Read Batak Simalungun JEREMIA 3 Bible Online

JEREMIA 3 - Batak Simalungun bible

JEREMIA 3

¹Nini Jahowa, “Porini isirangkon sada halak binuatni, gabe misir naboru ai hun bani, anjaha laho ia bani dalahi na legan, ra ope dalahi ai mangulaki mambuatsi? Ai lang gabe butak tumang ma nagori ai? Tapi anggo ho domma marbangkis pakon buei halak, ai sihol ope mulak ho hu Bangku?” Nini Jahowa. [33]

²“Mangkawah ma ho dompak sagala buntu-buntu, anjaha tonggor ma! Ija ho na so ongga marbangkis? I topi ni dalan do ho hundul paima-imahon sidea, songon pambahen ni halak Arab i halimisan. Ibutaki ho do tanoh in marhitei parriah-riahonmu ampa hajahatonmu. [34]

³Halani ai do ase tarambat paroh ni udan pamungkah anjaha tartahan udan pangujungi, tapi songon pardompakan ni boru jalang do pardompakanmu, seng ibotoh ho na maila. [35]

⁴Ai lang dilo-dilo do ho ronsi sonari hu Bangku, ʻAle Bapa, Ham do hatengeran ni uhur bani haposoonku?ʼ

⁵Ai mintor ra ma Ia manringis lalab? Mintor idingat-dingat ma ai lalab? Tonggor ma, sonai do parsahapmu, tapi ihorjahon ho do na masambor, pala marolom-olom ho.” [36]

⁶Jadi nini Jahowa ma dompak ahu sanggah panorang ni Raja Josia, “ididah ho do pambahen ni Israel na marbalik in? Laho ia hu atas ni ganup dolog na gijang ampa hu toruh ni ganup hayu na maratah, laho mandalankon parbangkison ijai. [37]

⁷Nini uhur-Hu, ʻDob idalankon ganupan ai, tontu mulak do ia Bangku; tapi seng mulak ia.ʼ Anjaha age pe ididah Juda, anggini na marbalik ai,

⁸sonaha pangambukkonon-Ku bani Israel na mangosei ai halani haganup parbangkisonni, anjaha Hubere bani surat sirang, tapi seng mabiar Juda, anggini na marbalik ai, laho do ia homa mandalankon parbangkison. [38]

⁹Marhitei parriah-riahonni na so maralang-alang ai, gabe butak do ibahen nagori in; marbangkis do ia rap pakon batu ampa hayu.

¹⁰Tapi sonai pe ganupan ai, lanjar do seng mulak hu Bangku Juda, anggini siparbalik ai humbani bulat ni uhurni; tapi marsipakulah-kulah do hansa,” nini Jahowa.

¹¹Jadi nini Jahowa ma hu bangku, “Pintoran ope Israel na marbalik ai marimbang Juda sipangosei in. [39]

¹²Laho ne, anjaha tingtingkon ma hata on dompak utara, ʻMulak ma ho, ale Israel na marbalik in,ʼ ” nini Jahowa. “Lang pe manringis Ahu mangidah hanima, ai paridop ni uhur do Ahu,” nini Jahowa; “Seng torus Ahu manggila. [40]

¹³Asal itanda ho salahmu, paboa na manlawan ho dompak Jahowa Naibatamu, ai ma na niondoskonmai dirimu bani na legan i toruh ni ganup hayu na maratah, tapi anggo hatang-Ku seng itangihon ho,” nini Jahowa.

¹⁴“Mulak ma, ale anak na marbalik,” nini Jahowa, “Ai Ahu do tuannima; sihol buaton-Ku do humbennima, sahalak humbani sada huta anjaha dua halak humbani sada marga, anjaha boanon-Ku do hanima hu Sion. [41]

¹⁵Anjaha bereon-Ku do bannima parmahan romban hubani rosuh ni uhur-Hu, ai ma na marmahan hanima marhitei habotohon ampa hauhuran. [42]

¹⁶Anjaha anggo martambah anjaha manggargar ma hanima i nagori in,” nini Jahowa. “Bani ari ai seng be sahapkonon ni halak pasal poti parpadanan ni Jahowa, seng be taringat ai ibagas uhur, atap ingat-ingaton ai, seng be magouan pasal ai barang paulion ai.

¹⁷Bani panorang ai goranon ma Jerusalem paratas ni Jahowa, anjaha martumpu hujai sagala bangsa sipajuh begu-begu, marsombah hubani goran ni Jahowa i Jerusalem; seng be ihutkonon ni sidea uhurni na tendel anjaha na jahat in. [43]

¹⁸Bani panorang ai ipadomu ginompar ni Juda ma dirini bani ginompar ni Israel, anjaha rap sidea mulak hun utara hun tanoh, na dob Hubere gabe parbagianan ni ompungnima. [44]

¹⁹Nini uhur-Hu, ʻSonaha ma parpabangkit-Hu bam i tongah-tongah ni anak-Ku, anjaha mamberehon bam tanoh na majenges, parbagianan sijengesan i tongah-tongah ni bangsa-bangsa?ʼ Anjaha nini uhur-Hu, hatahononmu do hu Bangku, ʻAle Bapaʼ anjaha seng marbalik ho hun Bangku [45]

²⁰tongon, songon puang-puang na so bujur manadingkon paramangonni, sonai do hanima manadingkon Ahu, ale ginompar ni Israel,” nini Jahowa.

²¹Tarbogei do sora bani ianan na gijang, ai ma sora tangis-tangis ampa elek-elek ni ginompar ni Israel, halani sambor ni parlahou ni sidea, anjaha lupa sidea bani Jahowa Naibata ni sidea.

²²“Mulak ma, ale anak siparbalik, sihol pamalumon-Ku do panundalionnima in. Tonggor ma, roh do hanami mangayaki Ham, ai ham do Jahowa Naibatanami. [46]

²³Tongon, sipaoto-oto do pangarapan bani buntu-buntu ampa bani halutuon i atas dolog. Tongon, bani Jahowa Naibatanta do hansa haluahon ni Israel.

²⁴Tapi pambalosion bani sihagigihononkon ai do mamboiskon na hinalojahon ni ompungta humbani etek-etekkon nari, biribiri ni sidea ampa lombuni, anak ni sidea ampa boruni.

²⁵Tibal do hita ibagas habadoronta anjaha sabing banta hahirion, halani mardousa hita dompak Jahowa Naibatanta, hita pakon ompungta humbani hadakdanakonta das ronsi sadari on; anjaha seng itangihon hita sora ni Jahowa Naibatanta in.”