Read Batak Simalungun 3 MUSA 21 Bible Online

3 MUSA 21 - Batak Simalungun bible

3 MUSA 21

¹Dob ai nini Jahowa ma hubani si Musa, “Hatahon ma hubani malim-malim, anak ni si Aron, anjaha patugah ma hubani sidea, seng bulih butakan ni malim dirini bani halak na dob matei i tongah-tongah ni bangsani, [156]

²sobali bani diha-dihani na sangkan: bani inangni, bapani, anakni, boruni, saninani,

³bani botouni na so laho ope, halani sangkan do bani; bani on boi do butakonni dirini.

⁴Bani botou na dob marhajabuan seng bulih pabutakonni dirini, gabe butak holi ia marhitei ai.

⁵Seng bulih lepongon ni malim uluni, atap iritip ujung ni gumisni, atap irariki angkulani. [157]

⁶Maningon pansing do sidea bani Naibatani, anjaha seng bulih butak bahenon ni sidea goran ni Naibata ni sidea; ai sidea do sigalangkon galangan marhitei apuy bani Jahowa, sipanganon ni Naibata ni sidea; halani ai maningon pansing do sidea.

⁷Seng bulih sidea marjolmahon boru jalang atap naboru na dob binutakan, sonai homa naboru na dob pinaulak ni dalahini seng bulih buaton ni sidea, ai pansing do malim bani Naibatani.

⁸Halani ai maningon papansingonnima do ia, ai ia do sigalangkon sipanganon bani Naibatanima; maningon pansing do ia bennima, ai na pansing do Ahu Jahowa, na papansingkon hanima.

⁹Anggo ipabutak sada boru ni malim dirini marhitei parriah-riahon, na pabador bapani do ia ai; maningon matei do ia tutungon ibagas apuy.”

¹⁰Tapi anggo sintua ni malim, ai ma kopala i tongah-tongah ni saninani, na dob iuseihon minak pamminakion ai bani uluni, na dob niuras laho mamakei pakean na mapansing ai, seng bulih jangga-jangga bahenonni uluni atap rigatanni pakeanni. [158]

¹¹Seng bulih dohoranni bangkei ni atap ise pe, age bani bapani atap inangni pe seng bulih pabutakonni dirini.

¹²Seng bulih luar ia humbani ianan na mapansing in, ase ulang gabe butak ibahen ianan na mapansing ni Naibatani, ai domma bani minak pamminakion ni Naibatani; Ahu do Jahowa. [159]

¹³Maningon anak boru do sibuatonni gabe jolmani.

¹⁴Naboru na mabalu, atap na dob sinirangkon, atap na dob binutakan atap boru jalang, seng bulih buatonni ai, tapi anak boru, na humbani bangsani do boi buatonni bahen jolmani,

¹⁵ase ulang gabe butak ginomparni ibahen i tongah-tongah ni bangsani, ai Ahu do Jahowa, na papansingkonsi.”

¹⁶Dob ai nini Jahowa ma hubani si Musa,

¹⁷“Hatahon ma hubani si Aron, ise pe lang humbani ginomparmu na martikas, torus marsundut-sundut, na boi roh hun dohor laho manggalangkon sipanganon bani Naibata.

¹⁸Ise pe lang na martikas na boi roh hun dohor; dalahi na pitung atap na repat, parbohi na penek atap parnahei na marsiganjangi;

¹⁹dalahi na maponggol naheini atap tanganni pe;

²⁰dalahi na gundung atap na pengpeng, na palouon matani, na huluson, na hurapon atap na hona kasih.

²¹Sagala dalahi na martikas humbani ginompar ni si Aron, malim ai, seng bulih roh hun dohor laho manggalangkon galangan marhitei apuy bani Jahowa. Martikas do ia, halani ai seng bulih roh ia hun dohor, laho manggalangkon sipanganon bani Naibatani.

²²Bulih do ia mangan humbani sipanganon ni Naibatani, humbani na tang mapansing ai ampa na pansing ai,

²³tapi seng bulih ia masuk hubagas hirei-hirei ai atap dohoranni anjapanjap ai, ai martikas do ia, ase ulang gabe mabutak ibahen ianan-Ku na pansing in; ai Ahu do Jahowa na papansingkon sidea.”

²⁴Sonai ma ihatahon si Musa hubani si Aron, hubani anakni ai ampa hubani haganup bangsa Israel.