Read Batak Simalungun 3 MUSA 6 Bible Online

3 MUSA 6 - Batak Simalungun bible

3 MUSA 6

¹Dob ai nini Jahowa ma hubani si Musa,

²“Hatahon ma hubani si Aron pakon hubani anakni ai sonon, on do titah pasal galangan situtungon. Ia galangan situtungon ai maningon tibal do i panggalangan ai layur saborngin das hubani patarni, anjaha maningon gara do torus apuy ai i atas ni anjapanjap ai. (bd. 1)

³Maningon sorungkonon ni malim ai ma baju hiou silopakni, sonai homa saluar hiou silopakni hubani badanni, anjaha maningon buatonni do abuan ni galangan situtungon ai, dob bois ipangan apuy i atas anjapanjap ai, anjaha useihononni ma ai i lambung ni anjapanjap ai. [28]

⁴Dob ai maningon tanggalanni do use pakeanni ai anjaha sorungkononni pakean na legan; dob ai boanonni ma abuan ai hu darat ni parsaranan ai hubani sada ianan na pansing. [29]

⁵Anjaha apuy na i anjapanjap ai maningon gara tongtong, seng bulih mintop; maningon pagaraon ni malim do soban ganup sogod i atasni anjaha baturonni i atasni galangan situtungon anjaha tutungonni i atasni taboh-taboh ni galangan pardameian.

⁶Maningon tong-tong gara apuy i atas ni anjapanjap ai, seng bulih mintop.

⁷Anjaha on ma aturan pasal galangan sipanganon: Maningon anak ni si Aron do mangondoskonsi i lobei ni Jahowa hu lobei ni anjapanjap ai. (bd. 2)

⁸Dob ai buatonni ma hunjai sampohul humbani itak ni galangan sipanganon ai, pakon humbani minakni pakon humbani dahupani na i atas ni galangan sipanganon ai, anjaha maningon tutungonni ma ai i atas ni anjapanjap ai bahen uap na misbou, rupei pardingatan bani Jahowa.

⁹Tapi teba-tebani ai panganon ni si Aron pakon anak-ni ma ai; ipangan ma ai seng marnamigar bani ianan na susi; i alaman ni lampolampo na pansing ai ma panganon ni sidea ai.

¹⁰Seng bulih patongkaon ai marhasoman na migar; rupei ni sidea ma ai na hubere humbani galangan apuy na hu bangku; pansing tumang do ai, usih songon galangan pardousaon ampa galangan parsalahan ai.

¹¹Sagala dalahi na i tongah-tongah ni ginompar ni si Aron bulih do mangankon hunjai, in ma aturan sadokah ni dokahni ronsi ginomparnima pasal galangan apuy na bani Jahowa; barang ise na manjamah ai, gabe pansing ma ia.”

¹²Nini Jahowa ma hubani si Musa,

¹³“On ma galangan ni si Aron pakon anakni ai hubani Jahowa bani ari pamminakionni; saparsapuluh efa itak na lumat bahen galangan sipanganon ari-ari, satongahni sogod anjaha na satongah nari bodari. (2 Mus. 29)

¹⁴Ibagas balanga marhasoman minak do ai paulion; anjaha maningon agu botul do ai boanonmu bahen galangan sipanganon, mar sasantopik ma ai galangkononmu bahen uap na misbou bani Jahowa.

¹⁵Malim na dob niminakan, ai ma gantihni humbani anakni, ia do sibahen ai gabe aturan sisadokah ni dokahni ma ai, maningon ganup do ai tutungon bani Jahowa.

¹⁶sagala galangan sipanganon na ginalangkon ni malim, maningon bois do ai tutungon, seng bulih ai panganon.”

¹⁷Nini Jahowa ma hubani si Musa,

¹⁸“Hatahon ma hubani si Aron pakon hubani anakni ai, on do titah pasal galangan pardousaon. Bani ianan panayatan ni galangan situtungon ai do sayaton galangan pardousaon ai i lobei ni Jahowa, pansing sahalian do ai.

¹⁹Malim na manggalangkon galangan pardousaon ai, ia do na mangankon ai; bani ianan na pansing do panganon ai, i alaman lampolampo partumpuan ai.

²⁰Barang ise na manjamah daging ni galangan ai maningon pansing do, anjaha anggo mistak humbani daroh ai hubani sada pakean, maningon burihanmu do na hona mistak ai bani sada ianan na pansing.

²¹Anjaha hudon tanoh panlompahanni ai, maningon bolahonkon do; tapi anggo ibagas hudon tombaga do ai ilompah, maningon tangkas do ai usahon anjaha burihan ibagas bah.

²²Sagala dalahi na i tongah-tongah ni malim ai boi do mangankon ai; pansing sahalian do ai.

²³Tapi sagala galangan pardousaon anggo domma pala tarboan humbani darohni ai hubagas lampolampo partumpuan bahen pardearan bani ianan na pansing ai, seng bulih panganon ai, maningon tutungon do ai ibagas apuy.”