Read Batak Simalungun 3 MUSA 5 Bible Online

3 MUSA 5 - Batak Simalungun bible

3 MUSA 5

¹“Anggo mardousa sada halak, marhitei na mambogei hata pamuraion, anjaha ia saksi, atap ia sandiri na mambogei ai atap adong na pabotohkon bani, hape seng ipatugah, mangonai ma salah ai bani. [17]

²Atap anggo ijamah sada halak sada barang na mabutak, ai ma bangkei ni binatang na mabutak, atap bangkei ni pinahan na mabutak, atap bangkei ni gilok-gilok na mabutak, age seng ibagas botohni, butak do ia halani ai anjaha marsalah. [18]

³Atap anggo tarjamahsi habutakon ni jolma, atap habutakon na ijahanin pe ai, gabe butak do ia bahenonni ai; age seng ibagas botohni ai lobei, gabe ibotoh use, parsalah ma ia ijai.

⁴Atap anggo adong sada halak, na tarlanjur bibirni mangkatahon bija laho mangkorjahon na masambor atap na madear, pasal haganup tene na tarlanjur ibijahon jolma, age seng ibagas botohni ai lobei, gabe ibotoh use, parsalah ma ia ibagas ai.

⁵Anggo marsalah sada halak ibagas ai, maningon sopotkononni do na dob mardousa ia ibagas ai,

⁶anjaha boanonni ma galangan pardousaonni hubani Jahowa halani salah na binahenni ai, sada boru-boru humbani pinahan etek, sada anak ni biribiri atap sada hambing, anjaha malim ai do mambahen pardearan bani halani dousani ai.

⁷Tapi anggo seng sungkup gogohni patukkon sada biribiri, maningon boanonni bahen galanganni hubani Jahowa, halani dousa na binahenni ai, dua kuhuy barang dua anak ni asas, sada bahen galangan pardousaon, na sada nari bahen galangan situtungon.

⁸Anjaha maningon boanonni do ai hubani malim ai, ase igalangkon na parlobei ai bahen galangan pardousaon; maningon puloskononni do uluni hampit tangkuhukni, tapi seng bulih rotap ai. [19]

⁹Dob ai pispiskononni ma deba humbani daroh ni galangan pardousaon ai hu dingding ni anjapanjap ai, tapi daroh na teba ai, tiriskononni ma hu dasor ni anjapanjap ai, ai ma galangan pardousaon.

¹⁰Dob ai maningon galangkononni do na paduahon ai bahen galangan situtungon, mangihutkon aturan, anjaha malim ai ma mambahen bani pardearan halani dousa na binahenni ai, jadi dapotan hasasapan ni dousa ma ia. [20]

¹¹Tapi anggo seng sungkup gogohni patukkon dua kuhuy barang dua anak ni asas, maningon boanonni do bahen galanganni halani dousa na hinorjahonni ai, saparsapuluh efa itak na lumat bahen galangan pardousaon, seng bulih nahkononni minak hujai, barang bahenonni hamonan huatasni, halani galangan pardousaon do ai. [21]

¹²Maningon boanonni ma ai hubani malim, anjaha buaton ni malim ai ma sampohul hunjai bahen rupei pardingatan, anjaha tutungonni ma ai i atas ni anjapanjap bahen galangan apuy bani Jahowa, ai ma galangan pardousaon.

¹³Sonai ma bahenon ni malim ai pardearan bani halani dousa na hinorjahonni ibagas sada pahara ondi, ase dapotan hasasapan ni dousa ia; na lobih ai, rupei ni malim do ai, songon galangan sipanganon ai.” [22]

¹⁴Dob ai nini Jahowa ma hubani si Musa,

¹⁵“Anggo adong sada halak na mangorui anjaha na mardousa, dompak na ijahanin pe na pinapansing ni Jahowa, tapi seng ituntun, maningon boanonni do bahen galangan parsalahanni hubani Jahowa, sada biribiri tunggal na so martikas humbani pinahan etek, ansa taksiranmu domu bani sekel pirak, mangihutkon sekel bani ianan na pansing in, ai ma galangan parsalahan.

¹⁶Anjaha barang sadiha na nioruanni marhiteihon ni dousani humbani ugas na pansing ai maningon pasuangonni do, anjaha maningon tambahanni saparlima hunjai anjaha bereonni ai hubani malim, jadi malim ai ma mambahen pardearan bani, gabe dapotan hasasapan ni dousa ma ia. [23]

¹⁷Anggo mardousa sada halak gabe ihorjahon na so bulih bahenonni namin mangihutkon titah ni Jahowa, age seng ibotoh ai, parsalah do ia ibagas ai, jadi maningon mangonai papa hu bani,

¹⁸gabe maningon boanonni ma hubani malim humbani pinahan etek, sada biribiri tunggal na so martikas domu hubani taksiranmu bahen galangan parsalahan, anjaha malim ai ma mambahen pardearan bani halani hakahouon na so niutuskonni ai, anjaha dapotan hasasapan ni dousa ma ia.

¹⁹In ma galangan parsalahan, halani na dob marsalah ia bani Jahowa.” [24]

²⁰Dob ai nini Jahowa ma hubani si Musa,

²¹“Anggo mardousa sada halak gabe manlanggar ia dompak parentah ni Jahowa marhitei na mangoto-otoi hasomanni marhitei barang na pinasimpankon atap na pinalimihon hu bani, atap marhitei na manrampok, atap marhitei na manamun hasomanni,

²²atap dong jumpahsi na magou gabe iporsou ai, anjaha salah parbijani marhitei atap aha pe gabe boi mardousa ia halani ai,

²³anggo mardousa ia sonai gabe marsalah, maningon pasuangonni do ugas na dob nirampokni ai, atap na sinamunni ai, atap na dob pinasimpankon ai bani, atap ugas na magou na dob jumpahsi ai, [25]

²⁴atap aha pe tene na dob binijahonni ibagas sipaoto-oto, maningon pasuangonni do ai ganup anjaha tambahanni saparlima ni hunjai, anjaha berehononni ma ai hubani simadasi hinan, bani ari panggalangkononni bani galangan parsalahanni ai. [26]

²⁵Anjaha maningon do boanonni hubani malim ai bahen galangan parsalahanni bani Jahowa sada biribiri tunggal na so martikas humbani pinahan etek, domu hubani taksiranmu bahen galangan parsalahan. [27]

²⁶Jadi malim ai ma mambahen pardearan bani ilobei ni Jahowa, gabe dapotan hasasapan ni dousa ma ia pasal haganup na hinorjahonni na parohkon salah bani.”