Read Batak Simalungun JEREMIA 13 Bible Online

JEREMIA 13 - Batak Simalungun bible

JEREMIA 13

¹Sonon do hata ni Jahowa hu bangku, “Laho ma ho, boli ma sada gondit linnen, anjaha gonditkon ma ai bani binongeimu, tapi ulang hona bah bahen ai.”

²Jadi huboli ma sada gondit domu hubani parentah ni Jahowa, anjaha hunahkon ma ai bani binongeihu.

³Dob ai roh ma hata ni Jahowa hu bangku paduahalihon, nini,

⁴“Buat ma gondit na binolimai, na bani binongeimai, anjaha misir ma ho laho hu Bah Eprat, ponopkon ma ai bani rigat ni dolog batu.”

⁵Jadi laho ma ahu, huponopkon ma ai i topi ni Bah Eprat, songon na hinatahon ni Jahowa bangku.

⁶Dob ai bani dokah-dokah ni ari, nini Jahowa ma hu bangku, “Misir ma ho hu Bah Eprat, alop ma hunjai gondit ondi, na Huhatahon ponopkononmu ijai.”

⁷Dob ai laho ma ahu hu Eprat, jadi huhurak anjaha hubuat ma gondit ai humbani pamonopanni hinan. Tonggor ma, domma madotei gondit ai, seng marguna be atap bahen aha pe.

⁸Dob ai roh ma use hata ni Jahowa hu bangku,

⁹“Sonon do hata ni Jahowa, Sonai do usih parsedaon-Ku gijang ni uhur ni Juda ampa pangenjengon ni Jerusalem na banggal ai.

¹⁰Bangsa na jahat on, na mangengkar manangihon hatang-Ku, na marparlahou mangihutkon uhurni na hengkeng in, anjaha na mangirikkon naibata na legan, laho mambalosi anjaha marsombah hujai, maningon dos do sidea bani gondit on, na so marguna atap bahen aha pe. [185]

¹¹Songon gondit na longkot bani binongei ni dalahi, sonai do Hulongkotkon Bangku ganup ginompar ni Israel ampa haganup ginompar ni Juda,” nini Jahowa, “Ase gabe bangsang-Ku sidea. Gabe barita, puji-pujian ampa hamuliaon Bangku, hape seng ra sidea manangihon.”

¹²Hatahon ma bani sidea hata on, “Sonon do hata ni Jahowa Naibata ni Israel, ʻSagala gusi maningon gokan do bani anggur.ʼ Jadi anggo ihatahon sidea bam, ʻAi lang ibotoh hanami do maningon gokan sagala gusi bani anggur?ʼ ”

¹³Jadi hatahon ma bani sidea, “Sonon do hata ni Jahowa, ʻTonggor ma, gok hamabukon do bahenon-Ku haganup pangisi ni nagori on: Raja-raja na hundul bani paratas ni si Daud, malim-malim, nabi-nabi ampa haganup pangisi ni Jerusalem. [186]

¹⁴Anjaha marsiropukan do sidea bahenon-Ku, ronsi bapa hu bani anakni,ʼ ” nini Jahowa, “Seng holong atei-Hu, seng manosal Ahu anjaha seng marpangulaki uhur-Hu, maningon bois do sidea bahenon-Ku.”

¹⁵Tangar anjaha tangihon hanima ma, ulang ma mangenjeng, ai Jahowa do na marsahap.

¹⁶Bere hanima ma hasangapon bani Jahowa Naibatanima, sanggah lape iparoh hagolapan, sanggah lape tartuktuk naheinima bani dolog na golap, anjaha sanggah paima-imahon haliharon hanima, gabe ipaubah ai jadi hagolapan anjaha ibahen ai gabe na lotir. [187]

¹⁷Tapi, anggo seng ra hanima, maningon tangis ma tonduyhu bani na lungun halani gijang ni uhurnima ai; marbaoran ma iluh humbani matangku, halani hona buang hulanan ni Jahowa. [188]

¹⁸Hatahon ma bani raja in ampa bani inang ni raja in, ʻPatoruh hanima ma parhundulnima, ai domma matektek sortali hamuliaon humbani ulunima.ʼ [189]

¹⁹Huta na i tanoh Dangsina domma tartutup, sahalak pe seng dong na mangungkab. Haganup do Juda maningon tarbuang, tarbuang do sidea haganup.

²⁰Mangkawah ma hanima anjaha idah ma sidea ai na roh hun utara. Ija do hulanan ni biribiri na dob niondoskon bam, biribirimu na jenges-jenges ai?

²¹Aha ma hatahononku, anggo ipabangkit panggomgom bam, ai ma sidea, na dob niajar-ajaranmu gabe hasoman bam? Ai lang mangonai ma bam na maborit, songon bani sada naboru na sihol tubuhan anak?

²²Anjaha anggo ihatahon ho ibagas uhurmu, ʻMase ma mangonai na sonon bangku?ʼ Halani buei ni salahmu do, ase isintak hioumu hu atas anjaha hona butakan ho. [190]

²³Ai boi do ipaubah halak Etiopia hulingkulingni atap begu jolangjolangni? Sonai ma sabonar seng tarbahen hanima mambahen na madear, hanima na dob somal mangkorjahon na jahat. [191]

²⁴Halani ai erapon-Ku ma hanima songon lamlam na niombuskon ni logou, na roh hun halimisan.

²⁵Ai ma rupeimu, parbagiananmu na dob Husuhat bam,” nini Jahowa, “Halani ihalupahon ho Ahu, anjaha martenger ni uhur ho bani ladung.

²⁶Sintakon-Ku do hioumu das hu atas ni bohimu, ase taridah hailaonmu. [192]

²⁷Ai ma parbangkisonmu, hagarangonmai ampa parriah-riahonmu. Huidah do horjamu sihagigihononkon i atas buntu-buntu ampa i tongah ladang. Bursik ma ho, ale Jerusalem! Sadia dokah nari ase pansing ho?” [193]