Read Batak Simalungun JEREMIA 39 Bible Online

JEREMIA 39 - Batak Simalungun bible

JEREMIA 39

¹Pasiah-tahunkon dob raja si Sedekia, raja ni Juda, bani bulan sapuluh, roh ma si Nebukadnesar, raja ni Babel ampa haganup tantarani mamorang Jerusalem, anjaha ihubu ma ai.

²Pasapuluhsada-tahunkon, dob raja si Sedekia, bani bulan ompat, ari siah bani bulan ai, bungbung ma huta ai.

³Sanggah na itaban huta ai, masuk ma haganup kopala-kopala pinabangkit ni Raja Babel, lanjar hundul bani horbangan tongah-tongah, ai ma: Si Nergal-Sareser, raja ni Sinmagir, Rabmag ai, ampa si Nebusasban, Rabsaris ai, ampa kopala-kopala na legan pinabangkit ni Raja Babel.

⁴Jadi dob ididah Raja Sedekia, raja ni Juda, ampa haganup balani ai, maporus ma sidea, luar hun huta ai borngin, humbani dalan na bani pohon ni raja ai manlopusi horbangan na i holangkolang ni tembok na dua ai; dompak pamah ni Jordan do sidea maporus.

⁵Tapi iayak tentara ni halak Kasdim ma sidea, gabe dapot ma si Sedekia i pamah ni Jeriko; dob itangkap sidea ia, iboan ma ia hu lobei ni Raja Nebukadnesar, raja ni Babel, hu Ribla, na i nagori Hamat; jadi idabuh ma uhum hu bani.

⁶Isayati raja ni Babel ma anak ni si Sedekia i Ribla i lobei ni matani; sonai homa haganup na sangap-sangap ni juda isayati raja ni Babel do.

⁷Ipulsitkon do anggo mata ni si Sedekia, anjaha irantei do ia, laho mamboansi hu Babel.

⁸Itutungi halak Kasdim do rumah ni raja ai ampa rumah-rumah ni rayat, anjaha ipanepnep tembok ni Jerusalem.

⁹Teba-teba ni bangsa ai, na tading ope i huta ai, ampa halak na marbalik, ampa na tading ope humbani tukang, iboan si Nebusaradan, kopala ni parjaga ai ma hu Babel, hu habuangan.

¹⁰Tapi deba halak na masombuh, na so marnadong, itadingkon si Nebusaradan, kopala ni parjaga ai do i tanoh Juda, anjaha lanjar ibere do bani sidea pohon anggur pakon juma.

¹¹Ia si Nebukadnesar, raja ni Babel, martonah do bani si Nebusaradan, kopala ni parjaga ai, pasal si Jeremia sonon,

¹²“Alop ma ia anjaha ramotkon, ulang bahen na sambor bani, bahen ma bani domu hubani rosuh ni uhurni.”

¹³Jadi roh ma si Nebusaradan, kopala ni parjaga ai, ampa si Nebusasban Rabsaris ai ampa si Nergal-Sareser Rabmag ai, ampa kopala-kopala na legan, na pinabangkit ni Raja Babel,

¹⁴marsuruh mangalopi si Jeremia, hun alaman parjagaan ai. Iondoskon sidea ma ia bani si Gedalya, anak ni si Ahikam, anak ni Sapan, ase ijalo ia hu rumahni. Jadi marianan i tongah-tongah ni na mabuei ai ma ia. [506]

¹⁵Sanggah na tartahan ai ope si Jeremia i alaman ni parjagaan ai, roh do hata ni Jahowa bani,

¹⁶“Laho ma, patugah ma bani si Ebed-Melek, halak Etiopia ai: Sonon do hata ni Jahowa Zebaot, Naibata ni Israel, ʻTonggor ma, pasaudon-Ku do hatang-Ku na dompak huta on, ai ma hata hamagouan ai, sedo hadearon, anjaha idahonmu do ai bani panorangni.ʼ [507]

¹⁷Tapi paluahon-Ku do anggo ho bani ari ai, nini Jahowa, anjaha seng padason ho hubagas tangan ni halak na hinabiaranmu.

¹⁸Tongon, Ahu do na paluahkon ho, seng anjai matei ho bahenon ni podang; maluah do hosahmu songon taban-taban, halani martenger ni uhur ho Bangku, nini Jahowa.” [508]