Read Batak Simalungun JEREMIA 35 Bible Online

JEREMIA 35 - Batak Simalungun bible

JEREMIA 35

¹On do hata, na roh bani si Jeremia humbani Jahowa, bani panorang ni si Joyakim, anak ni si Josia, raja ni Juda,

²“Laho ma ho hubani halak Rekab, marsahap ma ho pakon sidea; boan ma sidea hu rumah ni Jahowa, hubani sada kamar, anjaha bere ma sidea minum anggur.” [472]

³Jadi hualop ma si Jaasania, anak ni si Jeremia, anak ni si Habasinya, ampa saninani ampa haganup anakni ampa haganup ginompar ni si Rekab.

⁴Dob ai huboan ma sidea hu rumah ni Jahowa, hu kamar ni anak ni si Hanan, anak ni si Igdalya, juakjuak ni Naibata, na dohor hubani kamar ni kopala-kopala, i atas ni kamar ni si Maaseya, anak ni si Salum, sijaga labah ai.

⁵Dob ai hunahkon ma i lobei ni halak Rekab panginuman ampa gusi na gok anggur, lanjar huhatahon ma bani sidea, “Inum nasiam ma anggur in!

⁶Tapi nini sidea ma mambalosi, ʻSeng minum anggur hanami, ai itonahkon si Jonadab, anak ni si Rekab, ompungnami do bennami: Ulang inum hanima anggur, hanima sonai ginomparnima, age antigan pe; [473]

⁷ulang pauli hanima bannima rumah, ulang martidah hanima, ulang manombei pohon anggur hanima atap marnah pohon anggur; tapi marianan bani lampolampo ma hanima sadokah goluhnima, ase dokah hanima manggoluh bani tanoh panginsolatannima.ʼ [474]

⁸Ibalosi hanami do sora ni si Jonadab, anak ni si Rekab, ompungnami ai, pasal haganup tinonahkonni ai bennami, ai ma ase lang minum anggur hanami sadokah manggoluh hanami, parinangonnami, anaknami ampa borunami,

⁹anjaha lang pauli rumah hanami bahen ianannami: Seng marpohon anggur hanami, atap marjuma atap martidah.

¹⁰Tapi marianan bani lampolampo do hanami, anjaha idalankon hanami do romban hubani tonah ni si Jonadab, ompungnami ai, bennami.

¹¹Tapi dob tangkog si Nebukadnesar, raja ni Babel mamorang nagori on, nini hanami do, ʻEta, laho ma hita hu huta Jerusalem, ai roh do tentara ni halak Kasdim pakon halak Aram! Jadi marianan i Jerusalem ma hanami.ʼ [475]

¹²Dob ai roh ma use hata ni Jahowa bani si Jeremia,

¹³Sonon do hata ni Jahowa Zebaot, Naibata ni Israel, ʻLaho ma ho, anjaha hatahon ma hubani halak Juda ampa pangisi ni Jerusalem: Ai seng ra hanima ajaran ampa manangihon hatang-Ku? nini Jahowa.ʼ

¹⁴Hata ni si Jonadab, anak ni si Rekab, na tinonahkonni bani anakni, ase ulang sidea minum anggur, idalankon sidea do; ronsi sadari on seng minum anggur sidea, ai itangihon do tonah ni ompung ni sidea. Tapi, age pe marulak-ulak Ahu marsahap bannima, seng itangihon hanima Ahu. [476]

¹⁵Husuruh do marulak-ulak juakjuak-Ku bannima, nabi-nabi ai, laho mangkatahon bannima, ʻTadingkon hanima ma ganup parlahounima na jahat in, anjaha padear hanima ma pambahenannima, anjaha ulang ma irikkon hanima naibata na legan, laho mambalosi ai, ase totap hanima marianan bani tanoh, na dob Hulayakkon bannima ampa bani ompungnima. Tapi seng ra hanima manareihon pinggolnima, anjaha seng itangihon hanima Ahu.ʼ [477]

¹⁶Tongon, ihorjahon ginompar ni si Jonadab, anak ni si Rekab do tonah ni ompung ni sidea, na tinonahkonni ai bani sidea, tapi anggo bangsa on seng itangihon Ahu!

¹⁷Halani ai sonon do hata ni Jahowa, Naibata Zebaot, Naibata ni Israel, ʻTonggor ma, parohon-Ku ma bani Juda pakon ganup pangisi ni Jerusalem haganup hamagouan na dob Hulumbahon bani sidea; ai marsahap do Ahu bani sidea, tapi seng itangihon, dilo-dilo do Ahu bani sidea, tapi seng ibalosi. [478]

¹⁸Tapi bani ginompar ni si Rekab, nini si Jeremia ma, ʻSonon do hata ni Jahowa Zebaot, Naibata ni Israel: Halani itangihon hanima do tonah ni si Jonadab, ompungnima ai, anjaha idalankon hanima ganup tonahni, anjaha ibahen hanima ganup romban hu bani tinonahkonni bannima,

¹⁹halani ai sonon do hata ni Jahowa Zebaot, Naibata ni Israel, ʻSeng anjai rotap dalahi bani si Jonadab, anak ni si Rekab, na jongjong tong marugas i lobei-Hu.ʼ ” [479]