Read Batak Simalungun JEREMIA 31 Bible Online

JEREMIA 31 - Batak Simalungun bible

JEREMIA 31

¹“Bani panorang ai,” nini Jahowa, “Ahu ma gabe Naibata ni haganup marga ni Israel, anjaha sidea gabe bangsang-Ku.” [404]

²Sonon do hata ni Jahowa, “Dapotan idop ni uhur do songon na i halimisan ijia bangsa ai, na maluah humbani podang; laho do Israel marayak parsarananni.” [405]

³Taridah do Jahowa bani humbani na daoh. Nini, “Holong do uhur-Hu bam marhitei holong sisadokah ni dokahni; halani ai Hutogu-togu do ho marhitei idop ni uhur.

⁴Paulion-Ku do ho use, gabe torsa ma ho, ale boru Israel! Pajagaronmu do use dirimu marhitei arbap, anjaha luar manortor rap pakon na marmalas ni uhur.

⁵Tombeionmu do use pohon anggur bani dolog-dolog ni Samaria; lanjar sipanuan ai do na mangankon buahni.

⁶Tongon, na roh ma panorangni, dilo-dilo ma ijai halak parjaga i Dolog Efraim: Eta, laho ma hita tangkog hu Sion manjumpahkon Jahowa Naibatanta.” [406]

⁷Ai sonon do hata ni Jahowa, “Gogoh ma hanima mandoding ibagas malas ni uhur bani si Jakob, anjaha marsurak ma mangolobkon pambobai ni bangsa-bangsa! Baritahon, puji anjaha hatahon hanima ma, ʻJahowa do na paluahkon bangsa-Ni, simasima ni Israel!

⁸Tonggor ma, boanon-Ku do sidea hun tanoh par utara, anjaha patumpuon-Ku do sidea humbani ujung ni tanoh on; rap pakon sidea dihut do na mapitung ampa na repat, naboru na boratan rumah ampa naboru na painumkon; hulanan na banggal do sidea na mulak ai hujon. [407]

⁹Tangis-tangis do sidea roh, tapi marhasoman pangapohon Hutogu-togu do sidea; Huiring-iring do sidea hun lambung ni bah, bani dalan hanopan, ase ulang tartolsu sidea; ai Ahu do gabe bapa bani Israel, anjaha Efraim gabe anak-Ku sikahanan. [408]

¹⁰Tangihon ma hata ni Jahowa, ale bangsa-bangsa, anjaha baritahon ma ai bani pulou-pulou na madaoh; hatahon ma, ʻIa, na dob mangerap Israel, Ia do na patumpuhonsi, anjaha ramotkonon-Ni do ia songon parmahan na manramotkon hulanan-Ni.ʼ

¹¹Tongon, Jahowa, do na manobus Jakob, anjaha na paluahkonsi humbagas tangan ni halak sigogohan hun bani. [409]

¹²Roh do sidea anjaha marolob-olob bani pakpak ni Dolog Sion, anjaha marmegah-megah sidea pasal dear layak ni Jahowa, pasal gandum, anggur ampa minak, pasal biribiri ampa lombu; songon pohon na marbah do goluh ni sidea, seng be marhahurangan sidea. [410]

¹³Marmalas ni uhur do anak boru manontor-nontor, marmegah-megah garama ampa na matua. Paubahon-Ku do pusok uhur ni sidea gabe malas ni uhur, apohon-Ku do sidea, anjaha pamalason-Ku do uhur ni sidea gantih ni horu ni uhur ni sidea.

¹⁴Marlobih-lobihan do bahenon-Ku uhur ni malim-malim bani malas ni uhur, anjaha bosur bangsang-Ku bani pasu-pasung-Ku,” nini Jahowa.

¹⁵Sonon do hata ni Jahowa, “Tarbogei do i Rama sora ni doruh-doruh ampa tangis-tangis na parah; Itangisi si Rahel do niombahni, manjua do ia apohon, ai domma bois sidea.” [411]

¹⁶Sonon do hata ni Jahowa, “Sip ma ho na tangis in, anjaha apusi ma iluhmin; ai adong do upah bani halojaonmu,” nini Jahowa, “Ai mulak do sidea hun tanoh ni munsuh.

¹⁷Adong do siarapkonon bani na i pudimu,” nini Jahowa, “Mulak do anakmu bani parbagianan ni sidea.

¹⁸Hubogei do Efraim tangis-tangis: Iajar Ham do ahu, songon anak lombu na so ongga hona ajar do ahu iajar Ham. Paubah Ham ma uhurhu, ase saud mubah, ai Ham do Jahowa, Naibatangku. [412]

¹⁹Ai dob marbalik ahu, manosal do ahu; dob hutanda diringku, hutompuki do tontonku. Maila do ahu anjaha bador, halani huboan-boan hasamboron ni haposoonku.

²⁰Ai anak kasihan do nani si Efraim Bangku? Anak haudungan ni uhur-Hu do ia nani? Ai age pe Huhata ia, sai Hudingat do ia, Siholan do uhur-Hu bani, tongon, marulak-ulakan do uhur-Hu mangidahsi,” nini Jahowa. [413]

²¹“Pajongjong ma bam tanda sipatuduh dalan, bahen ma bam batu partanda. Kawah ma ho bani dalan na bolon, dalan, na dob binontasmai. Mulak ma, ale boru Israel, mulak ma ho hu Tamon.

²²Sadia dokah nari ho maor-aor, ale boru siparbalik? Tongon, domma ijadihon Jahowa sada naboru i tanoh on; ai ma naboru mangondingi dalahi. [414]

²³Sonon do hata ni Jahowa Zebaot, Naibata ni Israel, ʻSai hatahonon ni halak ope hata on i tanoh Juda ampa ibagas huta-hutani, dob Hupasuang sidea use,ʼ nini, ʻJahowa ma na mamasu-masu ho, ale ianan hapintoron, ale dolog na ma pansing!ʼ [415]

²⁴Rap ma marianan ijai Juda ampa haganup huta-hutani, parjuma-juma ampa halak na marpindah-pindah mangirikkon pinahanni.

²⁵Ai Ahu do mambahen sombuh tonduy na mandatei, anjaha Hupabosur do ganup tonduy na loheian. [416]

²⁶Dob ai tarpuho ma ahu anjaha mangkawah, mantin do na modom ai bangku. [417]

²⁷Tonggor ma, na roh ma panorangni,” nini Jahowa, “Tidahkonon-Ku ma bani ginompar ni Israel pakon bani ginompar ni Juda, jolma pakon pinahan.

²⁸Jadi masa ma, songon Ahu na dob marjaga-jaga ai bani sidea, laho mangorbat anjaha marreongkon, laho manunggalingkon, parsedahon ampa mangagouhon, sonai do marjaga-jaga Ahu bani sidea, laho paulihon ampa manuan, nini Jahowa. [418]

²⁹Bani panorang ai lang be hatahonon ni halak, ʻBapa mangankon buah anggur na migar, hape ipon ni anakni ngiluan.ʼ [419]

³⁰Tapi ganup ma matei halani dousani sandiri; ganup jolma na mangankon buah anggur na migar, iponni sandiri ma na ngiluan.

³¹ Tonggor ma, na roh ma panorangni,” nini Jahowa, “Bahenon-Ku ma padan na baru bani ginompar ni Israel pakon bani ginompar ni Juda; [420]

³²sedo songon padan na Hubahen bani ompung ni sidea, sanggah na Hutogu-togu sidea, laho mamboan sidea luar hun tanoh Masir, ai ma padan na niosei ni sidea ai, age pe Ahu tuan ni sidea, nini Jahowa.

³³ Tapi on do padan sibahenon-Ku bani ginompar ni Israel dob salpu panorang on,” nini Jahowa, “Nahkonon-Ku do titah-Ku hubagas atei-atei ni sidea, anjaha suratkonon-Ku do ai bani uhur ni sidea; gabe Naibata ni sidea do Ahu, anjaha sidea gabe bangsang-Ku. [421]

³⁴ Lang be ajaran ni sada halak hasomanni atap sanina mangkatahon bani saninani, ʻTanda ma Jahowa!ʼ Ai haganup do sidea mananda Ahu, na etek age na banggal,” nini Jahowa. “Ai sasapon-Ku do hajahaton ni sidea, anjaha lang be ingat-ingaton-Ku dousa ni sidea.” [422]

³⁵Sonon do hata ni Jahowa, “Na mambere mata ni ari gabe panondang arian, anjaha na manotapkon bulan ampa bintang gabe panondang borngin, na manggunsang laut gabe marhasak gilumbangni, Jahowa Zebaot do goran-Ni, [423]

³⁶“Songon paraturan ai seng maronti hun lobei-Hu,” nini Jahowa, “Sonai do ginompar ni Israel seng anjai maronti songon sada bangsa i lobei-Hu sadokah ni dokahni.” [424]

³⁷Sonon do hata ni Jahowa, “Songon langit na i babou ai seng tarsibar, anjaha onjolan ni tanoh na i toruh ai seng tarpareksa, sonai do seng tarambukkon Ahu ginompar ni Israel, age pe sonai haganup na binahen ni sidea ai, nini Jahowa.

³⁸Tonggor ma, roh ma panorangni,” nini Jahowa, “Paulion ma huta ai bani Jahowa humbani manara Hananel das hubani horbangan suhi-suhi ai. [425]

³⁹Torus do tali panibar ai, pintor hu Buntu-buntu Gareb, dob ai marlegot hu Goat.

⁴⁰Haganup habungan bangkei ampa habungan abuan ai, ampa haganup ladang ai das hu Bah Kidron, das hubani suhi-suhi ni horbangan huda ai, hampit hapoltakan, papansingon do ai bani Jahowa; seng anjai parsedaon atap reongkononkon huta ai ronsi sadokah ni dokahni.”