Read Batak Simalungun JEREMIA 22 Bible Online

JEREMIA 22 - Batak Simalungun bible

JEREMIA 22

¹Sonon do hata ni Jahowa, “Tuad ma ho hu rumah ni raja ni Juda, sahapkon ma ijai hata on.

²Hatahon ma, ʻTangihon ma hata ni Jahowa, ale raja ni Juda, na hundul i atas hotak ni si Daud, ho ampa juakjuakmu ampa rayatmu, na masuk hun horbangan on.ʼ

³Sonon do nini Jahowa, ʻDalankon hanima ma uhum ampa hapintoron, anjaha paluah ma halak na tarsamun hun tangan ni sipangodoh-odoh.ʼ Ulang ma bahen hasunsahan atap paksa bani halak panginsolat, na tading maetek ampa naboru na mabalu, anjaha ulang ma duruskon daroh na so marpipot bani ianan on. [288]

⁴Anggo tongon idalankon hanima hata ai, jadi sai masuk do humbani horbangan ni rumah on raja-raja, na hundul bani hotak ni si Daud, mangkunduli gareta ampa huda, sidea ampa juakjuak ni sidea ampa rayat ni sidea. [289]

⁵Tapi anggo seng ra hanima manangihon hata on, domma marbija Ahu bani diring-Ku,” nini Jahowa, “Maningon mareong do rumah on.

⁶Ai sonon do hata ni Jahowa pasal istana ni raja ni Juda, ʻSongon Gilead do ho Bangku, songon pakpak ni Libanon, tapi tongon gabe halimisan do ho bahenon-Ku, gabe huta na so marpangisi. [290]

⁷Pasirsiron-Ku do halak na marsedahon ho, ganup sidea marsinjata; anjaha robohon ni sidea do hayu aresmu sidearan, anjaha gijigkononni do ai hubagas apuy.

⁸Buei do bangsa mamontas hun huta on, anjaha ganup manungkun bani hasomanni, ʻMase ma sonon ibahen Jahowa bani huta na banggal on?ʼ [291]

⁹Jadi balosan ni sidea ma, ʻHalani na itadingkon sidea do padan na binahen ni Jahowa, Naibata ni sidea, anjaha marsombah sidea bani naibata na legan, anjaha ibalosi sidea ai.ʼ

¹⁰Ulang ma tangisi hanima ia, na matei in, ulang marhoru pasalsi, tapi gogoh ma tangisi hanima ia, na laho misir in, ai seng mulak be ia laho mangidah tanoh hatubuhanni. [292]

¹¹Ai sonon do hata ni Jahowa pasal si Salum, anak ni si Josia, raja ni Juda, na mamarentah manggantih bapani, si Josia, na misir humbani ianan on. Seng anjai mulak be ia hujon, [293]

¹²tapi maningon matei do ia bani ianan pambuangan ni sidea bani, anjaha seng idahonni be tanoh on.

¹³Bursik ma ia, na pajongjong rumahni marhitei hagedukon, ampa na paulihon anjung-anjung ni marhitei na so uhum, na marsuruh hasomanni mangkorja seng margaji, na so mamberehon upahni bani, [294]

¹⁴na mangkatahon, ʻPaulionku ma bangku rumah na banggal, na markamar-kamar na lumbang i atas, anjaha na mambahen marjandela ai, ilapis bani hayu ares anjaha ibahen marset sigerger.ʼ

¹⁵Nini uhurmu raja ma ho halani marpala-pala ho marrumah hayu ares? Ia bapamu ai lang mangan minum do ia? Tapi idalankon do hasintongan ampa hapintoron, gabe marsonang-sonang do ia.

¹⁶Sintong do panguhumionni bani na madoyuk pakon na masombuh, anjaha mardohar do. Ai lang sonai parlahou ni sitandai Ahu?” nini Jahowa.

¹⁷“Tapi anggo matamu pakon uhurmu, pitah dompak untung na so pintor do laho, dompak na manduruskon daroh na so marpipot, anjaha na mandalankon odoh-odoh ampa paksa.

¹⁸Halani ai sonon do hata ni Jahowa pasal si Joyakim, anak ni si Josia, raja ni Juda, Seng anjai tangisan ni sidea ia, mangkatahon: ʻAih saninangku!ʼ atap ʻAih botou!ʼ Seng anjai doruh-doruh sidea pasalsi, mangkatahon, ʻHam Tuannami!ʼ Atap, ʻHam, na marsangap, na marmulia!ʼ [295]

¹⁹Songon halode do ia tanomon, isarad anjaha isampakkon hudarat ni horbangan ni Jerusalem. [296]

²⁰Tangkog ma ho hu Dolog Libanon, anjaha mardilo-dilo ma; pamaling ma soramu i Basan, anjaha doruh-doruh ma hun Dolog Abarim, ai domma bois sagala na mangkaholongi ho.

²¹Marsahap do ahu bam sanggah na sonang ho, tapi nim, ʻSeng ra ahu manangihon!ʼ Sonai do parlahoumu humbani haposoonmu, seng ongga itangihon ho sorang-Ku.

²²Haganup parmahanmu ombuskonon ni logou do, anjaha haganup na mangkaholongi ho, maningon tarbuang do; jadi bador ma ho, anjaha songgotan halani haganup hajahatonmai. [297]

²³Ho ale na marparatas i Libanon, na marasar i tongah-tongah ni hayu ares! Sonaha ma nani pangorongmu bani paroh ni na maborit bam, ai ma na maborit songon na bani naboru na mangarou? [298]

²⁴Songon sintongni manggoluh Ahu,” nini Jahowa, “age pe si Konya, anak ni si Joyakim, ai ma raja i Juda, tintin tokan bani tangan-Ku siamun, sai umpaton-Ku do ho, [299]

²⁵anjaha ondoskonon-Ku do ho hubagas tangan ni na manguhurhon hosahmu, hubagas tangan ni halak na hinabiaranmu, ai ma hubagas tangan ni si Nebukadnesar, raja ni Babel, ampa hubagas tangan ni halak Kasdim.

²⁶Anjaha sampakkonon-Ku do ho ampa inangmu na manubuhkon ho, hu tanoh na legan, na so hatubuhanmu, anjaha ijai do hanima matei. [300]

²⁷Tapi hu nagori na hinarosuhkon ni sidea sihol mulak hujai, seng anjai mulak be sidea hujai.

²⁸Ai doskon hudon sihagigihonon-Ku anjaha sirosakkonkon do nani si Konya, doskon hudon, na so adong be halak na pot bani? Mase isampakkon anjaha igijigkon ia, hu tanoh na so ongga tinandani? [301]

²⁹ Ale tanoh, tanoh, tanoh, tangar ma hata ni Jahowa!

³⁰Sonon do hata ni Jahowa, ʻSuratkon ma halak on, songon na so marniombah, halak na so marsangap bani goluhni; ai seng dong be humbam ginomparni, na hundul bani hotak ni si Daud anjaha na mamarentah use i Juda.ʼ ”