Read Batak Simalungun JEREMIA 33 Bible Online

JEREMIA 33 - Batak Simalungun bible

JEREMIA 33

¹Dob ai roh ma hata ni Jahowa paduahalihon hubani si Jeremia, sanggah tartutup ope ia bani ianan ni siparjaga: [446]

²Sonon do hata ni Jahowa na mangadongkon tanoh on, na manjadihon ampa na pajonamkon ai, Jahowa do goran-Ni,

³“Dilo ma Ahu, jadi balosan-Ku do ho, anjaha pabotohkonon-Ku do bam pasal habanggalon ampa rusia na so binotohmu ope.

⁴Ai sonon do hata ni Jahowa, Naibata ni Israel, pasal rumah-rumah na i huta on ampa rumah-rumah ni raja-raja ni Juda, na dob pinarseda bahen partahanan dompak munsuh, [447]

⁵laho manlawan halak Kasdim, ai ma rumah-rumah na gok bani bangkei ni jolma, na dob Hubunuh ibagas ringis-Ku ampa ibagas gilang-Ku, ai domma Hupadaoh bohing-Ku hun huta on halani haganup hajahaton ni sidea.

⁶Tonggor ma, parohon-Ku do hajorgiton ampa hamalumon bani huta on; pamalumon-Ku do sidea anjaha patalaronku do bani sidea hadoharon ampa hadameion na manongtong.

⁷Pasuangon-Ku do Juda ampa Israel, anjaha pajongjongon-Ku do sidea songon na bani mulani. [448]

⁸Urason-Ku do sidea humbani haganup hajahaton ni sidea, na binahen ni sidea ai dompak Ahu, anjaha sasapon-Ku do haganup panlanggaron ni sidea ampa panlawanon ni sidea na dompak Ahu. [449]

⁹Anjaha huta on gabe goran malas ni uhur ma on Bangku ampa puji-pujian ampa hamuliaon i lobei ni sagala bangsa-bangsa na i tanoh on, na mambogei sagala na madear na Hubahen bani; tarsonggot anjaha gobir ma sidea halani haganup na madear pakon hadoharon na Hubahen bani huta on.

¹⁰Sonon do hata ni Jahowa, ʻBani ianan on, na hinatahonnima ai: Domma maseda in, seng dong be jolma ampa pinahan ijin, sonai ibagas huta-huta ni Juda ampa bani dalan-dalan na i Jerusalem, na dob halong ai, anjaha seng marisi jolma be atap pinahan, [450]

¹¹maningon tarbogei do ijai sora olob-olob pakon sora malas ni uhur, sora ni siparunjuk pakon sora ni tunangan, sora ni halak sipandoding, sanggah mamboan galangan puji-pujian sidea hu rumah ni Jahowa: Puji ma Jahowa Zebaot, ai pardear layak do Jahowa, ronsi sadokah ni dokahni do idop ni uhur-Ni.ʼ Ai pasuangon-Ku do tanoh in songon na bani mulani, nini Jahowa. [451]

¹²Sonon do hata ni Jahowa Zebaot, ʻBani ianan on, na dob halong on, na so marisi jolma atap pinahan pe, sonai homa ibagas haganup huta-hutani, maningon dong do use sampalan ni parmahan bahen parmahanan ni pinahan ni sidea.ʼ

¹³Bani huta na i pardologan, bani huta-huta na i bornoh-bornoh ampa bani huta-huta i Dangsina, bani tanoh Benjamin, bani tanoh inggot ni Jerusalem ampa bani huta-huta ni Juda, maningon montas do ijai hulanan ni biribiri hun toruh ni tangan ni halak sipangkira, nini Jahowa.” [452]

¹⁴Tonggor ma, na roh ma panorangni, nini Jahowa, pasaudon-Ku ma ijai bagah-bagah na dob Hubahen bani ginompar ni Israel ampa bani ginompar ni Juda. [453]

¹⁵ Bani ari ai ampa bani panorang ai bahenon-Ku do martumbor sada Tumbor na pintor bani si Daud; dalankononni do hasintongan ampa hapintoron i tanoh on. [454]

¹⁶ Bani panorang ai maluah ma Juda anjaha marsonang-sonang Jerusalem marianan. Anjaha on do goranni hatahonon ni halak, “Jahowa parpintoranta.” [455]

¹⁷Ai sonon do hata ni Jahowa, “Seng be rotap humbani si Daud sada halak na hundul bani paratas ni ginompar Israel. [456]

¹⁸Anjaha humbani malim-malim na humbani marga Lepi pe, seng rotap be humbani sidea halak na mamboan galangan situtungon hu lobei-Hu, na manutung galangan sipanganon ampa na pasirsirhon galangan sisayaton tongtong.

¹⁹Dob ai roh ma use hata ni Jahowa bani si Jeremia,

²⁰Sonon do hata ni Jahowa, ʻSongon na so boi langkononnima padan-Ku na bani torang ari ampa padan-Ku na bani borngin, gabe seng roh arian ampa borngin bani panorang na dob tinontuhon bani, [457]

²¹sonai ma seng tarparontihon padan-Hu na bani si Daud juakjuak-Kai; gabe seng dong bani sada anak na marrajai bani paratasni, sonai homa padan-Ku bani malim-malim na humbani marga Levi, na marugas Bangku.

²²Songon bala ni langit na so tarbilang ai ampa horsik ni laut na so tarsuhati ai, sonai do pabueion-Ku ginompar ni si Daud juakjuak-Kai, ampa halak Levi na marugas Bangku.” [458]

²³Dob ai roh ma use hata ni Jahowa bani si Jeremia,

²⁴“Ai lang ibotoh ho do na hinatahon ni bangsa on, ʻIambukkon Jahowa do na dua suku, na pinilih-Ni in?ʼ Mapas do uhur ni sidea mangidah bangsang-Ku, sedo bangsa be ai ihira uhur ni sidea.

²⁵Sonon do hata ni Jahowa, ʻSongon Ahu na manompa arian pakon borngin, anjaha Ahu na manotapkon aturan bani langit pakon tanoh on, [459]

²⁶sonai do seng anjai ambukkonon-Ku ginompar ni si Jakob ampa ginompar ni si Jakob ampa ginompar ni si Daud juakjuak-Kai, gabe seng be Hubuat humbani ginomparni panggomgom bani ginompar ni si Abraham, si Isak pakon si Jakob.ʼ Tongon, pasuangon-Ku do sidea, anjaha maidop do uhur-Hu mangidah sidea.” [460]