Read Batak Simalungun 3 MUSA 27 Bible Online

3 MUSA 27 - Batak Simalungun bible

3 MUSA 27

¹Dob ai roh ma hata ni Jahowa hubani si Musa,

²“Hatahon ma hubani halak Israel, anggo adong sada halak na mambagahkon jolma bani Jahowa, maronjolan hubani pangasammu, (4 Mus. 30)

³jadi asam ma sada dalahi na marumur dua puluh tahun das hu onom puluh tahun lima puluh sekel pirak, domu hubani sekel na bani ianan na mapansing in.

⁴Tapi anggo naboru do ai, tolu puluh sekel ma pangasammu bani.

⁵Anggo marumur halak ai lima tahun das hubani dua puluh tahun, asam ma sada dalahi dua puluh sekel anjaha naboru sapuluh sekel.

⁶Anggo marumur halak ai sabulan das hubani lima tahun, asam ma ia lima sekel pirak anggo dalahi, tapi anggo naboru do tolu sekel pirak ma.

⁷Anggo marumur halak ai onom puluh tahun barang i atas ni ai, asam ma ia sapuluh lima sekel pirak anggo dalahi, tapi anggo naboru do sapuluh sekel pirak ma.

⁸Tapi anggo miskintu do sada halak laho manggalar domu hubani pangasammu, jadi iboan ma halak na binagahkon ai hu lobei ni malim, ase malim ai ma mambahen asam bani; hubani na boi bahenon ni siparbagah-bagah ai do asamon ni malim ai ia.

⁹Anggo pinahan do ai, na targalangkon halak ai bani Jahowa, haganup na ginalangkon ni halak ai bani Jahowa pansing do.

¹⁰Seng bulih gantihonni atap pasamboronni ai, na madear gantih ni na bajan, barang na bajan gantih ni na madear, tapi anggo sihol do tukaronni pinahan hubani pinahan, jadi haduasi ma ai gabe papansingon bani Jahowa.

¹¹Tapi anggo pinahan na butak do ai, na so bulih galangonkon bani Jahowa, maningon boanonni do ai hu lobei ni malim,

¹²anjaha malim ai ma mangasam ai, domu hubani dearni ampa na hurangni; pangasam ni malim ai do na saud.

¹³Tapi anggo sihol tobusonni ai, maningon tambahkononni do hujai saparlima ni pangasamon ai.

¹⁴Anggo ipapansing sada halak rumahni bani Jahowa, jadi asamon ni malim ma ai domu hubani dearni atap hurangni; sonin pangasam ni malim ai, sonai ma totap.

¹⁵Tapi anggo sihol tobuson ni halak na mapansing ai do rumahni ai, maningon tambahkononni do hujai saparlima ni pangasamon ai, dob ai ia ma use simada ai.

¹⁶Anggo ipapansing sada halak sabagian humbani tanoh parbagiananni bani Jahowa, jadi domu hubani bonihni do asamonmu ai; anggo sada homer bonihni, jadi lima puluh sekel pirak ma ai.

¹⁷Anggo humbani tahun parolob-oloban nari do ia papansingkon ladangni ai, jadi totap ma songon pangasammu.

¹⁸Tapi anggo dob tahun parolob-oloban do ia papansingkon ladangni ai, jadi itimbang malim ai ma argani domu hubani bilangan ni tahun na tading ai das hu tahun parolob-oloban ai, anjaha oruan ma domu hujai humbani pangasamon na dob binahenmai.

¹⁹Tapi anggo sihol tobuson ni halak na papansingkon ai ladang ai, maningon tambahkononni do hujai saparlima ni pangasammu hinan, ase bani use ai.

²⁰Tapi anggo seng sihol be uhurni manobus ai, lambin ijual tene ladang ai bani halak na legan, seng bulih be tobusonni ai.

²¹Ia ladang ai, anggo maluah ma ai bani tahun parolob-oloban, pansing bani Jahowa ma ai, songon ladang na hona haram; gabe parbagianan ni malim ma ai.

²²Anggo ipapansing sada halak bani Jahowa sada ladang na binolini, ase sedo parbagiananni ai,

²³jadi paretongkonon ni malim ai hubani nasa buei ni pangasamon das hu tahun parolob-oloban ai, anjaha maningon bereon ni halak ai do bani ari ansa buei ni pangasamon ai songon sibere-bere na mapansing bani Jahowa.

²⁴Bani tahun parolob-oloban maningon mulak do juma ai hubani halak pambolianni ai, bani halak siparhak ijai mangihutkon parbagianan hinan. [220]

²⁵Ganup pangasamon ai maningon domu do ai hubani sekel na bani ianan na mapansing ai, dua puluh gera sada sekel.

²⁶Tapi bunga tubuh ni pinahan, na dob Jahowa simadasi halani parlobei tubuh, ise pe lang bulih marbagah-bagahkon ai, atap lombu atap biribiri pe ai, Jahowa do simada ai. [221]

²⁷Anggo pinahan na butak do ai, maningon tobusonni do ai marguru hubani pangasammu, anjaha tambahkononni do saparlimani; anggo seng itobus, jadi ijual ma ai domu hubani harga pangasamon ai.

²⁸Tapi haganup na dob hona haram, na pinapansing ni halak bani Jahowa marhitei na mangkaramkon ai, humbani ugasni, atap jolma pe ai, atap pinahan atap juma humbani parbagiananni, seng bulih jualon atap tobuson be ai; ai sagala na dob hinaramkon pansing tumang do ai bani Jahowa. [222]

²⁹Anggo adong sada jolma, na dob pinapansing marhitei na mangkaramkon ai, seng bulih tobuson ia, maningon pamateon do ia. [223]

³⁰Haganup parsapuluhan ni tanoh in, humbani gogoh ni tanoh atap humbani buah ni hayu pe, Jahowa do simada ai, na dob pinapansing do ai bani Jahowa. [224]

³¹Tapi barang ise na sihol manobus parsapuluhanni, maningon tambahkononni do hujai saparlima ni hargani.

³²Sagala parsapuluhan ni lombu atap biribiri, sagala parsapuluhan ni pinahan, na montas hun toruh ni simambu ni parmahan, na pinapansing do ai bani Jahowa.

³³Seng pala pareksaon ai atap na jenges do atap na bajan, anjaha homa seng bulih tukaron ai. Anggo adong halak na manukar ai, gabe haduasi ma pinahan ai papansingon, seng bulih tobuson ai.”

³⁴Ai ma titah, na binere ni Jahowa hubani si Musa i atas ni Dolog Sinai. [225]