Read Batak Simalungun 3 MUSA 9 Bible Online

3 MUSA 9 - Batak Simalungun bible

3 MUSA 9

¹Anjaha bani ari paualuhkon idilo si Musa ma si Aron ampa anakni ai ampa pangintuai ni Israel, [48]

²anjaha nini ma hubani si Aron, “Buat ham ma sada anak ni lombu bahen galangan pardousaon ampa sada biribiri tunggal bahen galangan situtungon, haduasi ulang martikas, anjaha boan ma ai hu lobei ni Jahowa.

³Anjaha hatahon ma bani halak Israel, buat nasiam ma sada hambing tunggal bahen galangan pardousaon, ampa sada anak ni lombu ampa sada anak ni biribiri, haduasi ai ganup marumur satahun anjaha seng martikas, bahen galangan situtungon,

⁴ambah ni ai sada lombu jonggi ampa sada biribiri tunggal bahen galangan pardameian, sigalangonkon i lobei ni Jahowa, ambah ni ai use galangan sipanganon, na niagu bani minak; ai sadari on do talar Jahowa bani nasiam.”

⁵Jadi iboan sidea ma na hinatahon ni si Musa ai, hu lobei ni lampolampo partumpuan ai, anjaha roh bei ma homa hun dohor ganup humpulan ai, lanjar jongjong i lobei ni Jahowa.

⁶Anjaha marsahap ma si Musa, “On ma sibahenon nasiam iparentahkon Jahowa, ase talar bani nasiam hasangapon ni Jahowa.”

⁷Jadi marsahap ma si Musa bani si Aron, “Padohor ma bani anjapanjap in, anjaha hoseihon ma bam galangan pardousaon ampa galangan situtungon, laho pajongjong pardearan bam ampa bani rumahmu. Dob ai boan ma galangan ni bangsa in, laho mambahen pardearan bani sidea, songon na pinarentahkon ni Jahowa.” [49]

⁸Jadi ipadohor si Aron ma hubani anjapanjap ai, anjaha isayat ma anak ni lombu galangan pardousaon ai, ai ma bani dirini sandiri.

⁹Dob ai iboan anak ni si Aron ai ma daroh ai hu bani, isornopkon ma jari-jarini hubagas daroh ai, anjaha inahkon ma ai bani tanduk ni anjapanjap ai; ia daroh na teba ai iuseihon do ai bani dasor ni anjapanjap ai.

¹⁰Tapi anggo taboh-taboh ni galangan pardousaon ai ampa piah-piah ampa taboh-taboh na i lambung ni atei-atei ai, itutung ma ai i atas ni anjapanjap ai, songon na pinarentahkon ni Jahowa bani si Musa. [50]

¹¹Ia juhutni ai ampa hulingkuling ai itutung do ai i darat ni parsaranan ai.

¹²Dob ai isayat ma galangan situtungon ai; iboan anak ni si Aron ai ma daroh ai bani, anjaha ipispiskon ma ai bani anjapanjap ai inggot. [51]

¹³Iboan sidea ma homa galangan situtungon ai hubani marponggol-ponggol ampa uluni ai; anjaha itutung ma ai bani anjapanjap ai.

¹⁴Iburihi ma bituha-bituhani ai ampa nahei-naheini ai, dob ai itutung ma ai rap pakon galangan situtungon ai bani anjapanjap ai.

¹⁵Dob ai igalangkon ma homa galangan ni halak na mabuei ai; ibuat ma hambing tunggal ai, na bahen galangan pardousaon ai bani bangsa ai, isayat ma ai, anjaha igalangkon ma ai gabe galangan pardousaon, songon na parlobei ai.

¹⁶Anjaha igalangkon ma homa galangan situtungon ai, domu hubani paraturanni hinan.

¹⁷Dob ai igalangkon ma galangan sipanganon ai; ibuat ma sanggolom hunjai, anjaha igalangkon ma ai bani anjapanjap ai, sobali galangan situtungon sisogod-sogod ai.

¹⁸Isayat ma homa lombu jonggi ai ampa biribiri tunggal ai, gabe galangan pardameian bani bangsa ai; iboan anak ni si Aron ai ma daroh ai bani, anjaha ipispiskon ma ai bani anjapanjap ai inggot.

¹⁹Tapi anggo taboh-taboh ni lombu jonggi ampa hambing tunggal ai, taboh-taboh ni ihurni ai, ampa taboh-taboh na manrongkob bituha-bituha ai, ampa piah-piah ai, ampa taboh-taboh na i lambung ni atei-atei ai, [52]

²⁰haganupan taboh-taboh ai itampeihon sidea ma huatas ni tonton ai, anjaha itutung sidea ma taboh-taboh ai i atas ni anjapanjap ai.

²¹Tapi anggo tonton ai ampa hae-hae lobei parsiamun ai, itatang si Aron ma ai gabe galangan sitatangon i lobei ni Jahowa, songon na pinarentahkon ni si Musa. (bd. 30-31)

²²Dob ai ipaherbang si Aron ma tanganni hubani bangsa ai anjaha ipasu-pasu ma sidea; anjaha dob igalangkon galangan pardousaon ai, galangan situtungon ai ampa galangan pardameian ai, tuad ma ia. [53]

²³Dob ai masuk ma si Musa ampa si Aron hu lampolampo partumpuan ai, anjaha luarhonsi sidea, ipasu-pasu sidea ma bangsa ai, anjaha talar ma hamuliaon ni Jahowa bani haganup bangsa ai. [54]

²⁴Ai luar do apuy hun lobei ni Jahowa, iboiskon ma galangan situtungon ai ampa taboh-taboh na bani anjapanjap ai. Jadi dob ididah bangsa ai ai, marolob-olob ma sidea, lanjar marrogop. [55]