Read Batak Simalungun JEREMIA 25 Bible Online

JEREMIA 25 - Batak Simalungun bible

JEREMIA 25

¹On do hata na roh hubani si Jeremia, pasal haganup bangsa Juda, paompat-tahunkon dob raja si Joyakim, anak ni si Josia, raja ni Juda, bani tahun na parlobei dob raja si Nebukadnesar, raja ni Babel,

²ai ma ihatahon Nabi Jeremia bani haganup bangsa Juda ampa bani haganup pangisi ni Jerusalem, nini,

³“Mulai humbani pasapuluhtolu-tahunkon dob raja si Josia, anak ni si Amon, raja ni Juda, das bani sadari on, dua puluh tolu tahun dokahni, sai roh do hata ni Jahowa hu bangku, anjaha husahapkon do ai bannima marulak-ulak, tapi seng itangihon hanima. [331]

⁴Tongtong do isuruh Jahowa sagala juakjuak-Ni, ai ma nabi-nabi ai, bannima, tapi seng ra hanima manangihon, anjaha seng ra hanima paeleng pinggolnima laho mambogei ai. [332]

⁵Nini sonon, ʻMulak ma hanima ganup humbani parlahouni na masambor ampa pambahenanni na jahat in, ase totap hanima marianan bani tanoh, na dob binerehon ni Jahowa bannima ampa bani ompungnima, humbani sapari ronsi sadokah ni dokahni.ʼ [333]

⁶Ulang ma ihutkon hanima naibata na legan, laho mambalosisi ampa marsombah hujai, anjaha ulang ma puhoi hanima ringis-Ku marhitei horja-horja ni tangannima, ase ulang Huparoh hasedaon bannima.

⁷Tapi seng itangihon hanima Ahu,” nini Jahowa, “Gabe ipuhoi hanima do ringis-Ku marhitei pambahenan ni tangannima, na gabe hamagouan bannima sandiri.

⁸Halani ai sonon do hata ni Jahowa Zebaot, ʻHalani na so itangihon hanima hatang-Ku,

⁹tonggor ma, parohon-Ku ma bangsa-bangsa par utara,ʼ ” nini Jahowa, “Ampa si Nebukadnesar, raja ni Babel, juakjuak-Kai, boanon-Ku ma sidea mandorab tanoh on ampa sagala pangisini ampa dompak ganup bangsa-bangsa inggot; boiskonon-Ku do sidea, bahenon-Ku do sidea gabe songgot-songgot, sipahirion ampa siapason tongtong. [334]

¹⁰Ambah ni ai, padaohon-Ku do hun tongah-tongah ni sidea sora malas ni uhur ampa olob-olob, sora ni siparunjuk ampa sora ni tunangan, sora ni panduda ampa sinalsal ni suluh. [335]

¹¹ Anjaha tanoh on ganup maningon do tarulang anjaha lungun, anjaha maningon balosan ni bangsa-bangsa on do raja ni Babel pitu puluh tahun dokahni.

¹²Tapi dob salpu na pitu puluh tahun ai,” nini Jahowa, “Marlulu do Ahu dompak raja ni Babel, dompak rayatni ampa dompak tanoh ni halak Kasdim, halani hajahaton ni sidea, anjaha bahenon-Ku do tanoh ai tarulang lalab.

¹³Parohon-Ku do hubani tanoh ai domu hubani haganup hata na dob Hulumbahon dompaksi, ganup na tarsurat bani buku on, na dob nilumbahon ni si Jeremia dompak sagala bangsa.

¹⁴Age sidea, buei do bangsa ampa raja-raja na banggal marjabolonkon sidea; balaskonon-Ku do bani sidea romban hu bani pambahenan ni sidea ampa horja ni tangan ni sidea.” [336]

¹⁵Sonon do hata ni Jahowa, Naibata ni Israel hu bangku, “Buat ma humbani tangan-Ku panginuman on, na gok bani anggur ni ringis-Ku, anjaha bahen ma minum hunjai sagala bangsa, na Husuruh siparayakonmu. [337]

¹⁶ase minum sidea gabe rebad-rebad, anjaha podoan halani podang na Husuruh hu tongah-tongah ni sidea.”

¹⁷Jadi hubuat ma panginuman ai humbagas tangan ni Jahowa, anjaha hupainumkon hubani bangsa, na sinuruh ni Jahowa siparayakonku:

¹⁸Ai ma hubani Jerusalem pakon hubani huta-huta ni Juda, hubani raja-rajani ampa hubani na sangap-sangapni, ase gabe tarulang anjaha lungun sidea, gabe songgot-songgot, sipahirion ampa siburaan, songon na masa sadari on;

¹⁹hubani Parao, raja ni Masir, gamot-gamotni, na sangap-sangapni ampa haganup rayatni, [338]

²⁰ampa haganup bangsa na legan, na i tongah-tongah ni sidea; hubani haganup raja ni tanoh Us ampa hubani haganup raja ni tanoh Palistim, ai ma Askalon, Gasa, Ekron pakon teba-teba ni Asdod;

²¹Edom, Moab ampa halak Amon; [339]

²²hubani ganup raja ni Tirus, haganup raja ni Sidon, raja-raja na i dipar ni laut; [340]

²³hu bani Dedan, Tema, Bus ampa haganup halak na ilepong jambulanni inggot; [341]

²⁴hubani ganup raja ni Arab ampa haganup raja ni marga-marga, na marianan i halimisan;

²⁵hubani haganup raja ni Simri, haganup raja ni Elam ampa haganup raja ni Madai; [342]

²⁶hubani haganup raja na i utara, na daoh ampa na dohor, marjojor, ampa hubani ganup harajaon na i dunia on, na adong i sisik ni tanoh on. Anjaha dob salpu sidea, raja ni Babel ma minum. [343]

²⁷Dob ai hatahon ma bani sidea, “Sonon do hata ni Jahowa Zebaot, Naibata ni Israel, ʻMinum ma, mabuk ma anjaha mutah-utah, tompas ma anjaha ulang be jongjong, halani podang na Hutongos hu tongah-tongahnima.ʼ

²⁸Tapi anggo manjua sidea manjalo panginuman ai humbagas tanganmu laho minum hunjai, hatahon ma bani sidea: Sonon do hata ni Jahowa Zebaot, ʻManingon inumonnima do!ʼ

²⁹Tongon, tonggor ma, bani huta na targoran bani goran-Ku do Hupungkah mambahen hamagouan, mintor hanima ma lang hona uhum? Seng boi lang hona uhum hanima, ai domma Hudilo podang dompak haganup na mangiankon tanoh on,” nini Jahowa Zebaot. [344]

³⁰“Tapi anggo ho, lumbahon ma bani sidea haganup hata on, anjaha hatahon ma bani sidea, ʻMorom do Jahowa hun babou, anjaha humbani ianan-Ni na ma pansing ai do ipabogeihon sora-Ni. Maling do morom Ia dompak sampalan-Ni; marsurak do Ia songon halak sipangkorja ibagas kilang dompak haganup pangisi ni tanoh on.ʼ [345]

³¹Maraloling do ai das hu ujung ni tanoh on, ai marpakara do Jahowa dompak bangsa-bangsa; roh do Ia manguhum sagala na mardaging, anjaha parjahat ai ondoskononni do bani podang,” nini Jahowa.

³²Sonon do hata ni Jahowa Zebaot, “Tonggor ma, manrarat do hamagouan humbani bangsa hu bangsa, anjaha roh do haba-haba banggal hun ujung ni tanoh on.

³³Bani panorang ai rasei do bangkei ni na binunuh ni Jahowa, martibalan humbani tampakan ni tanoh on das hubani tampakan na sada nari. Seng sitangisan sidea, atap sipatumpuon, atap sitanomon; gabe napu do sidea bani sisik ni tanoh on. [346]

³⁴Mandoruh ma hanima, ale parmahan, anjaha tangis ma; margulu ma bani abuan, hanima pambobai ni hulanan in, ai roh ma ari pambunuhon ampa pangerapan bannima, anjaha marosak ma hanima songon hudon na maharga. [347]

³⁵Seng dong be haporusan bani parmahan barang haluahon bani pambobai ni hulanan in.

³⁶Bogei ma, partangis ni parmahan ampa doruh-doruh ni pambobai ni hulanan in! Ai Jahowa do na parsedahon sampalan ni sidea,

³⁷anjaha harang na marsonang-sonang ai domma iparseda, halani gajag ni ringis ni Jahowa.

³⁸Itadingkon do parlingodanni, songon pambahen ni sada singa poso-poso, ai domma tarulang tanoh ni sidea halani podang ni Jahowa ampa halani gajag ni ringis-Ni.” [348]