Read Batak Simalungun 3 MUSA 3 Bible Online

3 MUSA 3 - Batak Simalungun bible

3 MUSA 3

¹“Anggo galangan pardameian galangan ni sada halak, anjaha sihol galangkononni ai humbani lombu tunggal atap boru-boru, seng bulih martikas galangkononni ai hu lobei ni Jahowa.

²Maningon tampeihononni do tanganni hu ulu ni galanganni ai anjaha sayatonni ma ai i lobei ni labah ni lampolampo partumpuan ai; anjaha maningon pispiskonon ni anak ni si Aron, malim-malim ai ma darohni ai hu anjapanjap ai inggot.

³Anjaha humbani galangan pardameian ai, maningon galangkononni do bahen galangan apuy bani Jahowa,” taboh-taboh na manrongkob bituhani ronsi ganup taboh-taboh na i atas ni bituha ai;

⁴sonai homa na dua piah-piah ampa taboh-taboh na longkot hujai, na bani binongei ai, sonai homa bongbong daroh na dalngop bani atei-atei, rap pakon piah-piah ma buatonni ai.

⁵Anjaha maningon tutungon ni anak ni si Aron ma ai i atas ni anjapanjap, i atas ni soban pakon apuy, bahen galangan situtungon; galangan apuy ma ai, uap na misbou bani Jahowa.

⁶Anggo humbani pinahan etek do galanganni ai bahen galangan pardameian bani Jahowa, tunggal atap boru-boru, maningon na so martikas do galangkononni ai.

⁷Anggo anak ni biribiri do na sihol galangkonnonni ai, maningon boanonni do ai hu lobei ni Jahowa.

⁸Tampeihononni ma tangannni hu ulu ni galanganni ai, anjaha sayatonni ma ai i lobei ni lampolampo partumpuan ai; tapi anggo daroh ni ai maningon pispiskonon ni anak ni si Aron ma ai hu anjapanjap ai inggot.

⁹Humbani galangan pardameian ai maningon galangkononni do bahen galangan apuy bani Jahowa, “Taboh-taboh, ihurni ganup sirotapon dohor bani hayu tanggurungni, taboh-taboh na manrongkob bituhani ronsi haganup taboh-taboh na i atas ni bituhani ai:

¹⁰sonai homa dua piah-piah ampa taboh-taboh na longkot hujai na bani binongei ai, sonai homa bongbong daroh na dalngop bani atei-atei ai, rap pakon piah-piah ma buatonni ai.

¹¹Maningon tutungon ni malim ma ai i atas ni anjapanjap bahen sipanganon ni galangan apuy bani Jahowa.

¹²Anggo hambing galanganni, maningon boanonni do ai hu lobei ni Jahowa.

¹³Tampeihononni ma tanganni hu uluni anjaha sayatonni ma ai i lobei ni lampolampo partumpuan ai; tapi anggo darohni ai maningon pispiskonon ni anak ni si Aron ma ai hu anjapanjap ai inggot.

¹⁴Maningon buatonni do deba hunjai galanganni bahen galangan apuy bani Jahowa, ai ma taboh-taboh na manrongkob bituhani ronsi haganup taboh-taboh na i atas ni bituha ai;

¹⁵sonai homa na dua piah-piah ampa taboh-taboh na longkot hujai na bani binongei ai, sonai homa bongbong daroh na dalngop bani atei-atei ai, rap pakon piah-piah ma buatonni ai.

¹⁶Maningon tutungon ni malim ma ai i atas ni anjapanjap bahen sipanganon ni galangan apuy gabe uap na misbou bani Jahowa; sagala taboh-taboh Jahowa do simadasi.

¹⁷Aturan na totap ma on sadokah ni dokahni ronsi ginomparnima bani ganup ianannima, sabonar seng boi do panganonnima taboh-taboh barang daroh.” [8]