Read Batak Simalungun JEREMIA 10 Bible Online

JEREMIA 10 - Batak Simalungun bible

JEREMIA 10

¹Tangar ma hata, na hinatahon ni Jahowa bannima, ale ginompar ni Israel!

²Sonon do hata ni Jahowa, “Ulang ma marguru hanima bani dalan ni sipajuh begu-begu, ulang ma tarsonggot hanima ibahen tanda na i langit, tongon, bangsa parbegu do tarsonggot bani sisonai ai; [146]

³tongon, na lang do naibata ni parbegu: Sada hayu iroboh hun harangan, anjaha tuhang manukangi ai marhitei pisou. [147]

⁴Ipajagar ma ai bani omas ampa pirak, ipahat marhitei paku ampa parpalu, ase ulang tarbahen miut. [148]

⁵Songon halak-halak do ai i paransimunan, seng boi marsahap; siusungon do ai, ai seng boi mardalan. Ulang ma habiari hanima sidea, ai seng tarbahensi mambahen na masambor, anjaha mambahen na madear pe seng dong gogohni.” [149]

⁶Seng dong na songon Ham, ale Jahowa. Banggal do Ham, anjaha timbul do goran-Mu marhitei hagogohon. [150]

⁷Ise ma na so mangkabiari Ham, ale Raja ni bangsa-bangsa? Ai sonin do talup i lobei-Mu. Seng dong na songon Ham i tongah-tongah ni sagala na maruhur bani bangsa-bangsa ampa bani sab harajaon ni sidea. [151]

⁸Haganup do sidea lontong anjaha bodoh; pangajarion ni sisombah-sombahon, seng marguna ai. [152]

⁹Pirak ialop hun Tarsis anjaha omas hun Uphas; itukangi ma ai marhitei sipanguhir ampa tukang omas; mahonda anjaha magerger do pakeianni ibahen; anjaha jadi-jadian ni tangan ni tukang do ai ganupan.

¹⁰Tapi Jahowa, ai ma Naibata na sintong; Ia do Naibata na manggoluh anjaha Raja sisadokah ni dokahni. Dugur do tanoh on ibahen gila-Ni, anjaha bangsa-bangsa seng tahan i lobei ni ringis-Ni.

¹¹Sonai do hatahononnima bani sidea, ʻNaibata-naibata ai, na so sitompa langit pakon tanoh on, maningon do bois hun tanoh ampa hun toruh ni langit.ʼ

¹²Jahowa do na manjadihon tanoh on marhitei hagogohon, Ia do na pajonamkon dunia on marhitei hapentaran-Ni, anjaha marhitei habotohon-Ni ipaherbang do langit. [153]

¹³Anggo ipabogeihon sora-Ni marhasak ma bah i langit, anjaha marhitei parentah-Ni naik do hombun hun ujung ni tanoh on. Hilap do ibahen parohkon udan, anjaha iparoh do logou humbani rumah panimpanan-Ni. [154]

¹⁴Na bodoh do ganup jolma, seng dong pangartianni; bador do haganup tuhang omas halani gana-ganani; ai sipaoto-oto do gana-gana ai, seng dong hosah ibagas. [155]

¹⁵Logou do hansa ai, jadi-jadian na pakahouhon; magou do ganupan ai bani panorang pambalason bani sidea.

¹⁶Tapi seng sonai anggo rupei ni si Jakob; Ia do na manjadihon sagala na dong, anjaha Israel marga parbagianan-Ni; Jahowa Zebaot do goran-Ni.” [156]

¹⁷Patumpu ma ugas-ugasmin, ho ale na hinubu.

¹⁸Ai sonon do hata ni Jahowa, “Tonggor ma, ambukkonon-Ku do isi ni tanoh in santorap on, anjaha parohon-Ku do hasosakan bani sidea, ase mangahap sidea.

¹⁹Mogouni in ahu halani ugahkon! Borit do ugahku! Tapi ningku do, ʻAnggo ningon sonai ma sitarononku, na taron ma!ʼ [157]

²⁰Maseda do lampolampongku, mangkarotap talini; itadingkon niombahku do ahu, seng dong be sidea; seng dong be na pajongjong lampolampo bangku, ampa na paherbang tendangku.

²¹Ai na oto do siparmahan, seng ipindahi Jahowa, halani ai seng mardohar sidea, mambur merap do ganup hulanan ni sidea.

²²Tangar ma, roh do sada barita, sada hageoron banggal roh do hun tanoh parutara, laho parsedahon huta ni Juda, ase gabe ianan ni sorigala. [158]

²³Hubotoh do, ale Jahowa, sedo hape guru bani jolma langkahni, anjaha sedo halak pardalan-dalan na manontuhon langkahni. [159]

²⁴ Pinsang Ham ma ahu, ale Jahowa, asal marpangantan; ulang ibagas ringis-Mu, ase ulang bois ahu. [160]

²⁵Useihon Ham ma ringis-Mu bani bangsa sipajuh begu-begu na so mananda Ham, ampa bani bangsa na so mandilo goran-Mu, ai ibondut sidea do Jakob, ibondut sidea do ia anjaha iboiskon, anjaha tarulang do ibahen iananni.” [161]