Read Batak Simalungun JEREMIA 14 Bible Online

JEREMIA 14 - Batak Simalungun bible

JEREMIA 14

¹On do hata ni Jahowa, na roh bani si Jeremia, pasal logou ni ari maningting.

²Marpusok ni uhur do Juda, anjaha horbanganni hurleh; pangisini hundul tangis-tangis i toruh, anjaha doruh-doruh ni Jerusalem manaik do hu atas.

³Na sangap-sangap marsuruh juakjuakni mangindahi bah; das ma sidea bani parigi, seng dong bah jumpah sidea; mulak ma sidea, lumei gusini; jut do uhurni sidea, hiranan, irungkub sidea do uluni.

⁴Siholan do tanoh bani bah, halani seng roh udan hu tanoh in; jut do uhur ni parjuma-juma, martudung-tudung horu ni uhur do sidea. [194]

⁵Age ursa boru-boru na i talun, itadingkon do anakni na baru tubuh, halani seng dong be poyon-poyon.

⁶Jongjong do halode harangan i atas buntu-buntu na palpalon, daup-daup bani logou songon sorigala; gombur do mata ni sidea halani seng dong sigagaton.

⁷ “Ham Jahowa, anggo adu-adu hajahatonnami dompak hanami, sai mangurupi ma Ham, halani goran-Mu; tongon buei do panundalionnami, dompak Ham do hanami mardousa. [195]

⁸Ham, ale pangarapan ni Israel, Sipaluah bani panorang sanggah hasosakan, mase ma songon halak na legan Ham i tanoh in, songon halak pardalan-dalan na roh marborngin hansa?

⁹Mase ma Ham songon halak na jonong, songon puanglima na so boi mangurupi? Tapi i tongah-tongahnami do Ham, ale Jahowa, marpanggorani bani goran-Mu do hanami. Ulang ma tadingkon Ham hanami!” [196]

¹⁰Sonon do hata ni Jahowa bani bangsa on, “Marosuh do sidea hujai-hujon, seng ra sidea pasohkon naheini. Halani ai seng marosuh Jahowa mangidah sidea, idingat do sonari hajahaton ni sidea, anjaha sihol do balaskonon-Ni dousa ni sidea.”

¹¹Nini Jahowa do hu bangku, “Ulang ma sai martonggoi ho mangapiti bangsa on. [197]

¹²Age marpuasa sidea, seng anjai tangihonon-Ku doruh-doruh ni sidea, age pe igalangkon sidea galangan situtungon ampa galangan sipanganon ni sidea, seng marosuh Ahu bani sidea; tapi boiskonon-Ku do sidea marhitei podang, lohei pakon sampar.” [198]

¹³Dob ai ningku ma mambalosi, “Ham Tuhan Jahowa, tonggor ma, nabi-nabi ai do mangkatahon bani sidea, ʻSeng anjai idahonnima podang, barang loheian hanima, tapi damei na totap do berehononku bannima bani ianan on.ʼ ” [199]

¹⁴Tapi nini Jahowa ma hu bangku, “Ladung do na hinatahon ni nabi-nabi ai marhitei goran-Ku; seng dong Husuruh sidea, atap martonah Ahu bani sidea, atap marsahap bani sidea. Pangungkabon sipaoto-oto, panjahaion na so marnidok, ampa haotoon ni pingkiran ni sidea do ihatahon sidea bannima. [200]

¹⁵Halani ai sonon do hata ni Jahowa dompak nabi na manjahai marhitei goran-Ku, age pe lang Husuruh sidea, anjaha na mangkatahon, ʻSeng anjai roh podang atap lohei hu nagori on. Maningon bois do nabi na sonai marhitei podang ampa lohei.ʼ [201]

¹⁶Anjaha halak na nijahaan ni sidea, maningon radag do i alaman ni Jerusalem, rasei ibahen lohei ampa podang, seng dong na mananom sidea, sidea sandiri, jolmani, anakni pakon boruni. Ai maningon useihonon-Ku do hajahaton ni sidea bani sidea. [202]

¹⁷Hatahon ma bani sidea hata on, ʻSai marabur-abur do iluh ni matang-Ku arian pakon borngin, anjaha seng marnamangadi ai, ai parah do ugah ni boru ni bangsang-Ku, borat do na mangonai bani ai. [203]

¹⁸Anggo laho ahu hu ladang, tonggor ma, na mangkamatei binahen ni podang; mulak masuk ahu hu huta, tonggor ma, halak radag binahen ni lohei; tongon, age nabi ampa malim dalan-dalan do i tanoh in, jut do uhur ni sidea.

¹⁹Ai domma tongon-tongon iambukkon Ham Juda? Ai domma sogam Ham bani Sion? Mase ma ilonsingi Ham hanami, anjaha seng dong hamalumon bennami? Sai mangarap do hanami bani hadameion, tapi seng dong roh na madear, mangarap do hanami bani panorang hamalumon, hape tonggor ma, hasonggoton do roh. [204]

²⁰Ham Jahowa, itandai hanami do hajahatonnami ampa salah ni ompungnami; tongon, dompak Ham do hanami mardousa. [205]

²¹Ulang ma buangkon Ham hanami halani goran-Mu! Ulang ma lopas Ham mahiri hotak ni hamuliaon-Mu! Ingat Ham ma, ulang ubah Ham padan-Mu na bennami.

²²Mintor adong ma humbani naibata ni bangsa-bangsa na boi paroh udan? Atap mintor tarparoh langit ma udan? Ai lang Ham do hansa, ale Jahowa Naibata? Bamu do marhatengeran hanami, ai Ham do na manjadihon ai haganupan.ʼ ” [206]