Read Batak Simalungun 3 MUSA 2 Bible Online

3 MUSA 2 - Batak Simalungun bible

3 MUSA 2

¹“Barang ise manggalangkon galangan sipanganon bani Jahowa, maningon itak na lumat do galanganni ai; useihononni ma hujai minak anjaha nahkononni hu atasni hamonan;

²dob ai boanonni ma ai hubani anak ni si Aron, malim ai. Buatonni ma hunjai sampohul itak na lumat pakon minak ai ampa ganup hamonan ai; tutungon ni malim ai ma ai bahen galangan pardingatan i atas ni anjapanjap ai, gabe galangan apuy, uap na misbou bani Jahowa.

³Tapi na teba humbani galangan sipanganon ai, rupei ni si Aron pakon sagala anakni ai ma ai; ai ma parbagianan na pansing sahalian humbani galangan apuy bani Jahowa.

⁴Anggo sihol galangkononmu galangan sipanganon na dob ipatongka i tataring, maningon humbani itak na lumat do ai, pakon humbani kue na so niigaran marhasoman minak pakon humbani ruti na so niigaran na marlapu minak ma ai.

⁵Anggo galangan sipanganon na ginoreng i balanga do galanganmai, maningon humbani itak na lumat, na so niigaran do ai anjaha marlapu bani minak.

⁶Maningon topikanmu do ai etek-etek, anjaha useihononmu hujai minak; galangan sipanganon ma ai.

⁷Anggo galangan sipanganon na ilompa ibagas hudon do galanganmai, maningon humbani itak na lumat, marsaor minak do bahenonmu ai.

⁸Maningon boanonmu do galangan sipanganon na ipaturei humbani pulungan on hubani Jahowa; maningon boanon do ai bani malim ase ia use mamboan hu anjapanjap.

⁹Maningon buaton ni malim ai do galangan pardingatan humbani galangan sipanganon ai, anjaha maningon tutungonni do ai i atas anjapanjap ai; ai ma galangan apuy, uap na misbou bani Jahowa.

¹⁰Tapi na teba humbani galangan sipanganon ai, rupei ni si Aron pakon anakni ma ai, ai ma parbagianan na pansing sahalian humbani galangan apuy bani Jahowa.

¹¹Sagala galangan sipanganon na sihol galangkononmu bani Jahowa, seng bulih marnamigar bahenonmu; ai sagala na migar barang manisan seng bulih tutungonmu bahen galangan apuy bani Jahowa. [4]

¹²Bahen galangan limbuah boi do boanonmu ai bani Jahowa, tapi seng bulih galangkonon ai bani anjapanjap bahen uap na misbou. [5]

¹³Maningon garamonmu do ganup galangan sipanganonmu, seng bulih tartading bahenonmu garam parpadanan ni Naibatamu bani galangan sipanganonmu; maningon marhasoman garam do ganup galangkononmu galanganmu. [6]

¹⁴Anggo igalangkon ho galangan sipanganon humbani limbuah hubani Jahowa, maningon boanonmu do buyur ni omei na nirondang ibagas apuy anjaha na niduda bahen galangan sipanganon humbani limbuah. [7]

¹⁵Maningon bahenonmu minak hu atasni, anjaha maningon nahkononmu homa hamonan hu atasni; galangan sipanganon ma ai.

¹⁶Dob ai maningon tutungon ni malim ai ma galangan pardingatan humbani omei na niduda pakon humbani minak ampa haganup hamonan ai bahen galangan apuy bani Jahowa.”