Read Batak Simalungun JEREMIA 30 Bible Online

JEREMIA 30 - Batak Simalungun bible

JEREMIA 30

¹On do hata na roh hubani si Jeremia, humbani Jahowa,

²“Sonon do hata ni Jahowa, Naibata ni Israel, ʻSuratkon ma haganup hata na dob Huhatahon bam bani sada buku! [388]

³Ai tonggor ma, na roh ma panorangni,” nini Jahowa, “Pasuangon-Ku ma ijai bangsang-Ku, ai ma Israel pakon Juda, nini Jahowa, anjaha boanon-Ku do sidea mulak hu tanoh na dob Huberehon bani ompung ni sidea, anjaha teanon ni sidea ma ai. [389]

⁴On do hata, na hinatahon ni Jahowa pasal Israel ampa Juda.

⁵Sonon do hata ni Jahowa, Ibogei hanami do sora doruh-doruh; biar do na masa, seng dong hasonangan.

⁶Sungkun anjaha tonggor ma! Ai boi do paramangon tubuhan anak? Mase ma Huidah sagala paramangon manungkolhon tanganni bani binongeini songon naboru na mangarou? Mase ma marposi ganup bohi? [390]

⁷Aih! Jangin ni ari on, seng ongga dong na sonai; panorang hasosakan do ai bani Jakob, tapi maluah do ia hunjai. [391]

⁸Jadi masa ma bani panorang ai,” nini Jahowa Zebaot, “Ponggolhonon-Ku ma pasangan humbani tangkuhuk ni sidea, anjaha rotapon-Ku tali panangkut ni sidea, anjaha seng be parjabolonon ni halak na legan sidea.

⁹Tapi balosan ni sidea ma Jahowa, Naibata ni sidea, ampa si Daud, raja ni sidea, sipabangkiton-Ku bani sidea. [392]

¹⁰Tapi anggo ho, ulang ma mabiar, ale Jakob juakjuak-Ku,” nini Jahowa, “Anjaha ulang ma tarsonggot, ale Israel; ai tonggor ma, paluahon-Ku do ho humbani tanoh na madaoh ampa ginomparmu hun tanoh habuangan ni sidea. Maningon mulak do Jakob, marsonang-sonang ma ia anjaha mardamei-damei, ise pe lang be na manonggotisi. [393]

¹¹Ai Ahu do mangkasomani ho laho paluahkon ho,” nini Jahowa, “Boiskonon-Ku do tongon sagala bangsa-bangsa pambuangan-Ku bannima, tapi anggo ho seng bois bahenon-Ku. Tongon Huajar do ho domu hubani na patut, seng paturuton-Ku ho lang hona pinsang. [394]

¹²Sonon do hata ni Jahowa, ʻSeng tartambari naboritmu, parah do ugahmu. [395]

¹³Seng dong tambar bani bayohmu, anjaha seng ra suang ugahmu.

¹⁴Haganup na mangkaholongi ho lupa do bam, seng parduli sidea bam; songon pambogbog ni munsuh sonai do pambogbog-Ku bam, songon panguhum ni munsuh na so maridop ni uhur; ai ma halani banggal ni salahmu, halani buei ni dousamu.

¹⁵Mase ma doruh-doruh ho halani ugahmu ampa halani naboritmu na so tartambari in? Halani banggal ni salahmu do, halani buei ni dousamu do, ae Hubahen na sonai bam. [396]

¹⁶Tapi sagala na mamondut ho, maningon hona bondut do; anjaha sagala na manosak-nosak ho, maningon tarboan do hu habuangan; sagala halak na manrampok ho, maningon hona rampok do; anjaha sagala halak na manrampas ho, maningon hona rampas do. [397]

¹⁷Tongon, pasuangon-Ku do ho jorgit, anjaha pamalumon-Ku do ugahmu,” nini Jahowa, “Halani na dob igoran sidea ho, ʻNa niambukkonʼ ampa: ʻSion, na so adong mampardulihon.ʼ [398]

¹⁸Sonon do hata ni Jahowa, ʻTonggor ma, pasuangon-Ku do lampolampo ni si Jakob, anjaha marulak-ulakan uhur-Hu mangidah iananni; paulion do use huta ai i atas buntu-buntuni, anjaha rumah bolon ai bani iananni hinan. [399]

¹⁹Kaluar do hunjai sora puji-pujian ampa sora ni na marmalas ni uhur. Pabueion-Ku do sidea, seng manginsurut be sidea; bahenon-Ku do sidea marmulia, seng be mahiri sidea. [400]

²⁰Gabe songon sapari ma anak ni sidea, anjaha kuria ni sidea totap do i lobei-Hu; uhumon-Ku do sagala na mangodoh-odoh sidea.

²¹Humbani sidea do raja bani sidea, anjaha hun tongah-tongah ni sidea do roh na manggomgomi sidea; lopason-Ku do ia roh dohor hu Bangku, ai ise ma na pag marmara goluhni laho mandohori Ahu,” nini Jahowa. [401]

²²“Hanima do bangsa Bangku, anjaha Ahu gabe Naibatanima. [402]

²³Tonggor ma haba-haba humbani Jahowa. Luar do gila-Ni, ai ma haba-haba sibungkar hasowor; dorabon-Ni do ulu ni parjahat. [403]

²⁴Seng surut ringis ni Jahowa, paima idalankon anjaha ipasaud sura-sura ni uhur-Ni. Arusannima do ai bani dokah-dokah ni ari.”