Read Batak Simalungun JEREMIA 38 Bible Online

JEREMIA 38 - Batak Simalungun bible

JEREMIA 38

¹Tapi sompat do ibogei si Sepatya anak ni si Matan, pakon si Gedalya anak ni si Pashur, pakon si Jukal anak ni si Selemya, pakon si Pashur anak ni si Malkiya, haganup hata na hinatahon ni Jeremia hubani ganup na mabuei ai: [498]

²Sonon do hata ni Jahowa, “Barang ise na tading i huta on, maningon matei do ia marhitei podang, lohei atap sampar; tapi barang ise na marbalik hubani halak Kasdim, manggoluh ma ia; bani ma hosahni songon taban-taban. [499]

³Ai sonon do hata ni Jahowa, ʻManingon ondoskononkon do huta on hubagas tangan ni tentara ni raja ni Babel anjaha patundukonni do.ʼ

⁴Jadi nini kopala-kopala ai ma dompak raja ai, ʻNabunuh ma dalahi an, ai ia do mambahen galek tangan ni tentara na tading i huta on ampa haganup bangsa in, marhitei na mangkatahon hata na sonai ai bani sidea. Ia halak on sedo hadearon ni bangsa on ipindahi, tapi hasedaonni do.ʼ [500]

⁵Nini Raja Sedekia ma, ʻTonggor ma, ondos bani tangan nasiam ma ia; ai aha ma tarbahen raja in dompak nasiam?ʼ ”

⁶Jadi ibuat sidea ma si Jeremia anjaha idabuhkon ma ia hubagas godung ni si Malkiya, anak ni raja ai, ai ma na i alaman parjagaan ai; tali do ibahen sidea manantan si Jeremia hu toruh. Tapi seng dong bah ibagas parigi ai, hubang do hansa, gabe munob ma si Jeremia hubagas hubang ai.

⁷Tapi dob ibogei si Ebedmelek, halak Etiopia, juakjuak na i rumah ni raja ai pasal ai, ai ma na dob inahkon sidea si Jeremia hubagas parigi ai, (ia raja ai hundul-hundul do i horbangan Benjamin), [501]

⁸luar ma si Ebedmelek hun rumah ni raja ai, nini ma dompak raja ai,

⁹“Ham tuannami anjaha rajanami: Na jahat do pambahenan ni halak on bani si Jeremia, ai idabuhkon sidea do ia hubagas parigi ai; tontu matei gayuran ma ia ijai, ai seng dong be ruti i huta on.

¹⁰Jadi iparentahkon raja ai ma hubani si Ebedmelek, halak Etiopia ai, ʻArahkon ma hunjon hasomanmu tolu halak, anjaha tarik ma Nabi Jeremia humbagas parigi ai, paima lape matei ia.ʼ ”

¹¹Jadi iarahkon si Ebedmelek ma halak ai mangkasomanisi, laho ma ia hu rumah ni raja ai, hu kamar ianan ni pakeian, ibuat ma hunjai sigundal ampa hiou na marigat, anjaha itantan ma ai hu toruh hubani si Jeremia marhitei tali.

¹²Dob ai nini si Ebedmelek, halak Etiopia ai ma dompak si Jeremia, “Nahkon ma sigundal pakon hiou in bani kihikmu, bahen lapit ni tali in.” Jadi ibahen si Jeremia ma sonai.

¹³Dob ai idokdok sidea ma si Jeremia humbagas parigi ai hu atas, gabe marianan i alaman parjagaan ai ma si Jeremia.

¹⁴Jadi isuruh Raja Sedekia ma na mangalopi si Jeremia, ase roh ia hu labah patoluhon, na bani rumah ni Jahowa. Nini raja ai ma dompak si Jeremia, “Dong do sungkunonku humbam; ulang ma porsou atap aha pe hu bangku.

¹⁵Nini si Jeremia ma mambalosi Raja Sedekia, ʻAnggo hupatugah hu bamu, ibunuh ham do ahu! Anjaha anggo hupatugah bamu aha sibahenonmu, seng itangihon ham ahu.ʼ

¹⁶Jadi marponop-ponop ma Raja Sedekia marbija bani, nini ma, ʻSongon sintongni manggoluh Jahowa, na manjadihon tonduyta, seng anjai bunuhonku ho atap ondoskononku ho hubagas tangan ni halak on, na manguhurhon hosahmu.ʼ [502]

¹⁷Jadi nini si Jeremia ma hubani si Sedekia, ʻSonon do hata ni Jahowa Zebaot, Naibata ni Israel: Anggo ra ham mangondoskon dirimu hubani kopala-kopala na pinabangkit ni Raja Babel, maluah ma hosahmu, anjaha huta on pe seng tutungon pala bani apuy; anjaha parrumahmu pe ganupan manggoluh ma rap pakon ham.

¹⁸Tapi anggo seng ra ham marondos bani kopala-kopala na pinabangkit ni Raja Babel, jadi ondoskonon-Ku ma huta on hubagas tangan ni halak Kasdim, anjaha tutungon ni sidea ma in, anjaha ham pe seng anjai maluah humbagas tangan ni sidea.ʼ

¹⁹Dob ai nini Raja Sedekia ma dompak si Jeremia, ʻMabiar do ahu dompak halak Juda, na dob marbalik bani halak Kasdim, ra ipadas do ahu hubagas tangan ni sidea, gabe dorunan ni sidea ma ahu.ʼ

²⁰Nini si Jeremia ma, ʻSeng anjai padason ham bani sidea. Tangihon ham ma sora ni Jahowa na hutonahkon bamu, jadi sonang ma ham, anjaha maluah hosahmu.ʼ

²¹Tapi anggo manjua ham marondos, on ma na dob pinatalar ni Jahowa bangku,

²²ʻTonggor ma, haganup naboru na tading ope i rumah ni raja Juda, tarboan do bani kopala-kopala na pinabangkit ni Raja Babel, anjaha ihata-hatahon sidea do: Ipaoto-oto anjaha ipatunduk huan-kuan hatengeran ni uhurmu do ho; halani na dob losop ibagas hubang naheimu, gabe itadingkon sidea do ho.ʼ [503]

²³Tongon haganup parinangonmu ampa anakmu maningon boanon do hubani halak Kasdim, anjaha ham sandiri seng anjai maluah humbani tangan ni sidea, tapi maningon tangkapon ni tangan ni Raja Babel do; anjaha huta on maningon tutungon do. [504]

²⁴Jadi nini si Sedekia ma bani si Jeremia, ʻUlang ma tarbotoh hata on age bani ise, ase ulang matei ho.ʼ

²⁵Anggo ibogei kopala-kopala ai, na dob marsahap ahu pakon ho, gabe roh sidea marayak ho, anjaha ihatahon bam, ʻPatugah ma bennami aha parsahapanmu pakon rajanta; ulang porsou bennami, ase ulang ibunuh hanami ho,

²⁶jadi hatahon ma bani sidea: Na padaskon pangindoanku do ahu bani raja in, ase ulang isuruh mulak ahu hu rumah ni si Jonatan, gabe matei ahu ijai.ʼ ”

²⁷Jadi roh ma tongon, ganup kopala-kopala ai bani si Jeremia lanjar isungkun ma ia, gabe ibalosi ma sidea songon na hinatahon ni raja ai bani. Jadi sip mando sidea, halani seng dong na mambogei parsahapan ai.

²⁸Jadi soh i alaman parjagaan ai ma si Jeremia das hubani na tartaban Jerusalem. [505]