Read Batak Simalungun 3 MUSA 19 Bible Online

3 MUSA 19 - Batak Simalungun bible

3 MUSA 19

¹Dob ai marsahap ma Jahowa hubani si Musa, nini ma,

²Hatahon ma hubani ganup tumpuan ni halak Israel, “Maningon pansing do hanima, ai pansing do Ahu, Jahowa, Naibatanima. [128]

³Ganup hanima maningon mabiar do bani inangni ampa bani bapani anjaha maningon ramotkononnima do ari Sabat-Ku, ai Ahu do Jahowa, Naibatanima. [129]

⁴Seng bulih dompakkononnima gana-gana anjaha seng bulih paulionnima bennima naibata tuangan, ai Ahu do Jahowa, Naibatanima. [130]

⁵Anjaha anggo igalangkon hanima galangan pardameian bani Jahowa, maningon sintong do panggalangkononnima ijai, ase gabe harosuh hanima. [131]

⁶Maningon panganonnima do ai bani ari ai sanggah igalangkon hanima ai ampa patarni ai; anjaha sagala na tading ronsi ari patoluhon maningon tutungon do ai ibagas apuy. [132]

⁷Anggo ipangan ope hunjai bani ari patoluhon, hagigi do ai, seng tarharosuhkon ai.

⁸Barang ise na mangankon hunjai, mangonai ma bani hajahatonni ai, halani na binutakanni ai na pinapansing ai bani Jahowa, anjaha maningon rotapkonon do hosahni hun tongah-tongah ni bangsani.

⁹Anggo ipariamai hanima ladangnima, ulang ma bois ipariamai hanima jumanima das hu duruni, anjaha ulang be ituriangi hanima panabiannima ai. [133]

¹⁰Anjaha pohon anggurnima pe ulang ma bois-bois ibuat hanima, anjaha ulang ma tangtangi hanima pohon anggurnima, paturut hanima ma ai bani halak na miskin ampa bani halak panginsolat; Ahu do Jahowa, Naibatanima.

¹¹Seng bulih hanima manangko, barang marladung, barang marsioto-otoan. [134]

¹²Seng bulih hanima mambijahon na so tongon marhitei goran-Ku, gabe butak ibahen hanima marhitei ai goran ni Naibatanima ai Ahu do Jahowa. [135]

¹³Seng bulih odoh-odohonmu barang rampokonmu hasomanmu. Upah ni halak siparombou seng bulih tahan-tahanonmu ronsi patarni. [136]

¹⁴Seng bulih buraanmu halak na nengel anjaha seng bulih nahkononmu parjombaan i lobei ni halak na mapitung, tapi maningon habiaranmu do Naibatamu, ai Ahu do Jahowa. [137]

¹⁵Seng bulih papeolonnima uhum i paruhuman; seng bulih martonggor jumbak, halak na masombuh idoruni, ia halak na sangap iapiti; maningon pintor do panguhummu bani hasomanmu. [138]

¹⁶Seng bulih ho manukas-nukasi i tongah-tongah ni bangsamu, anjaha seng bulih ho jongjong marsaksi dompak daroh ni hasomanmu, ai Ahu do Jahowa.

¹⁷Seng bulih ho mardomdom bani hasomanmu ibagas uhurmu; maningon pasingatonmu do hasomanmu, ase ulang mardousa ho halani ia. [139]

¹⁸Seng bulih balaskononmu na jahat, barang mardomdom ho bani anak ni hasomanmu sabangsa, tapi maningon haholonganmu do hasomanmu jolma doskon dirimu, ai Ahu do Jahowa. [140]

¹⁹Maningon ramotkononnima do paraturan-Ku: Seng bulih paturutonmu pinahanmu marboru-boru pakon pinahan na legan masam; seng bulih mardua masam bonih saburhononmu bani jumamu, anjaha seng bulih pakeionmu pakean na pinauli humbani dua masam bonangni. [141]

²⁰Anggo ihasomani sada dalahi modom sada naboru, jabolon ope ia ai, anjaha domma martunangan bani dalahi na legan, tapi lape hona tobus barang ipaluah ia, maningon uhumon do sidea; tapi seng marutang hosah sidea, halani na so maluah ai ope ia.

²¹Maningon boanon ni dalahi ai do sada biribiri tunggal bani Jahowa hu lobei ni lampolampo partumpuan ai, bahen galangan parsalahan,

²²anjaha malim ai na mambahen pardearan bani i lobei ni Jahowa marhitei biribiri tunggal, galangan parsalahan ai, halani dousa na binahenni ai; jadi sasap ma dousa na hinorjahonni ai. [142]

²³Ia dob masuk hanima hu tanoh ai, anjaha isuan hanima ijai bagei-bagei ni hayu marbuah na boi sipanganon, bahen hanima ma bani buahni songon na bani sibur-sibur; tolu tahun dokahni songon na marsibur-sibur ma ai hira hanima, seng bulih panganonnima ai.

²⁴Bani tahun paompatkon pansing ma sagala buahni ai, gabe galangan puji-pujian ma ai bani Jahowa.

²⁵Tapi palima-tahunkon bulih ma panganonnima buahni ai, ase lambin tambah buahni bennima. Ahu do Jahowa Naibatanima.

²⁶Seng bulih panganonnima atap aha pe na dob marsaor pakon daroh. Seng bulih horjahononnima partondungon atap panjahaion. [143]

²⁷Seng bulih suhuronnima ulunima lepong inggot, anjaha seng bulih ritiponnima ujung ni gumisnima. [144]

²⁸Seng bulih raokannima angkulanima halani mateian, atap ibahen hanima tanda-tanda bani badannima; Ahu do Jahowa.

²⁹Seng bulih butakanmu borumu marhitei na mangojursi gabe boru jalang, ase ulang gok parriah-riahon tanoh in, anjaha gabe gok hajahaton tanoh in.

³⁰Maningon ramotkononnima do ari Sabat-Ku, anjaha marhabiaran hanima bani ianan-Ku na mapansing in; Ahu do Jahowa.

³¹Seng bulih dompakkononnima dirinima hubani paniaran barang hubani halak sipartondung, seng bulih sungkunonnima sidea, gabe butak holi hanima marhalanihon ni sidea; Ahu do Jahowa, Naibatanima. [145]

³²Maningon jongjong do ho i lobei ni halak na ubanon, anjaha maningon pasangaponmu do halak na matua, anjaha maningon habiaranmu do Naibata; Ahu do Jahowa.

³³Anggo manginsolat sada halak dagang i lambungnima, i tanohnima, seng bulih odoh-odohonnima ia. [146]

³⁴Songon sada halak parnagori in i tongah-tongahnima, maningon sonai do age halak panginsolat i tongah-tongahnima; maningon haholonganmu do ia songon dirimu, ai halak dagang do age hanima hinan i tanoh Masir; Ahu Jahowa Naibatanima.

³⁵Seng bulih geduk pandalankonnima bani panguhumion, bani ukuran sibar-sibar, timbangan atap suhat-suhat pe. [147]

³⁶Maningon timbangan na sintong, batu timbangan na sintong, efa na sintong ampa hin na sintong do pakeionnima; Ahu do Jahowa, Naibatanima, na mambobai hanima luar hun tanoh Masir.

³⁷Halani ai ramotkon hanima ma ganup parentah-Ku ampa paraturan-Ku anjaha horjahon hanima ma domu hujai, Ahu do Jahowa.” [148]