Read Batak Simalungun 3 MUSA 24 Bible Online

3 MUSA 24 - Batak Simalungun bible

3 MUSA 24

¹Dob ai nini Jahowa ma hubani si Musa,

²“Hatahon ma hubani halak Israel, ase iboan bam minak na pitah humbani buah ni jetun na giniling bani panggilingan, ase tarbahen torus manorus gara palita ai. [180]

³I darat ni hirei-hirei ni poti parpadanan ai, ibagas lampolampo na mapansing ai, ijai ma hoseihonon ni si Aron palita ai i lobei ni Jahowa humbani bodari das bani sogod, aturan na totap ma on torus bani ginomparnima.

⁴I atas parpalitaan omas na pitah ma tongtong hoseihononni palita ai i lobei ni Jahowa.

⁵Maningon buatonmu do itak na lumat, anjaha masakonmu hunjai sapuluh dua ruti, ganup ruti dua parsapuluh efa do.

⁶Maningon tibalhononmu do ai dua gugunan, onom ruti sagugunan, i atas ni meja omas pitah ai i lobei ni Jahowa. [181]

⁷Anjaha maningon nahkononmu do dahupa na pitah bani ganup gugunan, ase ai songon uap ni ruti ai gabe galangan apuy bani Jahowa.

⁸Ganup ari Sabat do hoseihononni ai tongtong i lobei ni Jahowa halani bangsa Israel, bahen padan sadokah ni dokahni.

⁹Gabe rupei ni si Aron ampa anakni do ai, anjaha bani ianan na mapansing do ai panganon ni sidea, halani parbagianan na mapansing tumang do ai bani humbani galangan apuy na bani Jahowa; aturan na totap do ai.”

¹⁰Bani na sahali luar do anak ni sada boru Israel, tapi halak Masir do anggo bapani, hu tongah-tongah ni halak Israel; jadi martinggil ma anak ni boru Israel ai ampa sada halak Israel i parsaranan ai.

¹¹Iapasi anak ni boru Israel ai do goran ni Jahowa anjaha iburai. Jadi iboan sidea ma ia hubani si Musa. Ia goran ni inangni si Selomit do, boru ni si Dibri, humbani marga Dan. [182]

¹²Jadi ihurungkon sidea ma ia, paima talar bani sidea rosuh ni Jahowa. [183]

¹³Jadi nini Jahowa ma hubani si Musa,

¹⁴“Boan ma sipamurai ai hu darat ni parsaranan in, anjaha sagala halak na manangarsi itampeihon ma tanganni bani uluni, anjaha paturut ma matei ia ipargijig ganup kuria in.

¹⁵Anjaha hatahon ma hubani halak Israel, ʻBarang ise na mamurai Naibatani maningon porsanonni do dousani ai.ʼ

¹⁶Barang ise na mangapasi goran ni Jahowa maningon mateihononkon do, haganup do kuria in mampargijigsi; halak panginsolat atap parnagori in pe, anggo irisai goran ni Jahowa, maningon bunuhon do. [184]

¹⁷Barang ise na mamunuh sada halak, maningon pamateon do ia. [185]

¹⁸Barang ise na mamunuh sada pinahan, maningon gantihonni do ai, pinahan gantih ni pinahan.

¹⁹Barang ise na mambahen hasedaon bani hasomanni, maningon sonai do bahenon hu bani, [186]

²⁰ugah abul ni ugah, mata abul ni mata, ipon abul ni ipon, hasedaon na binahenni bani halak na legan ai do honahononkon bani.

²¹Barang ise na mamunuh pinahan maningon abulonni do ai, tapi barang ise na mamunuh sada jolma, maningon marutang hosah do ia.

²²Sada do uhum bennima, bani halak dagang age bani parnagori in, ai Ahu do Jahowa Naibatanima. [187]

²³Sonai ma ihatahon si Musa hubani halak Israel; iboan sidea ma panrisai ai luar hu darat ni parsaranan ai, jadi ipargijig sidea ma ia matei bani batu. Ase ibahen halak Israel ma songon na tinonahkon ni Jahowa hubani si Musa.” [188]