Read Batak Simalungun 3 MUSA 22 Bible Online

3 MUSA 22 - Batak Simalungun bible

3 MUSA 22

¹Dob ai nini Jahowa ma hubani si Musa,

²“Hatahon ma hubani si Aron ampa hubani anakni ai, ase pangkei sidea pasal sibere-bere na mapansing, na pinapulig ni sidea ai Bangku, ase ulang gabe mabutak ibahen sidea goran-Ku; Ahu do Jahowa.

³Hatahon ma hubani sidea, sidingaton ma ai marsundut-sundut: Anggo adong humbani ginomparnima, na roh mandohori sibere-bere na mapansing ai, na pinapulig ni halak Israel hubani Jahowa, tudu sanggah butak ia, maningon siapkononkon do halak na sonai ai hun lobei-Hu; Ahu do Jahowa.

⁴Barang ise humbani ginompar ni si Aron, na gadamon atap na tirisan bonih, seng bulih mangankon sibere-bere na mapansing ai, sadokah seng borsih ope ia. Barang ise na manjamah atap aha pe, na dob butak halani dais ai bani bangkei atap bani halak na sabur bonihni, [160]

⁵atap barang ise na manjamah binatang na manjulur, gabe butak ia halani ai, atap sada halak, na mambahen dalit bani habutakonni ai, halani habutakon aha pe ai na longkot bani halak ai,

⁶halak na manjamah sisonai ai, maningon butak do ronsi bodari anjaha seng bulih panganonni humbani sibere-bere na mapansing ai, anggo seng ope iparidi angkulani ibagas bah. [161]

⁷Ia dob sundut mata ni ari, borsih ma ia; dob ai bulih ma panganonni sibere-bere na mapansing ai, ai sipanganonni do ai.

⁸Pinahan na matei-matei sonin atap na hona soroh, seng bulih panganonni, ai butak do dirini marhitei ai; Ahu do Jahowa. [162]

⁹Maningon do irikkonon ni sidea paraturan-Ku, ase ulang mardousa sidea marhitei ai, anjaha matei sidea marhalanihon ni ai, halani ibutaki sidea ai; Ahu do Jahowa, na papansingkon sidea.

¹⁰Halak na legan seng bulih panganonni na pinapansing ai; halak na manumpang bani malim ai atap gajianni pe seng bulih mangankon na pinapansing ai.

¹¹Tapi anggo iboli sada malim sada jabolon marhitei duit, bulih do jabolon ai mangankon ai; sonai jabolon na dob tubuh i rumahni, bulih do mangankon sipanganonni.

¹²Anggo laho boru ni sada malim bani halak na legan, seng bulih be panganonni humbani galangan tatangan na dob pinapansing ai.

¹³Tapi anggo mabalu boru ni sada malim atap hona sirangkon, anjaha seng mardakdanak ia, anjaha domma mulak ia hu rumah ni bapani, bulih do panganonni sipanganon ni bapani, songon bani haposoonni; tapi anggo halak na legan seng bulih mangan hunjai.

¹⁴Tapi anggo adong halak na mangankon na pinapansing ai humbani na so binotohni, maningon tambahonni saparlima ni hargani ai hujai, anjaha ipaulak ma ai rap pakon na pinapansing ai bani malim ai. [163]

¹⁵Ia malim-malim ai, seng bulih mabutak bahenon ni sidea sibere-bere na mapansing ni Israel, sitatangon ni sidea ai bani Jahowa,

¹⁶anjaha ulang ma iparroh sidea hasalahan ampa uhum bani halak Israel, marhitei na ipangan sidea sibere-bere na mapansing ai, ai Ahu do Jahowa, na papansingkon sidea.” [164]

¹⁷Dob ai nini Jahowa ma hubani si Musa,

¹⁸“Hatahon ma hubani si Aron ampa anakni ai ampa bani haganup halak Israel, barang ise humbani halak Israel atap humbani halak dagang i Israel, na mamboan galanganni, galangan bagah-bagah pe ai atap sibere-bere nionjar ni uhurni sihol galangkononni bani Jahowa songon galangan situtungon;

¹⁹ase gabe harosuh hanima marhitei ai, maningon tunggal na so martikas do galangkononnima humbani lombu, biribiri atap hambing pe.

²⁰Sagala na martikas seng bulih galangkononnima, ai seng jumpahan idop ni uhur hanima marhitei ai. [165]

²¹Anggo adong sada halak na mamboan bani Jahowa galangan pardameian humbani lombu atap biribiri, laho manggalari bagah-bagah atap bahen galangan nionjar ni uhur, ulang ma na martikas ai, ase tarharosuhkon ai; seng bulih martikas ai.

²²Anggo pitung do ai atap maponggol holiholini, ugahan atap darangon, hurapon atap baroon, pinahan na sonai seng bulih galangkononnima bani Jahowa atap bahenon ai gabe galangan apuy bani anjapanjap ni Jahowa.

²³Sada lombu atap biribiri, na maganjangtu atap mapondoktu pagorini, bulih do boanonnima gabe galangan nionjar ni uhur, tapi anggo gabe galangan bagah-bagah seng tarjalo ia.

²⁴Pinahan na dob tarkasih marhitei na tarlisat, na ipisat, irotap atap isayat, seng bulih galangkononmu ai bani Jahowa. Seng bulih sonai martikas bahenonnima pinahan i tongah-tongahnima,

²⁵atap bolionnima na sonai humbani halak na legan, laho manggalangkon na sonai gabe sipanganon bani Naibatanima; ai dong do sedani, adong do tikasni, seng tarharosuhkon hanima halani ai.”

²⁶Dob ai marsahap ma Jahowa hubani si Musa, nini ma,

²⁷“Anggo tubuh sada anak ni lombu barang anak ni sada biribiri barang anak ni sada hambing, maningon pitu ari dokahni rap ai pakon indungni; humbani paualuh-arihon pe hu atas ase tarharosuhkon ai gabe galangan apuy bani Jahowa. [166]

²⁸Seng bulih rap sayaton lombu atap biribiri pakon anakni ibagas na sadari. [167]

²⁹Anggo sihol galangkononnima galangan puji-pujian bani Jahowa, galangkon hanima ma ai songon na sapatutni, ase gabe harosuh ma hanima marhitei ai.

³⁰Lanjar bani ari ai do panganonnima ai, seng bulih adong na teba bahenonnima ronsi patar; Ahu do Jahowa. (bd. 7: 15)

³¹Halani ai ramotkon hanima ma titah-Ku, anjaha horjahon ma domu hujai, Ahu do Jahowa.

³²Anjaha ulang ma mahiri bahen hanima goran-Ku na pansing in, ase pansing Ahu i tongah-tongah ni halak Israel; Ahu do Jahowa, na papansingkon hanima, [168]

³³anjaha na mambahen hanima luar hun tanoh Masir, ase Ahu gabe Naibata bennima; Ahu do Jahowa.”