Read Batak Simalungun JEREMIA 1 Bible Online

JEREMIA 1 - Batak Simalungun bible

JEREMIA 1

¹Hata ni si Jeremia, anak ni si Hilkia, sada humbani malim na i Anatot, na i tanoh Benjamin; [1]

²roh do hata ni Jahowa bani, bani panorang ni si Josia, anak ni si Amon, raja ni Juda, pasapuluhtolu-tahunkon dob raja ia. [2]

³Roh do homa bani panorang ni si Joyakim, anak ni si Josia, raja ni Juda, das bani pasapuluhsada-tahunkon dob raja si Sedekia, anak ni si Josia, raja ni Juda, das bani na tarbuang Jerusalem bani bulan lima. [3]

⁴Roh do hata ni Jahowa hu bangku, mangkatahon,

⁵“Paima Hutompa ho ibagas partapaan, domma Hutanda ho, anjaha paima itubuhkon inangmu ho, domma Hupapansing ho, anjaha Hupabangkit ho gabe nabi bani bangsa-bangsa.” [4]

⁶Dob ai ningku ma, “Ham Tuhan Jahowa! Seng hubotoh naha marsahap, ai poso ope ahu.” [5]

⁷Tapi nini Jahowa ma dompak ahu, “Ulang ihatahon ho, ʻPoso ope ahu.ʼ Atap huja pe ho Husuruh, maningon laho ho, anjaha atap aha na Hutonahkon bam, ai do hatahononmu.

⁸Ulang ho mabiar i lobei ni sidea, ai Ahu do hasomanmu, laho paluahkon ho,” nini Jahowa. [6]

⁹Jadi isurdukkon Jahowa ma tangan-Ni, anjaha ijamah ma pamanganku; nini Jahowa ma dompak ahu, “Tonggor ma, domma Hunahkon hatang-Ku hubagas pamanganmu. [7]

¹⁰Tonggor ma, Hupabangkit do ho sadari on mardiateihon bangsa-bangsa ampa harajaon-harajaon, laho mangumpat ampa manreongkon, laho parsedahon ampa mangagouhon, laho padearhon ampa manuan.” [8]

¹¹Dob ai roh ma hata ni Tuhan Jahowa hu bangku mangkatahon, “Jeremia aha do ididah ho?” Jadi ningku ma, “Huidah do dangkah ni hayu na dulas marbanggal.”

¹²Jadi nini Jahowa ma hu bangku, “Sintong do pangidahmu, ai puho do Ahu marjaga-jaga, laho pasaudkon hatang-Ku.” [9]

¹³Dob ai roh ma hata ni Jahowa hu bangku paduahalihon, mangkatahon, “Aha do ididah ho?” Jadi ningku ma, “Hudon na gurgur do huidah, lunsat gurgurni, roh hun utara.”

¹⁴Dob ai nini Jahowa ma bangku, “Hun utara do roh ni hasedaon bani sagala pangisi ni nagori on. [10]

¹⁵Ai tonggor ma, diloon-Ku do sagala bangsa, harajaon na i utara,” nini Jahowa, “Jadi roh ma sidea, anjaha ganup sidea pajongjong paratasni i lambung ni horbangan ni Jerusalem, laho manlawan tembokni inggot ampa sagala huta ni Juda. [11]

¹⁶Jadi dabuhon-Ku ma uhum bani sidea, halani hajahaton ni sidea, ai ma na tinadingkon ni sidea ai Ahu, laho manggalang bani naibata na legan, anjaha marsombah bani jadi-jadian ni tangan ni sidea.

¹⁷Tapi anggo ho, gonditi ma binongeimu; misir ma ho, anjaha hatahon ma hubani sidea haganup na Hutonahkon bam. Ulang ma ho tarsonggot mangidah sidea, ase ulang bajoraon ho Hupaturut ibahen sidea.

¹⁸Tapi Ahu sandiri mambahen ho sadari on gabe huta na toguh, gabe basikah bosi, gabe tembok tombaga, laho mangimbang haganup nagori in, mangimbang raja-raja ni Juda, pangintuaini, malimni ampa pangisi ni nagori in. [12]

¹⁹Porangon ni sidea do ho, tapi seng tartaluhon sidea, ai Ahu do hasomanmu,” nini Jahowa, “na paluahkon ho.”