Read Batak Simalungun JEREMIA 23 Bible Online

JEREMIA 23 - Batak Simalungun bible

JEREMIA 23

¹“Bursik ma parmahan, na mangagou ampa na mangerap biribiri na Huparmahan,” nini Jahowa. [302]

²“Halani ai sonon do hata ni Jahowa, Naibata ni Israel pasal parmahan, na marmahan bangsang-Ku, ʻMerap do ibahen hanima hulanan-Ku, iusir hanima do sidea, anjaha seng ipardimata hanima sidea. Tonggor ma, luluhonon-Ku do bannima pambahenannima na jahat in, nini Jahowa.

³Tapi anggo Ahu, pahumpulon-Ku do teba-teba ni hulanan-Kin humbani haganup nagori pambuangan-Ku bani sidea, anjaha boanon-Ku do sidea mulak hubani sampalanni hinan, ase manggargar anjaha lambin bueini sidea. [303]

⁴Pabangkiton-Ku do parmahan bani sidea, na marmahan sidea, anjaha lang be gobir sidea, barang songgotan, anjaha seng dong magou age sada,” nini Jahowa.

⁵ “Tonggor ma, na roh ma panorangni,” nini Jahowa, “Pajongjongon-Ku ma bani si Daud sada Tumbor na pintor; manggomgomi do ia songon raja marhasoman hapentaran, anjaha dalankononni do hasingtongan ampa hapintoron i nagori in. [304]

⁶ Bani panorangni ai dapotan haluahon ma Juda, anjaha marsonang-sonang Israel marianan. Anjaha on do goranni hatahonon ni halak, ʻJahowa do hapintoron banta.ʼ [305]

⁷Halani ai, tonggor ma, na roh do panorangni,” nini Jahowa, “Seng be hatahonon ni halak ijai, ʻSongon sintongni manggoluh Jahowa, na mamboban tangkog halak Israel hun Masir,ʼ [306]

⁸tapi sonon ma, ʻSongon sintongni manggoluh Jahowa, na mamboan ampa na manogu-nogu ginompar ni Israel tangkog hun tanoh par utara ampa humbani ganup nagori pambuanganni bani sidea, laho mambahen sidea marianan bani tanoh ni sidea.ʼ ”

⁹Pasal nabi-nabi, “Marosak do uhurhu ibagas, hitir-hitir do ganup holi-holingku; songon halak na mabuk do ahu, songon halak na rebad-rebad halani anggur, ai ma marhitei Jahowa ampa hatani na pansing in.

¹⁰Ai gok parbangkis do tanoh on; pangkorhon ni papa, marhoru do tanoh in, anjaha sampalan na i halimisan horah do. Na jahat do situjuon bani sidea, anjaha hagedukon do kuasa bani sidea. [307]

¹¹Nabi, sonai age malim parjahat do, gari ibagas rumah-Ku jumpah Ahu do hajahaton ni sidea,” nini Jahowa. [308]

¹²“Halani ai dalan ni sidea gabe dalan na landit anjaha na golap do bani sidea; jiris do sidea ijai anjaha dabuh. Ai parohon-Ku do bani sidea hamagouan bani tahun pambalason bani sidea,” nini Jahowa. [309]

¹³“Bani nabi na i Samaria Huidah adong do na so patut. Manjahai do sidea marhitei Baal, gabe kahou do ibahen bangsang-Ku Israel.

¹⁴Tapi bani nabi na i Jerusalem Huidah do sihagigihononkon, marbangkisi do sidea anjaha marparlahou ibagas ladung; ipargogohi sidea do tangan ni parjahat, gabe seng dong na mulak humbani hajahatonni; haganup do sidea gabe songon Sodom Bangku, anjaha songon pangisi ni Gomora.” [310]

¹⁵Halani ai sonon do hata ni Jahowa Zebaot pasal nabi ai, “Tonggor ma, papangankonon-Ku do bani sidea sipanganon na mapaet, anjaha painumkonon-Ku do bah rasun bani sidea; ai luar do hasamboron humbani nabi-nabi na i Jerusalem hu sab tanoh in.” [311]

¹⁶Sonon do hata ni Jahowa Zebaot, “Ulang ma tangihon hanima hata ni nabi na manjahai bannima! Na mangoto-otoi do sidea bannima, panonggoran ni uhur ni sidea sandiri do ibaritahon, sedo na humbani pamangan ni Jahowa.ʼ [312]

¹⁷Sai ihata-hatahon sidea do bani halak na pahiri-hiri hata ni Jahowa, ʻSai na sonang do nasiam!ʼ Anjaha bani ganup halak na marparlahou domu hubani uhurni na hengkeng ai, ihatahon sidea do, ʻSeng anjai roh hamagouan bani nasiam!ʼ [313]

¹⁸Ai ise dong, na jongjong manriah i lobei ni Jahowa, laho manjalo ampa mambogei hata-Ni? Ise do, na marimbagaskon hata-Ni, ase ibaritahon ai? [314]

¹⁹Tonggor ma, haba-haba humbani Jahowa! Luar do gila-Ni, ai ma haba-haba sibungkar hasowor; dorabon ni ai do ulu ni parjahat. [315]

²⁰Seng surut ringis ni Jahowa! paima idalankon anjaha ipasaud sura-sura ni uhur-Ni. Arusannima do ai bani dokah-dokah ni ari.

²¹Seng Husuruh nabi-nabi ai, hape laho do sidea; seng marsahap Ahu bani sidea, hape manjahai do sidea. [316]

²²Tapi ambit na dob jongjong sidea manriah i lobei-Hu, jadi baritahonon ni sidea ma hatang-Ku bani bangsang-Ku, laho paulakkon sidea humbani parlahou ni sidea na jahat ai, ampa humbani pambahenan ni sidea na sambor ai.

²³ Ai Naibata na dohor do hansa Ahu,” nini Jahowa, “Ai lang Naibata na daoh do homa? [317]

²⁴ Anggo marponop halak bani ianan na lingod, ai lang Huidah do ia?” nini Jahowa. “Ai lang Ahu do na manggoki langit pakon tanoh on?” nini Jahowa. [318]

²⁵“Hutangar do atap aha hata na hinatahon ni nabi-nabi ai, na patugahkon ladung marhitei goran-Ku, nini sidea, ʻMarnipi do ahu, marnipi do ahu!ʼ

²⁶Piga dokah nari do sonai uhur ni nabi-nabi ai, na patugahkon sipaoto-oto, na mansahapkon ladung na ibagas uhur ni sandiri,

²⁷na mansurahon, ase lupa bangsang-Ku bani goran-Ku marhitei nipi ni sidea, na hinatahon ni sidea samah sidea, ai ma songon pangkalupahon ni ompung ni sidea bani goran-Ku halani Baal? [319]

²⁸Nabi na marnipi, ipatugah ma nipini; tapi atap ise na dong hatang-Ku bani, sintong-sintong ma ihatahon hata ai. Ai aha do pardomuan ni lamlam pakon omei,” nini Jahowa.

²⁹ “Ai lang songon apuy do hatang-Ku,” nini Jahowa, “Anjaha songon parpalu, na manropuki batu gingging? [320]

³⁰Halani ai, tonggor ma, lawanon-Ku do nabi-nabi ai,” nini Jahowa, “Na marsitangkoan bani hatang-Ku. [321]

³¹Tonggor ma, lawanon-Ku do nabi-nabi ai,” nini Jahowa, “Na somal mangkatahon marhitei dilahni, sonon do hata ni Jahowa,

³²ʻTonggor ma, lawanon-Ku do nabi-nabi ai, na patugahkon nipi ladung,ʼ ” nini Jahowa, “Na mambaritahon ai, sihol pakahouhon bangsang-Ku marhitei ladung ampa sipaoto-oto ni sidea; seng dong Husuruh sidea, atap Huparentahkon; seng dong guna ni sidea bani bangsa on,” nini Jahowa. [322]

³³“Anggo adong humbani bangsa on, nabi atap malim pe, manungkun ho, ʻAha do siporsanon humbani Jahowa?ʼ Hatahon ma hubani sidea, ʻHanima do siporsanon ai, ambukkonon-Ku do hanima,ʼ ” nini Jahowa.

³⁴“Ia dong nabi, malim atap ise humbani bangsa ai na mangkatahon, ʻSiporsanon humbani Jahowa, uhumon-Ku do ia ampa parrumahni.ʼ

³⁵Sonon do sihatahononnima ganup bani hasomanni ampa bani saninani, ʻAha do balos ni Jahowa?ʼ atap, ʻAha do na hinatahon ni Jahowa?ʼ

³⁶Tapi ulang be sahap-sahapkon pasal siporsanon humbani Jahowa, ai hata-Ni sandiri do siporsanon ai bani ganup halak, marhitei na ipabalik hanima hata ni Naibata na manggoluh in, ai ma Jahowa Zebaot, Naibatanta.

³⁷Sonon ma hatahon hanima bani nabi, ʻAha do balos ni Jahowa hubam?ʼ atap, ʻAha do ihatahon Jahowa?ʼ

³⁸Tapi, anggo sai ihatahon hanima, ʻSiporsanon humbani Jahowaʼ, jadi sonon ma hata ni Jahowa, ʻHalani sai ihatahon hanima hata on, Siporsanon humbani Jahowa,ʼ age pe domma Husuruh na mangkatahon bannima, Seng bulih hatahononnima “Siporsanon humbani Jahowa”,

³⁹halani ai, tonggor ma, angkaton-Ku ma hanima laho manggijigkon hun lobei-Hu, hanima sonai age huta on, na dob Hubere bannima ampa bani ompungnima.

⁴⁰Anjaha pasogopon-Ku do bannima habadoron sisadokah ni dokahni ampa hahirion na manongtong, na so boi halupaonkon.” [323]