Read Batak Simalungun JEREMIA 2 Bible Online

JEREMIA 2 - Batak Simalungun bible

JEREMIA 2

¹Roh do hu bangku hata ni Jahowa nini,

²“Laho ma ho, hatahon ma torang-torang hubani par Jerusalem: Sonon do hata ni Jahowa, ʻHudingat do habujuronmu, sanggah poso ho, holong ni uhurmu, sanggah tunangan ope ho, sonaha pangirikkonmu Bangku i halimisan, bani tanoh na so boi tidahon. [13]

³Pansing do ijia Israel bani Jahowa, limbuah ni pariama-Ni do ia. Sagala na sihol mangankon ai marsalah do, sogop do hamagouan bani sidea,ʼ nini Jahowa. [14]

⁴“Tangihon ma hata ni Jahowa, ale ginompar ni si Jakob, sonai sagala marga na hun rumah ni Israel.

⁵Sonon do hata ni Jahowa, ʻAha dong jumpah ompungnima salah Bangku, ase surut sidea hun Bangku, anjaha iirikkon na so margagan, mambahen gabe na lang sidea?ʼ [15]

⁶Seng dong ihatahon sidea, ʻIja do Jahowa, na mambobahon hita tangkog hun tanoh Masir, na mangiring-iring hita i halimisan, bani tanoh dorging-dorging anjaha marlombang-lombang, bani tanoh na horah anjaha na golap tumang, bani tanoh na so ongga binontas ni halak, na so niiankon ni jolma?ʼ [16]

⁷Huboan do hanima hu tanoh na lambutan, ase ipangan hanima buahni ampa gogohni. Tapi dob das hanima hujin, ibutaki hanima do tanoh-Ku, anjaha parbagianan-Ku ibahen hanima gabe hagigi.

⁸Malim pe seng dong manungkun, ʻIja do Jahowa?ʼ Siramotkon titah pe seng itandai Ahu. Parmahan ni bangsani marbalik do hun Bangku; nabi-nabi manjahai marhitei Baal anjaha iirikkon na so marguna. [17]

⁹Halani ai partinggilhonon-Ku do torus hanima, nini Jahowa, ʻronsi ginompar ni ginomparnima partinggilhonon-Ku do.

¹⁰Tongon, laho hanima hu pulou ni halak Kittim, anjaha tonggor ma ijai, atap suruh hanima halak hu Kader, anjaha pardiatei ma ijai, atap dong do masa na sonai: [18]

¹¹Ai dong bangsa, na manggantih naibatani, age pe seng naibata sidea ai? Tapi anggo bangsang-Ku, itukar do hamuliaonni bani sisombahon. [19]

¹²Longang ma hanima ale langit mangidah ahu, tarsonggot anjaha gobir tumang ma,ʼ nini Jahowa. [20]

¹³ ʻDua do salah na binahen ni bangsang-Ku: Ahu bah tubuh hagoluhan itadingkon sidea; ihurak sidea do bani sidea parigi, parigi na marruang, na so marisi bah. [21]

¹⁴Ai jabolon do Israel atap anak ni jabolon do? Mase ma gabe sisorohon ia?

¹⁵Maraum do singa dompaksi, ipamaling sidea sorani. Tarulang do ibahen sidea tanohni, itutung hutani, seng dong be pangisini. [22]

¹⁶Sonai homa halak na hun Nob ampa Tahpanhes lepong do ibahen ulumu. [23]

¹⁷Ai lang ho do parohkon ai bam, halani na tinadingkonmu Jahowa Naibatamu, bani na tinogu-togu-Ni ai ho bani dalan na sintong? [24]

¹⁸On pe, aha do untungni bam, na laho ai ho hu Masir sihol minum bah ni Nil? Atap aha do untungni bam na laho ai ho hu Assur sihol minum bah ni Eprat?

¹⁹Hajahatonmu do na maminsang ho, anjaha parbalikonmu mambahen hona uhum ho. Halani ai botoh anjaha idah ma, naha janginni ampa paetni bam, manadingkon Jahowa Naibatamu; seng dong biarmu dompak Ahu,ʼ nini Tuhan Jahowa Zebaot. [25]

²⁰ʻTongon humbani sapari nari pe sai ipamponggolhon ho do pasanganmu, anjaha irotapi ho talimu, anjaha ihatahon ho, ʻSeng ra ahu jabolon!ʼ Tongon, bani ganup buntu-buntu na gijang ampa i toruh ni hayu na maratah do ho modom songon boru jalang. [26]

²¹Husuan do ho songon hayu anggur na dear, tongon, humbani bonih na pitah. Sonaha do parsalihmu gabe hayu anggur harangan na so margagan? [27]

²²Age pe iusah ho dirimu marhitei guboh ni sabun, anjaha buei ipakei ho sabun, sai tong do tartanda hajahatonmu i lobei-Hu,ʼ nini Tuhan Jahowa. [28]

²³Mase ma pag ho mangkatahon, ʻSeng butak ahu, seng dong hupaihut-ihut Baal!ʼ Ingati ma pambahenanmu i habungan, botoh ma na binahenmu! Mardalan do ho maringgot-inggot songon unta boru-boru bani panorang hagarangonni,

²⁴songon halode boru-boru i halimisan, na unsong-unsong ibagas hisapni. Ise do na boi manahan hisapni? Sagala na mangindahisi seng pala loja, bani bulan hahisaponni sai jumpah do ia.

²⁵Jaga ma naheimu ulang lang marsipatu, ampa tolonanmu ulang horahan! Tapi ihatahon ho do, ʻSeng tarbahen be, ai domma huhaholongi halak na legan, sidea do siirikkononku.ʼ

²⁶Songon panangko na maila anggo tardapot, sonai do maila ginompar ni Israel rap pakon raja ni sidea, pambobai, malim ampa nabi ni sidea,

²⁷ai ma sidea na mangkatahon bani hayu, ʻHo do bapangku,ʼ bani batu, ʻho do mantubuhkon ahu!ʼ Ai gurung ni sidea do idompakkon Bangku sedo bohi ni sidea. Tapi bani panorang hasosakan ni sidea, ihatahon sidea do, ʻJongjong ma Ham, paluah Ham ma hanami!ʼ

²⁸Ai ija do naibatamu, na pinaulimai bam? Sidea ma jongjong, anggo tarbahen sidea do mangurupi ho bani panorang hasosakanmu? Ai songon buei ni hutamu, sonai do buei ni naibatamu, ale Juda? [29]

²⁹Mase Ahu iparingorhon hanima? Haganup do hanima marbalik hun Bangku,” nini Jahowa.

³⁰“Soya-soya do na Hubogbogi ai anaknima, seng tarajari sidea, podangnima sandiri do mamboiskon nabinima songon singa na manoroh. [30]

³¹Hanima na sansundut on, parimbagaskon hanima ma hata ni Jahowa! Ai halimisan do Ahu bani Israel atap tanoh na lotir? Mase ma hatahonon ni bangsang-Ku, ʻRosuhnami bennami, seng benahanami mulak Bamu.ʼ

³²Ai tarhalupahon anak boru do ugas-ugasni atap tarhalupahon tunangan do gonditni? Hape bangsang-Ku, lupa do ia Bangku, domma dokah tumang.

³³Jengesni in ibahen ho panlangkahmu, laho mangindahi haholonganmu, halani ai do ase ra ho pasomal-somal dirimu mangkorjahon na masambor.

³⁴Bani sisi ni hioumu pe jumpah do daroh ni halak na so marpipot. Sedo halani na martuah jumpah ho sidea, tapi halani na pininsangni ho pasal nongkan ai.

³⁵Ihatahon ho, ʻSeng marsalah ahu, domma surut ringis-Ni humbangku.ʼ Tonggor ma, dabuhonon-Ku do uhum bam, halani ihatahon ho, ʻSeng mardousa ahu.ʼ [31]

³⁶Urahni in margoling ho anjaha mubah-ubah. Maningon bador do ho bahenon ni Masir, songon na dob bador ho ibahen Assur. [32]

³⁷Hujai pe ningon laho do ho, jujung tanganmu bani ulumu, ai domma iambukkon Jahowa hatengeran-hatengeran ni uhurmu, seng dong be untungmu humbani sidea.”