Read Batak Simalungun JEREMIA 12 Bible Online

JEREMIA 12 - Batak Simalungun bible

JEREMIA 12

¹“Pintor do Ham, ale Jahowa porini pe dong hutuk-hutukku Bamu; age pe sonai sihol do marsahap ahu Bamu pasal sada parkara, ʻMase ma mardohar dalan ni halak parjahat? Anjaha marsonang-sonang halak sipangeluk?ʼ [175]

²Isuan Ham do sidea, anjaha marurat do sidea; marbanggal do sidea anjaha marbuah. Dohor do Ham bani pamangan ni sidea, tapi daoh do humbagas uhurni. [176]

³Tapi itanda Ham do ahu, ale Jahowa; ididah Ham do ahu anjaha iuji Ham do uhurhu i lobei-Mu. Tarik Ham ma sidea songon biribiri na sihol sisayaton, anjaha papulig Ham ma sidea hubani ari panayatan. [177]

⁴Piga dokah nari marhoru tanoh in anjaha melus suan-suanan i talun? Halani hajahaton ni pangisi ni tanoh in do, ase masab pinahan ampa manuk-manuk, ai nini sidea, ʻSeng anjai idahonni tongon ujungta!ʼ [178]

⁵Anggo loja do ho ibahen sidea maradu rap pakon na mardalan nahei, sonaha ma pambahenmu maradu pakon huda? Anjaha anggo seng sonang iahap ho bani tanoh na mardamei-damei, sonaha ma pasal ho i harangan ni Jordan? [179]

⁶Ai gari saninamu pakon parrumah ni bapamu, sidea pe seng bujur dompak ho; martahi-tahi do sidea i pudimu. Ulang porsaya ho bani sidea, age pe basar parsahap ni sidea bam.” [180]

⁷“Domma Hutadingkon rumah-Ku, domma Huambukkon parbagianan-Ku; domma Huondoskon haudungan ni uhur-Hu hubagas tangan ni munsuhni.

⁸Gabe songon singa na i harangan do parbagianan-Ku dompak Ahu; ipamaling do sorani dompak Ahu, halani ai do ase magigi Ahu hu bani.

⁹Gabe manuk-manuk panoroh sirintik do parbagianan-Ku Bangku. Manuk-manuk panoroh do roh inggot mandorabsi. Laho ma hanima, patumpu ma sagala binatang na i talun, ase roh mangankon.

¹⁰Buei do parmahan na parseda pohon anggur-Hu, ilot-loti sidea do jumang-Ku, gabe halimisan do juma harosuh-Ku ibahen sidea. [181]

¹¹Gabe halimisan do ai ibahen sidea, marhoru i lobei-Hu halani maseda, tarulang do tanoh in ganup, seng dong na mampardulihon.

¹²Bani haganup buntu-buntu na leseng, i halimisan domma roh na parsedahon. Ai podang ni Jahowa do na mangankon hun ujung ni tanoh na sada das hu ujung ni tanoh na sada nari; seng dong damei bani sagala na tinompa.

¹³Omei do isabur sidea, hape duri do isabi; ilojai sidea do dirini hape seng marlaba. Seng tarhamegahkon sidea pariama ni sidea, halani gajag ni ringis ni Jahowa.” [182]

¹⁴Sonon do hata ni Jahowa, “Pasal haganup simbalog-Ku na jahat in, na mangonai tangan bani parbagianan-Ku, na Hubere gabe siteanon ni bangsang-Ku Israel, ʻTonggor ma, orbaton-Ku do sidea hun tanoh ni sidea, anjaha ginompar ni Juda orbaton-Ku do hun tongah-tongah ni sidea.ʼ

¹⁵Tapi anggo domma Huorbat sidea, marpangulaki do uhur-Hu mangidah sidea, anjaha boanon-Ku do sidea use mulak ganup hu bani parbagiananni ampa hu tanohni bei. [183]

¹⁶Dob torang iguruhon sidea dalan ni bangsang-Ku, ai ma marbija marhitei goran-Ku, ʻSongon sintongni manggoluh Jahowa!ʼ Songon sidea na mangajari bangsang-Ku marbija marhitei Baal, jadi pajonamon do sidea i tongah-tongah ni bangsang-Ku. [184]

¹⁷Tapi anggo seng itangihon sidea, orbaton-Ku do bangsa na sonai ai, anjaha boiskonon-Ku, nini Jahowa.”