Read Batak Simalungun 3 MUSA 8 Bible Online

3 MUSA 8 - Batak Simalungun bible

3 MUSA 8

¹Dob ai nini Jahowa ma hubani si Musa,

²“Boan ma si Aron rap pakon anakni ai, pakon pakean ai, pakon minak pamminaki ai, pakon lombu galangan pardousaon ai, pakon biribiri tunggal na dua ai ampa raga na marisi ruti na so niigaran ai,

³anjaha patumpu ma ganup tumpuan ai hu lobei ni labah ni lampolampo partumpuan ai.”

⁴Jadi ibahen si Musa ma songon na hinatahon ni Jahowa hu bani, ipatumpu ma tumpuan ai hu lobei ni labah ni lampolampo partumpuan ai.

⁵Nini si Musa ma hubani tumpuan ai, “On do hata na tinonahkon ni Jahowa sibahenonta.”

⁶Dob ai ihatahon si Musa ma roh hun dohor si Aron pakon anak ni ai, anjaha iparidi ma sidea ibagas bah.

⁷Dob ai isorungkon ma bani baju parbagas ai anjaha igonditkon bani gondit ai, isorungkon use ma bani baju pardarat ai anjaha inahkon i atasni baju epod ai, lanjar igonditi ma ia bani gondit ni baju epod ai, anjaha isangkutkon ma ai bani.

⁸Dob ai inahkon ma hu atasni tutup tonton ai, anjaha hubagas tutup tonton ai ibahen ma Urim pakon Tumim ai. [43]

⁹Inahkon ma gotong-gotong ai hu uluni, anjaha ilongkotkon ma hu gotong-gotong ai, hampit lobei, tutup pardompakan omas, sortali na pansing ai, songon na pinarentahkon ni Jahowa hubani si Musa. [44]

¹⁰Ibuat si Musa ma minak pamminaki ai, anjaha iminaki ma ianan na pansing ai ampa haganup na dong ibagas, anjaha ipapansing ma ai. [45]

¹¹Ipispiskon ma deba hunjai bani anjapanjap ai pitu hali, anjaha iminaki ma anjapanjap ai ampa ganup parugasni, tong parburihan ai ampa onjolanni laho papansingkonsi.

¹²Dob ai iuseihon ma deba minak pamminaki ai bani ulu ni si Aron mamminakisi laho papansingkonsi.

¹³Ihatahon si Musa ma roh hun dohor anak ni si Aron, jadi isorungkon ma bani sidea baju parbagas ai, igonditkon ma gondit ai bani sidea, anjaha inahkon ma tangkuluk ai bani sidea, songon na tinonahkon ni Jahowa bani si Musa.

¹⁴Dob ai ihatahon ma hun dohor boanon lombu galangan pardousaon ai; jadi itampeihon si Aron pakon anakni ai ma tangan ni sidea bani ulu ni lombu galangan pardousaon ai. (bd. 4)

¹⁵Isayat si Musa ma ai, ibuat ma daroh ni ai anjaha idaiskon ma ai marhitei jari-jarini bani tanduk ni anjapanjap ai inggot laho manguras anjapanjap ai; daroh na teba ai iuseihon ma hu dasor ni anjapanjap ai laho papansingkonsi mambahen pardearan i atasni.

¹⁶Ibuat ma ganup taboh-taboh na i atas ni bituha ai, pakon hirei-hirei na bani atei-atei ai, pakon piah-piah na dua ai ronsi taboh-taboh na longkot hujai, lanjar itutung si Musa ma ai bani anjapanjap ai.

¹⁷Tapi anggo lombu ai ronsi hulingkulingni juhutni pakon ginagatni, itutung ma ai bani apuy idarat ni parsaranan ai, songon na tinonahkon ni Jahowa hubani si Musa.

¹⁸Dob ai iboan ma hun dohor biribiri tunggal ai bahen galangan situtungon; jadi itampeihon si Aron pakon anakni ai ma tangan ni sidea bani ulu ni biribiri tunggal ai. [46]

¹⁹Isayat si Musa ma ai, anjaha ipispiskon ma darohni ai bani anjapanjap ai inggot.

²⁰Itoktoki ma biribiri ai, dob ai itutung si Musa ma uluni, toktokni pakon taboh-tabohni ai.

²¹Iburihi ma bituhani ai ampa naheini ibagas bah, dob ai itutung si Musa ma ganup biribiri ai i atas ni anjapanjap ai; ai ma galangan situtungon bahen uap na misbou, sada galangan apuy bani Jahowa, songon na tinonahkon ni Jahowa hubani si Musa.

²²Ihatahon use ma boanon hun dohor biribiri tunggal na sada nari, ai ma biribiri tunggal paondoskon tohonan, jadi itampeihon si Aron pakon anakni ai ma tangan ni sidea bani ulu ni biribiri tunggal ai. [47]

²³Isayat si Musa ma ai, dob ai ibuat si Musa ma deba humbani daroh ai anjaha idaiskon ma ai hubani pinggol siamun ni si Aron pakon hubani ompu-ompu ni tanganni siamun ampa hubani ompu-ompu ni naheini siamun.

²⁴Ihatahon use ma roh hun dohor anak ni si Aron, jadi inahkon ma deba humbani daroh ai hubani pinggol siamun ni sidea, pakon hubani ompu-ompu ni tangan siamun ni sidea ampa hubani ompu-ompu ni nahei siamun ni sidea; anjaha ipispiskon si Musa ma daroh na teba ai bani anjapanjap ai inggot.

²⁵Dob ai ibuat ma taboh-tabohni pakon taboh-taboh ni ihurni, pakon ganup taboh-taboh na bani bituhani, pakon bongbong daroh na longkot bani atei-atei, pakon piah-piah na dua ai ronsi taboh-taboh na longkot hujai pakon hae-hae siamun na parlobei;

²⁶ibuat ma humbani raga ianan ni ruti na so niigaran na i lobei ni Jahowa sada kuei na so niigaran na i lobei ni Jahowa sada kuei na so niigaran, pakon sada kuei na marsaor minak, pakon sada ruti, jadi itampeihon ma ai hu atas ni sagala taboh-tabohni ampa hu atas ni hae-hae siamun na parlobei.

²⁷Inahkon ma ganupan ai hu tangan ni si Aron pakon hu tangan ni anakni ai, anjaha itatang ma ai bahen galangan sitatangon i lobei ni Jahowa.

²⁸Dob ai ibuat si Aron ma ai humbani tangan ni sidea, anjaha itutung ma ai i atas ni anjapanjap ai i atas ni galangan situtungon ai, galangan mangondoskon tohonan ma ai, uap na misbou, galangan apuy bani Jahowa.

²⁹Ibuat si Musa ma tonton ni biribiri tunggal pangondoskon ni tohonan ai, anjaha itatang ma ai bahen galangan sitatangon i lobei ni Jahowa; ai ma rupei ni si Musa, songon na tinonahkon ni Jahowa hubani si Musa.

³⁰Dob ai ibuat si Musa ma deba humbani minak pamminaki ai pakon humbani daroh na i atas ni anjapanjap ai, ipispiskon ma ai hubani si Aron ampa hubani pakeanni, sonai homa hubani anakni ampa hubani pakean ni anakni ai; sonai ma ipapansing si Aron ampa pakeanni, pakon anakni ampa pakean ni sidea.

³¹Dob ai nini si Musa ma hubani si Aron pakon anakni ai, “Lompah nasiam ma gulei in bani labah ni lampolampo partumpuan in, anjaha ijai ma pangan nasiam gulei in ampa ruti na ibagas raga ianan ni galangan pangondosonkon ni tohonan songon na dob itonahkon hu bangku: Si Aron pakon anakni do sipangan in.

³²Anjaha na teba in humbani gulei pakon humbani ruti in maningon tutungon nasiam do in ibagas apuy.

³³Anjaha seng bulih luar nasiam hun labah ni lampolampo partumpuan in ibagas pitu ari, das bani ari hagogok ni pangondosonkon ni tohonan bani nasiam; ai pitu ari do dokahni pangondosonkon ni tohonan in bani nasiam.

³⁴Songon na dob binahen sadari on, sonai do itonahkon Jahowa bahenon hu lobeian on laho mambahen pardearan bani nasiam.

³⁵Maningon tading nasiam i lobei ni labah ni lampolampo partumpuan in arian pakon borngin pitu ari layur, mangkorjahon tonah ni Jahowa, ase ulang matei nasiam; sonai do iparentahkon bangku.”

³⁶Jadi ibahen si Aron pakon anakni ai ma haganup songon na tinonahkon ni Jahowa hinan marhitei si Musa