Read Batak Simalungun JEREMIA 27 Bible Online

JEREMIA 27 - Batak Simalungun bible

JEREMIA 27

¹Bani parmulaan ni harajaon ni si Sedekia, anak ni si Josia, raja ni Juda, roh ma hata on humbani Jahowa hubani si Jeremia.

²Sonon do hata ni Jahowa hu bangku, “Bahen ma bam tali ampa pasangan, tampeihon ma ai bani tangkuhukmu, [358]

³anjaha suruh ma partonahanmu hubani raja ni Edom, raja ni Moab, raja ni halak Amon, raja ni Tirus ampa raja ni Sidon, marhitei suruhan ni sidea, na dob roh hu Jerusalem mangayaki si Sedekia, raja ni Juda. [359]

⁴Padas ma bani sidea tonah on, sihatahonon ni sidea bani tuan ni sidea, sonon do hata ni Jahowa Zebaot, Naibata ni Israel: On ma sihatahononnima bani tuannima.

⁵Ahu do, marhitei gogoh-Ku na banggal in ampa marhitei tangan-Ku na gostong in manjadihon tanoh on, jolma ampa pinahan na i tanoh on, anjaha Hubere do ai bani atap ise harosuh ni uhur-Hu. (1 Mus. 1)

⁶Anjaha nuan domma Huondoskon ganup nagori on hu tangan ni si Nebukadnesar, raja ni Babel, juakjuak-Ku, anjaha binatang na i talun pe, domma Huondoskon bani laho mambalosisi. [360]

⁷Anjaha sagala bangsa-bangsa maningon balosan ni sidea do ia, anakni ampa pahompuni, paima roh age ari ni tanohni sandiri; gabe parjabolonan ni buei bangsa ampa raja-raja banggal do homa ia.

⁸Tapi anggo adong bangsa pakon harajaon, na so ra tunduk hubani si Nebukadnesar, raja ni Babel, anjaha na so ra paundukkon tangkuhukni bani pasangan ni Raja Babel, marlulu do Ahu bani bangsa ai marhitei podang, lohei ampa sampar, nini Jahowa, paima bois sidea Hubahen marhitei tanganni.

⁹Halani ai ulang ma patangi-tangi hanima hata ni nabinima, partondungnima, sipanorhai nipi, sijaha parhalaan ampa parsibalik mata, na mangkatahon bannima, ʻUlang ra nasiam tunduk bani raja ni Babel.ʼ [361]

¹⁰Ai ladung do panjahaion ni sidea bannima, laho mambahen hanima tarusir humbani tanohnima, halani ambukkonon-Ku do hanima, ase magou hanima.

¹¹Tapi bangsa, na ra paunduk tangkuhukni hu toruh ni pasangan ni raja ni Babel, anjaha ibalosi ia, paturuton do sidea i tanoh ni sidea, laho mangkorjai ai ampa marianan ijai,” nini Jahowa.

¹²“Age hubani si Sedekia, raja ni Juda, marsahap do ahu romban hubani ganup hata ai, ningku do, Paunduk hanima tangkuhuknima hu toruh ni pasangan ni Raja Babel, anjaha balosi hanima ma ia ampa bangsani, ase manggoluh hanima.

¹³Mase ma rahanan matei ho ampa bangsamu marhitei podang, lohei ampa sampar, songon na nilumbahon ni Jahowa pasal bangsa na so ra tunduk bani raja ni Babel?

¹⁴Ulang ma patangi-tangi hanima hata ni nabi-nabi na mangkatahon bannima, ʻSeng anjai patundukon ni Raja Babel nasiam!ʼ Ai ladung do panjahaion ni sidea bannima. [362]

¹⁵Sedo Ahu na marsuruh sidea, nini Jahowa; ladung do ipatugah sidea marhitei goran-Ku, ase marhitei ai Huusir hanima gabe magou hanima, hanima ampa nabi-nabi na manjahai bannima.

¹⁶Bani malim-malim ampa ganup bangsa ai pe marsahap do ahu, ningku: Sonon do hata ni Jahowa, ʻUlang ma patangi-tangi hanima hata ni nabi-nabi, na manjahai bannima sonon: Tonggor ma, podas ma boanon mulak hun Babel parugas ni rumah ni Jahowa! Ladung do na ipatugah sidea bannima.ʼ [363]

¹⁷Ulang ma patangi-tangi hanima sidea! Balosi hanima ma raja ni Babel, ase manggoluh hanima. Mase ma rahanan maseda huta on?

¹⁸Anggo nabi do sidea tongon, anjaha hata ni Jahowa dong bani sidea, roh ma sidea martonggo hu lobei ni Jahowa Zebaot, ase ulang tarboban hu Babel parugas na tading i rumah ni Jahowa, i rumah ni Raja Juda ampa na i Jerusalem.

¹⁹Ai sonon do hata ni Jahowa Zebaot pasal tiang, bongbongan, parburihan ampa parugas na tading ai ope i huta on, [364]

²⁰ai ma na so binoban ni si Nebukadnesar, raja ni Babel ope, sanggah na iboban hu habuangan si Jekonya, anak ni si Joyakim, raja ni Juda, hun Jerusalem hu Babel ampa haganup halak na sangap-sangap hun Juda ampa hun Jerusalem. [365]

²¹Tongon, sonon do hata ni Jahowa Zebaot, Naibata ni Israel, pasal parugas na tading ope bani rumah ni Jahowa ampa i rumah ni raja ni Juda ampa i Jerusalem:

²²Maningon tarboban do ai hu Babel, anjaha tading ijai das bani ari mangkawah Ahu use bani sidea,” nini Jahowa. “Dob ai boanon-Ku do sidea mulak, anjaha paulakon-Ku do sidea bani ianan on.” [366]