai. [118]

⁹Seng bulih ompoanmu botoumu, boru ni bapamu atap boru ni inangmu pe ai, tubuh i rumah atap i darat pe ai, seng bulih hasomananmu ia modom. [119]

¹⁰Seng bulih ompoanmu pahompumu, na humbani anakmu atap pe na humbani borumu, ai na pabador dirimu do ho marhitei ai.

¹¹Seng bulih ompoanmu boru ni jolma ni bapamu, na dob tubuh humbani bapamu, ai botoumu do ia, seng bulih hasomananmu ia modom.

¹²Seng bulih ompoanmu namborumu, ai sisada daroh do ia ampa bapamu.

¹³Seng bulih ompoanmu sanina ni inangmu, ai sisada daroh do ia ampa inangmu.

¹⁴Seng bulih butakanmu podoman ni sanina ni bapamu, marhitei na mandohori jolmani modom, ai inangmu do ia.

¹⁵Seng bulih ompoanmu parumaenmu, ai jolma ni anakmu do ia, seng bulih hasomananmu ia modom. [120]

¹⁶Seng bulih hasomananmu modom jolma ni saninamu, ai na pabador saninamu do ho marhitei ai. [121]

¹⁷seng bulih ompoanmu sada naboru rap pakon boruni; anjaha seng bulih buatonmu boru ni anakni ai atap boru ni boruni ai bahen jolmamu, ai sisada daroh do hanima; habadoron banggal do ai. [122]

¹⁸Seng bulih buatonmu gabe jolmamu sanina ni na binuatmu, laho mangkasomanisi modom, sadokah manggoluh ope ia.

¹⁹Seng bulih dohoranmu sada naboru, laho mangkasomanisi modom, sanggah roh pantang ni hiouni. [123]

²⁰Seng bulih hasomananmu modom jolma ni hasomanmu, gabe butak ho marhiteihonsi. [124]

²¹Seng bulih ondoskononmu age sahalak humbani ginomparmu, laho manggalangkon ai bani Molok, ase ulang gabe butak ibahen ho goran ni Naibatamu, Ahu do Jahowa [125]

²²Seng bulih parjolmaonmu dalahi songon naboru, ai hagigi do ai. [126]

²³Seng bulih ho saor hubani pinahan aha pe ai, gabe butak do ho marhitei ai. Anjaha naboru pe seng bulih bereonni dirini bani pinahan laho marsaor pakon ai; hagigi do ai. [127]

²⁴Seng bulih butakonnima dirinima marhitei haganupan ai, ai marhitei na sonai ai do ipabutak bangsa sipajuh begu-begu dirini, ai ma siusironkai i lobeinima.

²⁵Marhitei ai gabe butak ma tanoh ai, jadi mangonai uhum ma Ahu halani hajahatonni ai, ase iutahkon tanoh ai pangisini ai.

²⁶Halani ai ramotkon hanima ma paraturan-Ku ampa titah-Ku anjaha ulang ma ihorjahon hanima age aha pe humbani hagigi ondi, pangisi ni tanoh ai pe, age halak dagang na marianan i tongah-tongahnima,

²⁷ai haganup hagigi ondi, domma ihorjahon pangisi ni tanoh ai hinan, ai ma na parlobei humbennima, gabe butak tanoh ai ibahen.

²⁸Ase ulang dihut hanima iutahkon tanoh ai, halani dihut hanima mambutaki tanoh ai, songon na dob niutahkonni bangsa parbegu na parlobei humbennima.

²⁹Ai barang ise na mangkorjahon sada gelah humbani hagigi ondi, maningon siapkononkon do hosahni hun tongah-tongah ni bangsani.

³⁰Halani ai ramotkon hanima ma paraturan-Ku, ai ma na so bulih horjahononnima humbani adat na masambor ai, ai ma na dob hinorjahon hinan i lobeinima, gabe butak hanima halani ai; Ahu do Jahowa Naibatanima.”