Read Batak Simalungun JEREMIA 15 Bible Online

JEREMIA 15 - Batak Simalungun bible

JEREMIA 15

¹Dob ai nini Jahowa ma hu bangku, “Porini pe roh si Musa pakon si Samuel hu lobei-Hu, seng anjai marulak-ulakan uhur-Hu mangidah bangsa on, palaho ma sidea hun lobei-Hu, suruh ma sidea misir! [207]

²Jadi anggo ihatahon sidea bam, ʻHuja ma hanami laho?ʼ Hatahon ma bani sidea, “Sonon do hata ni Jahowa, ʻNa dob tinontuhon hu hamatean, hu hamatean ma; na hubani podang, bani podang ma; na bani lohei bani lohei ma, anjaha na hu buangan, hu habuangan ma.ʼ [208]

³Ai parohon-Ku do ompat masam hasedaon bani sidea,” nini Jahowa, “Podang laho mamunuh, baliang laho mamparsilbak, manuk-manuk na i awang-awang pakon binatang na i talun laho mangankon pakon mansedahon. [209]

⁴Bahenon-Ku ma sidea gabe songgot-songgot bani haganup harajaon na i tanoh on, halani pambahenan ni si Manase, anak ni si Hiskia, raja ni Juda, i Jerusalem. [210]

⁵Ise ma na ra marholong ni atei bam, ale Jerusalem, anjaha ise ma na ra manangisi ho? Anjaha ise ma na ra tuluy, laho manungkun atap na horas-horas ho?

⁶Domma iambukkon ho Ahu,” nini Jahowa, “Itundalhon ho do Ahu. Halani ai huondamkon do tangan-Ku dompak ho laho mansedahon ho; domma loja Ahu na manganju-anju in.

⁷Domma Hupiari sidea bani anduri ibagas huta-huta ni nagori. Domma popor sidea Hubahen, domma Huparseda bangsang-Ku; halani seng ra sidea mubah humbani parlahouni. [211]

⁸Hubahen do na mabalu i tongah-tongah ni sidea bueinan ase horsik ni laut. Huparoh do sipangagou tongah arian bani parinangon ampa niombahni; sompong do Huparoh bani sidea biar ampa songgot-songgot. [212]

⁹Mandatei do parinangon siparanak na pitu, tompas do ia halani galekni; sundut do mata ni ari sanggah arian ope; maila do ia anjaha tarbador. Anjaha na tading ai humbani sidea ondoskonon-Ku do bani podang i lobei ni munsuh ni sidea,” nini Jahowa. [213]

¹⁰Bursik ma ahu, ale inang, na tinubuhkonmu on, gabe jolma sitinggilan ampa silawanon bani ganup nagori on! Seng namin siparidou atap siparutang ahu, hape ganup do sidea mamapai ahu. [214]

¹¹Ham Jahowa, patut ma ai, porini seng ongga huelek-elek Ham mangkopkop sidea, porini seng roh ahu hu lobei-Mu mangapiti munsuh ai bani panorang hasosakan ampa panorang hamagouan?

¹²Boi ma ponggolhononkon bosi, bosi na hun utara ai ampa tombaga?

¹³Ondoskonon-Ku ma arta ampa habayakonmu gabe taban-taban, seng pala marboli halani dousamu, bani haganup nagorimu. [215]

¹⁴Bahenon-Ku ma ho gabe jabolon ni munsuhmu bani sada nagori na so tinandamu; ai domma gara apuy ni ringis-Ku bam, tongtong do gara ai. [216]

¹⁵Ham Jahowa, ibotoh Ham do; ingat Ham ma ahu anjaha parayak Ham ma; marlulu ma Ham pasal ahu, dompak na mardakdak ahu. Ulang ma masabkon Ham ahu. Ulang ma marlumbang ni uhur lalab Ham bani munsuh-Mu. Botoh Ham ma, halani Ham do ase hona risa ahu.

¹⁶ Dob jumpah hata-Mu, hupangan ma ai; gabe malas ni uhur do bangku hata-Mu ampa hamegahon bani uhurhu; ai marpanggorani bani goran-Mu do ahu, Ham Jahowa Naibata Zebaot. [217]

¹⁷Seng ongga hundul-hundul ahu i tongah-tongah ni halak sipargereh-gereh, atap marmalas-malas ni uhur ahu. Suhi do ahu hundul, halani tangan-Mu na bangku ai; ai gok ringis do uhurhu ibahen Ham. [218]

¹⁸Mase ma lang maronti naborit bangku, lang hatambaran ugahku, manjua pamalumon? Songon bah tubuh na paoto-otohon do Ham bangku, songon bah horah-horah.” [219]

¹⁹Halani ai sonon do hata ni Jahowa, “Anggo mulak ho hu bangku, pasuangon-Ku do ho, anjaha jongjong ma ho i lobei-Hu; anggo na sintong-sintong iluarhon ho, seng na so margagan, gabe pamangan ma ho Bangku. Maningon ho do dompakkonon ni sidea, tapi anggo ho ulang ma dompakkon sidea.

²⁰Bahenon-Ku do ho bani bangsa on gabe tembok tombaga na so tarpanangkih; porangon ni sidea do ho tapi seng tartaluhon sidea ho; tongon Ahu do mangkasomani ho laho mangurupi ampa paluahkon ho,” nini Jahowa. [220]

²¹“Sai na paluahon-Ku do ho hun tangan ni parjahat, anjaha tobuson-Ku do ho hun tangan ni sipangodoh-odoh.”