Read Batak Simalungun JEREMIA 20 Bible Online

JEREMIA 20 - Batak Simalungun bible

JEREMIA 20

¹Jadi, dob ibogei Malim Pashur, anak ni si Immer, ai ma kopala ni parjaga i rumah ni Jahowa, hata panjahaion ni si Jeremia ai,

²jadi ipukul ma Nabi Jeremia, anjaha inahkon ma ia bani bayangan, na bani horbangan Benjamin parhuluan ai, na bani rumah ni Jahowa. [271]

³Patarni ai, dob ipadarat si Pashur si Jeremia humbani bayangan, nini si Jeremia ma hu bani, “Lang be si Pashur goranmu diloon ni Jahowa, tapi “Biar Inggot” ma.

⁴Ai sonon do hata ni Jahowa, ʻTonggor ma, Ahu do mangondoskon ho hubagas hagobiron, ho ampa haganup hasomanmu. Rasei do sidea bahenon ni podang ni munsuh ni sidea, anjaha matamu sandiri mangidah ai. Ondoskonon-Ku do haganup Juda hubagas tangan ni raja Babel; jadi boanon ma sidea hu Babel, anjaha bunuhonni marhitei podang.ʼ

⁵Anjaha haganup habayakon ni huta on, haganup pansarianni, haganup ugas-ugasni na maharga ampa haganup arta ni raja-raja ni Juda ondoskonon-Ku do hubagas tangan ni munsuh ni sidea, ai ma na sihol roh manrampas anjaha manangkapi sidea, laho mamboban sidea hu Babel. [272]

⁶Anjaha ho, ale Pashur, ampa haganup sinrumahmu maningon tabanon do, iboan hu Babel; ijai do ho matei anjaha ijai do tanomon ho ampa haganup hasomanmu, na nioto-otoanmu marhitei panjahaion ladung.” [273]

⁷Isahap-sahapi Ham do ahu, ale Jahowa, anjaha ra do ahu sahap-sahapan-Mu, gogohan do Ham ase ahu, italuhon Ham do ahu. Gabe sipartatawaan do ahu ganup ari; haganup do manrisai ahu. [274]

⁸Ai siap marhata ahu maningon dilo-dilo do ahu, maningon taurhononku do pasal odoh-odoh ampa hajahaton, gabe sirisaon ampa sipahata-hataon do ahu halani hata ni Jahowa. [275]

⁹Anggo huhatahon, ʻLang be tarsingatanku ai, atap seng be marsahap ahu marhitei goran-Ni,ʼ jadi songon na adong do apuy na gajag huahap ibagas uhurhu, tartutup ibagas holi-holingku, anjaha loja do ahu manahan-nahan ai, hape seng tolap ahu. [276]

¹⁰Tongon buei do husip-husip hubogei: Habiaran do inggot! Aduhon ma ia! Aduhon hita ma ia! Haganup huan-kuan na sangkan bangku manggompangi ahu, ase dabuh ahu. Ra taroto-otoi hita do ia, anjaha mambahen pambalason ma hita bani! [277]

¹¹Tapi Jahowa do mangkasomani ahu songon puanglima na barani; halani ai maningon targompang do sagala na mardakdak ahu, anjaha seng anjai tartaluhon sidea ahu: Maningon bador tumang do sidea, seng anjai monang: Torus do sidea tarbador, seng halupahononkon ai. [278]

¹²Ham Jahowa Zebaot, siuji halak parpintor, sididah piah-piah ampa uhur, paidahkon Ham ma bangku pambalason na bani sidea, ai ondos bamu do parkarangku. [279]

¹³Dodingkon ma Jahowa, puji ma Jahowa! Ai ipaluah do goluh ni halak na masombuh humbani tangan ni parjahat.

¹⁴Hona papa ma namin ari partubuhku. Sai ulang ma hinan namin hona pasu-pasu ari panubuhkonon ni inang bangku! [280]

¹⁵Hona papa ma namin halak na mamboan barita bani bapa, mangkatahon, “Domma tubuh sada anak bamu”, laho mambahen malas tumang uhurni!

¹⁶Sai mangonai ma bani halak ai, songon na masa bani huta na pinarseda ni Jahowa seng maralang-alang. Sai bogeion-Ni ma namin doruh-doruh sogod ampa hasonggotan arian, [281]

¹⁷halani na so ibunuh ahu, sanggah i partapaan, ase inang ma namin tanoman bangku anjaha boratan rumah lalab ia.

¹⁸Mase ma mandarat ahu hun partapaan, laho mangidah hangaluton ampa horu ni uhur, gabe bontasonku ari-ari ni goluhku ibagas habadoron?