Read Batak Simalungun JEREMIA 37 Bible Online

JEREMIA 37 - Batak Simalungun bible

JEREMIA 37

¹Jadi bangkit raja ma si Sedekia, anak ni si Josia, manggantih si Konya, anak ni si Joyakim: Si Nebukadnesar, raja ni Babel do na pabangkitkonsi gabe raja ni tanoh Juda. [491]

²Tapi anggo ia ampa juakjuakni ampa pangisi ni nagori in, seng itangihon sidea hata ni Jahowa, na dob nilumbahon-Ni marhitei Nabi Jeremia.

³Jadi isuruh Raja Sedekia ma si Jehukal, anak ni si Selemya, ampa Malim Sepanya, anak ni si Maaseya, marayak Nabi Jeremia laho mangkatahon, “Tonggohon ham ma hanami bani Jahowa Naibatanta!” [492]

⁴Ia si Jeremia boi ope hujai-hujon i tongah-tongah ni bangsa in, ai seng ope tartutup ia.

⁵Ijia domma bingkat tentara ni Parao hun Masir, anjaha dob ibogei halak Kasdim, na mangkubu Jerusalem barita ai, surut ma sidea hun Jerusalem.

⁶Dob ai roh hata ni Jahowa, bani Nabi Jeremia,

⁷“Sonon do hata ni Jahowa, Naibata ni Israel: Sonon ma hatahon hanima bani raja ni Juda, na marsuruh hanima manungkun Ahu, ʻTonggor ma, tentara ni Parao na roh laho mangurupi hanima, mulak do ia hu tanohni, hu tanoh Masir.ʼ

⁸Tapi halak Kasdim mulak do roh mamorang huta on; tabanon ni sidea do on anjaha tutungonni do bani apuy. [493]

⁹Sonon do hata ni Jahowa, ʻUlang paoto-oto hanima dirinima marhitei na mangkatahon: Tontu mulak torus do halak Kasdim hun banta. Tongon, seng lanjar mulak sidea.ʼ

¹⁰Porini pe domma italuhon hanima haganup tentara ni halak Kasdim na marmunsuh dompak hanima, gabe tading humbani sidea pitah na ugahan hansa, maningon jongjong do sidea ganup ibagas lampolampo laho manutung huta on.”

¹¹Jadi bani na mulak tentara ni halak Kasdim hun Jerusalem, halani parroh ni tentara ni Parao,

¹²luar ma si Jeremia hun Jerusalem, sihol misir hu tanoh Benjamin namin, laho marbagi tean-teanan rap pakon diha-dihani. [494]

¹³Sanggah das ia hu horbangan Benjamin, roh ma sada parjaga ijai, na margoran si Jeria, anak ni si Selemya, anak ni si Hananya manangkap Nabi Jeremia, nini ma, “Laho marbalik do ho bani halak Kasdim!

¹⁴Nini Jeremia ma, ʻSeng tongon ai; seng sihol marbalik ahu bani halak Kasdim.ʼ ” Tapi seng itangihon si Jeria ia, itangkap ma si Jeremia, lanjar iboan hulobei ni kopala-kopala.

¹⁵Jadi marah tumang ma kopala-kopala ai bani si Jeremia, ilonsingi sidea ma ia lanjar inahkon hubagas tutupan na i rumah ni si Jonatan, jurutulis ai, ai domma ibahen sidea gabe tutupan ai. [495]

¹⁶Sonai ma parmasuk ni si Jeremia hubagas lubang sel ai; dokah do si Jeremia itahan ijai.

¹⁷Jadi isuruh Raja Sedekia ma na mangalopsi. Isungkun raja ai ma ia marponop-ponop ibagas rumahni, nini ma, “Ai adong do bam hata humbani Jahowa? nini si Jeremia ma, ʻAdong do!ʼ Dob ai nini ma, ʻOndoskononkon do ham hubagas tangan ni Raja Babel!ʼ [496]

¹⁸Ihatahon si Jeremia do homa hubani Raja Sedekia, ʻAha do dousangku bamu, bani juakjuakmu atap bani bangsa on, ase ipatutupkon ham ahu?ʼ

¹⁹Ija do nuan nabi-nabimu, na mangkatahon bamu, ʻSeng anjai roh raja ni Babel mangimbang ham age tanoh on?ʼ

²⁰On pe, tangar ham ma, tuannami anjaha rajanami, sai siat ma bamu pangindoankon, ʻUlang ma suruh ham ahu mulak hu rumah ni si Jonatan, jurutulis ai, ase ulang matei ahu ijai.ʼ ”

²¹Jadi ibere Raja Sedekia ma parentah, gabe ipadas sidea ma si Jeremia hu alaman parjagaan, ibere ma sada ruti bani ganup ari hun dalan tukang roti ai, das ronsi na bois haganup ruti i huta ai. Sonai ma si Jeremia marianan i alaman parjagaan ai. [497]